掃呢頁CODE去手機

2014年1月24日 星期五

[忽然1周 965] 獵 B行動 MW,




博出位

獵 B行動

人類天生就有母性,見到可愛嘅小朋友都會俾佢吸引住,仲會不期然拎部手機出嚟影,擺上微博曬冷。就連得廿歲嘅 G.E.M.都唔例外,見到 BB忍唔住要獵影。至於已為人父母嘅蔡少芬同 Bob,就更加錫到仔女燶日影夜影啦!

鄧紫棋 搵位自拍

G.E.M.鄧紫棋近期喺《我是歌手 2》一唱驚人,因為成日要返國內錄影,搞到佢中港兩邊走。日前 G.E.M.喺機場等飛機時見到個 BB喺媽咪膊頭上熟睡,佢竟然就曬角度搵位同 BB自拍。佢依家喺大陸咁紅,只要開口,大把 BB俾你任影啦!

蔡少芬 錫錫病女

蔡少芬同老公張晉人前人後都勁恩愛,早幾日兩人結婚六周年紀念竟然冇二人世界喎!因為細女「包子」張信兒病咗囉,難怪冇心情慶祝啦!有媽咪錫番,囡囡應該好快冇事。

鄧麗欣 母愛盡現

最近傳出婚訊嘅 Stephy,喺微博放咗張同 TJ(洪天明個仔)嘅合照,頭上幾乎出現母愛光環。既然 Stephy咁鍾意 BB,不如同小方努力啲,好事成雙啦!

林盛斌 湊女放學

Bob林盛斌自從電視真人騷《爸 B也 Upgrade》後,好爸爸形象入曬屋,雖然忙到飛起,仍不時將兩個女掛係嘴邊,有時間仲同老婆一齊去接放學。一家四口咁幸福,霏霏(大女)同熹熹(細女)大個女要孝順爸爸呀!

鄭欣宜 鍾情鬼仔

鄭欣宜同鬼仔 Mark分手之後緋聞不斷,雖然仲未搵到佢個 Mr. Right,但佢身邊嘅男仔都有一個共通點,就係……國際化喇,就算同小朋友合照都要揀個鬼仔嚟攬!愛係無分國界嘅。



鍾意就快D Share啦!