《2025香港小姐競選決賽》賽果剛出爐，當中亞軍施宇琪家中五代全部都係英國劍橋畢業高材生。曾就讀香港拔萃女小學、香港漢基國際學校及新加坡United World College嘅佢，高中IB滿分，考入劍橋大學讀金融，大三時更當選劍橋中國學生會主席，並以一級榮譽成績畢業。畢業後，施宇琪據報於投行摩根士丹利擔任股票期權交易員，於港姐才藝表演環節中，又以古箏演繹《上海灘》，全能才女形象深入民心。原來佢個人魅力一直都好強大，自佢當選後，竟有網友發現早於7年前，佢就因為太靚女而被公屋仔起底力追，對方更出post集氣如何親近女神。
早於2018年，有一位自稱於連鎖咖啡店返暑期工、就讀中大三年級嘅屋邨仔發文求助，希望網友教佢如何高攀「名校大波妹」，最後經網民起底後，發現該女神就係施宇琪。網民透露自己於咖啡店返暑期工，有位樣靚身材正嘅大學生日日都嚟買咖啡，便對佳人心動，打探後得知女神住大埔舊路獨立屋。後樓主叫對方加入咖啡店會員後，取得女神名字並搵到其社交網，始發現女方居然就讀劍橋，二人學歷、家底懸殊，因此希望網民可以獻計教佢追女仔。
出post期間，樓主曾上載與施宇琪合照，神通廣大嘅網友就於post嘅連結中，確認樓主口中女神就係施宇琪。樓主當時曾大讚施宇琪份人好nice，唔會嫌棄其他人，又自稱中產，同時又愛食平民嘢及儲印花儲積分等，生活貼地。惟施宇琪見自己被起底，即將社交網轉成私人帳戶，頭像換成與男友合照，且其男友都係於劍橋就讀，施宇琪又疑似曾「上水」呼籲網民唔好將樓主起底，力讚佢人美心善。
對於昔日遭狂蜂浪蝶出post起底力追，佢就表示唔作評論，因為事件係太耐之前，佢又唔覺得係一件佢人生中重要嘅事，所以都忘記咗大部分嘅嘢。而佢同男友拍拖8年至今，選擇回港工作都係因為男友畢業時撞上疫情，男友不得不回港工作，佢即使拎到倫敦Goldman offer，都選擇愛情放棄麵包，選擇回港。
亦有疑似施宇琪舊同事留言，大讚佢真人好Nice好True：「我覺得佢個人很真 以前第1天上班跟她做事 她說病得很辛苦 很多事情做明明 跟她不認識 她也會很自然說自己事情 friendly的人 如果你在ibank做就知道有d trader是很高高在上 但他無呢啲待人態度」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
