而昨日（23日），有傳媒就影到Yumi與疑似男友拍拖睇戲，昨晚是Marvel 新片《神奇4俠：英雄第一步》（The Fantastic Four: First Steps）特別試映場，Yumi及不少圈中藝人都獲邀。據報道指，Yumi原本單拖入場，但入戲院後她卻會合了背心男，二人皆戴著口罩和Cap帽刻意低調，就算離場都前後腳。不過散場行到去暗黑通道時，二人卻放下戒備，男方更用手輕撫Yumi膊頭及屁股；行到去商場時，男方亦情不自禁依偎在Yumi肩膊，相當煙韌。
睇完戲之後，Yumi都有在IG發布自己睇《神奇4俠：英雄第一步》的照片，不過就只是影了開場前的屏幕相，而她在同日另一個宣布考車牌成功的帖文中，身穿的衣服與昨晚在戲院的為同一套，似乎她昨日行程相當緊密，考車、食壽司、睇戲。
《01娛樂》記者就此事向Yumi求證，她否認拍拖，指見到新聞都嚇一嚇，澄清對方身份：「呢個朋友都係我同學，我都係邀請佢同我睇呢一齣戲，而且佢唔係我男朋友。（佢唔係你男朋友？）係。」對於與男方要刻意前後腳，入場及散場後才稍為鬆懈，Yumi表示：「我考完車都好開心，分開係因為我之前有嘢做，我係做嘢，分開入因為我要做嘢，入去等先，要打吓卡，做我應該做嘅嘢，因為都算Job，有人邀請我去睇，我都要做返我要做social media嘅嘢。同埋我嗰陣有好大社恐，有好多識嘅人，要打招呼，都係等佢，冇前後腳。」
而摸屁股等親暱行為，她略帶委屈問：「我冇做過任何嘢都寫到咁，搞到好多人睇……」並澄清：「我真係無諗過咁樣都寫，如果我有感覺（被摸屁股）我自己會出聲，但嗰條片，總之一直以來都冇近距離接觸，絕對冇！同埋我全程都係企喺度，撓住手，完全乜都冇做過，同埋我唔知……可能呢個friend care得特別多，佢好注重我有冇掂到人、撞到嘢，所以先會咁，但完全係零接觸。」她指片中可能見到男方將手放在她身後，但並冇真正接觸到，強調：「如果有我都一定會避開，完全冇！」
Yumi說自己跟這名同學仔完全冇發展空間，自己工作很忙，「如果真係有發展空間，我哋都係喺學校相處，同我啲groupmate一齊相處，冇額外地自己有其他私人時間，因為我自己都要工作，做嘢，冇乜時間，我擺唔到咁多時間喺呢啲嘢度，因為我又要考牌，嚟緊9月又要開學，所以其實我都要開始轉吓。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|