[忽然1周 965] 婚後振夫綱 安仔跑贏 Sammi喎！ Sammi,許志安,安仔,鄭秀文,MW,

今年愈跑愈有

上個禮拜下晝三點幾，安仔又陪 Sammi喺淺水灣同深水灣來回跑咗一個鐘。沿途見安仔不斷講嘢，手舞足蹈，跑得又快又輕鬆。反而 Sammi就齋聽，有時仲要加快腳步，先可以跟實老公。

媽咪姐

婚後振夫綱　安仔跑贏 Sammi喎！

上年尾被爆喺峇里秘婚後，許志安同鄭秀文次次露面都俾記者追問幾時擺酒呀？幾時生仔呀？不過佢哋把口真係鬼咁密，猛話到時會通知大家喎。 OK， OK，唔講唔緊要，媽咪姐見到你哋 sweet咪得囉！

其他影片

上個禮拜之嘛，媽咪姐趁天氣好就入淺水灣行嚇。 Well， Sammi安仔兩公婆又咁啱喺度拍拖跑步喎！不過呢次真係要讚嚇安仔，佢自從上年開始陪 Sammi跑步後，真係愈跑愈 fit。上年 10月見佢跑跑嚇要跟住天後尾慢慢行，唔多夠氣！但依家呢？可以邊跑邊同有「跑步神人」之稱嘅 Sammi傾偈，仲要係佢主講， Sammi負責聽噃，幾威呀！

跑到人多嘅地方，安仔都無避忌，四圍望。戴咗大大頂太陽帽嘅 Sammi就做 fing手操，兩公婆各有各忙。

索氣跟實

跑咗成個鐘，安仔帶頭跑上山坡攞車， Sammi繼續死跟，呢個背影係「夫唱婦隨」嘅完美演繹！

最後由安仔揸住架白色 Benz，同 Sammi一齊返去幹德道殷豪閣愛巢。管接管送兼陪跑，廿四孝老公呀。

上年 10月跟尾

上年 10月 Sammi安仔同居試婚期間，齊齊喺半山跑步。當時安仔跑到無氣，要墮後慢行，得 Sammi堅持邊競步邊做 fing手操。

Sammi出曬名鍾意日跑 8公里，佢近排仲特別鍾意著呢件黑底黃邊嘅 adidas戰衣。上星期著完，周二（ 21日）又著住跑，仲 post上網叫大家都要堅持㖭。

日本補蜜月博生仔

安仔成日俾人話事業不如 Sammi，查實佢都幾努力㗎。除咗跳槽 Paco嘅「太陽娛樂」賺一筆，近排又接多咗內地騷，搏命搵銀。

媽咪姐仲收到風，近排呢 pair新婚夫婦都放緊長假，諗住嚟緊嘅新年過日本補度蜜月，順便努力造人。佢哋啲圈中密友都話， 41歲嘅 Sammi以前每日喺室內做 3個鐘 gym兼跑步，但依家都轉曬去室外跑步，呼吸多啲新鮮空氣。一向節食 keep瘦嘅佢，近期又食多咗高蛋白質食物，明顯係想養好身體博生仔。而 46歲嘅安仔過幾日（ 26日）就會簽番 Paco（黃柏高），據知有成 3千萬落袋，夠曬奶粉錢，生番個馬仔正合時啦！

其他影片

鍾意就快D Share啦！

下一篇 》