無綫戀綜節目《女神配對計劃2》周日（1日）播出水上樂園篇，7位女神陳星妤（Yvette）、梁超怡（Chiuyi）、郭珮文（Juliana）、阮嘉敏（Mandy）、陳若思（Amber）、俞可程（Kanis）及何沛珈（Roxanne）以泳衣亮相，與12位男士展開戰況極度激烈水上大戰，爭奪交換求愛勇者及單獨過夜特權。當中女神們要坐喺求愛勇者膊頭上奮力搏鬥、互相撕扯與對抗，陳星妤與陳若思嘅對戰更係成網民討論對象。
平日斯斯文文嘅陳星妤，對戰時多次使出箍頸、插喉、打面等兇悍招數，贏左仲撳人地個頭落水，令網友大呼心寒！節目中，郭珮文前度男友Ice就對佢嘅勝出又笑又歡呼，Ice更行到一邊頭貼頭咁同陳星妤打氣，更鼓勵佢叉頸，睇到網友嘩然。陳若思於節目中就被發現條頸紅晒，更係布滿血痕、抓痕，不過佢都仍於鏡頭前展示甜美笑容，事後又Post出多張合照幫手宣傳節目，惟被眼尖網友發現佢暗暗上載頸上明顯見到紅印嘅相，指「Amber姐都唔係善男信女😂😂」、「特登post張咁明顯睇到傷痕既相引班haters攻擊Yvette」，高手過招。
對此，陳若思都親自回覆東網：「多謝網民嘅關心，大家嘅心意我收到晒。當時玩遊戲我哋都好投入，所以我都無意識到自己整親。見到之後身邊嘅人都好關心自己嘅傷勢，我反而覺得好感動🥹」再問到佢覺唔覺得陳星妤好粗暴？陳若思就冇再回應。
網友睇到片段都不禁留言鬧爆：「睇得出佢其實幾有野心，殺傷力同綠茶不相伯仲」、「今日陳星妤嘅表現真係搞晒分，又暴力又冇邊界感」、「猛攻人哋頸部好危險」、「其實Yvette係做得唔好 太狼 而我都睇到佢性格人品麻麻」陳星妤對此亦深感歉意，急急網上發文對陳若思道歉：「睇番今次節目，我有認真反省。當時太投入比賽了，冇控制分寸同力度，心裏真係唔好受。Amber，抱歉令你受傷了。見到你嘅瘀傷，我好自責，希望你快啲好番 ❤️」
另外，節目中陳星妤勇奪MVP，獲任意挑選一位求愛勇者入組特權，陳星妤終換走Ice，欽點相識逾十年好友李爾晨（Kyle）入組，陳星妤稱二人大學時已喺gathering相識：「佢咁啱喺度，啲男仔想識女仔好正常嘅。」豈料李爾晨即刻接話：「但我只係識你喎！」令在場所有人明白「襄王有夢」。陳星妤此時亦突然控制不住情緒，哽咽表示：「好少有人喺我身邊咁多年，有好多事都會互相分享，譬如我入行會問佢意見，人生decision都會問大家意見。可以嘅話，我想一路keep住佢。」事後接受採訪時更剖白內心擔憂：「一段關係可以hold up咁耐，其實係一件好touch嘅事，所有愛情我覺得都係脆弱同有時限，我唔想因為大家有感情之後就冇咗（呢個朋友）。」雖然場面感動，但有網友就指get到陳星妤番說話其實係暗示想kyle永遠只係友誼永固：「咁良禽擇木而棲都好合理嘅」、「Kyle由兵升做將軍」、「佢意思係希望永遠做佢既兵！好真誠咁喊住求他永遠做兵」
本文作轉載及備份之用 來源 source: http://hk.on.cc
|
鍾意就快D Share啦！
|
|
|