視帝陳豪、張曦雯、馬貫東、譚凱琪及游嘉欣等今日（11日）現身長沙灣射箭場，為新劇《俠醫》宣傳表演射箭，劇中拿手射箭的陳豪更充當教練指導其他演員，也不負眾望一箭中的，他笑指劇中以此絕技「溝女」，問他現實中是否也如此厲害一擊即中追到太太陳茵媺？他得戚地笑：「生BB就係，我一年生一個，仲唔係一擊即中？哈哈！（分享追女秘技？）個秘密就係…秘密。」問到張曦雯對這類追女仔技巧會否受落？她指若然對方是陳豪絕對受落，笑指自己很膚淺，揀男仔要靚仔之餘亦要有內涵，又分享讀書時期曾被男生的鮮花攻勢打動：「個男仔追我，每堂攞支玫瑰花畀老師，我每去一堂時老師就畀一枝玫瑰我，但冇同我講係邊個男仔送嘅，嗰日上8堂就收咗8支。（8支搞掂咗你？）欣賞佢有鋪排嘛，哈哈！」她笑指該男生最終成功邀請她做畢業舞會舞伴，但因未夠靚仔而未有發展感情，但若然現時有男仔這樣做她絕對接受。
陳豪表示追女仔最重要坦白：「要表白，鍾意人唔應該收埋，要爽快唔好拖太耐，鍾意就開始，唔好要人哋等，我自己抱住呢個心態。（依家女仔興吊住男仔。）吊住即係唔鍾意。」問他是否會將這個心態傳授給下一代？他認為男仔碰釘、失戀多幾次也無妨：「會令人長大，同明白一段感情入面大家都有責任。（自己個女呢？）女呢，我又唔係好想佢受傷害…總之我會𥄫住哈哈！」
至於首次玩射箭的譚凱琪笑指自己有天份，會考慮帶快將5歲女兒一起學，透露近日也絞盡腦汁不停為女兒找合適的活動，笑指務求在女兒懂得反抗她之前成事：「小朋友要接觸多啲嘢先知佢嘅興趣。（女女學睇電視未？）依家知道媽媽喺電視做戲。」問到會否因此遲開演親熱戲？她表示看劇情需要，不會刻意推卻。馬貫東表示自《點解阿Sir係阿Sir》已跟陳豪合作，笑指由師生關係演變到今天演兄弟。提到他近日替佘詩曼及周嘉洛的狗狗美容，會否考慮發展為生意？他笑稱學寵物美容原意是方便自己打理愛貓，但學上癮連狗隻護理也學了，笑言仍在學習階段未有打算變成生意，坦言最初只是想跟佘詩曼分享學習感受，未想過對方竟夠膽將愛犬交給他打理，笑指雖然會緊張，但總比對住客人易處理：「如果剪崩咗都唔知點同客解釋，但如果係朋友一句Sorry就搞掂，哈哈！（對寵物多過對人冇時間拍拖？）研究寵物開心啲。（唔研究人？）人好煩，寵物咬我會知點解，人咬我我唔知點解嘛！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|