探熱針
防法拉阿 Kay 袁詠儀突擊張智霖
歌同戲橋一樣唔怕舊，最緊要受！張智霖（ Chilam）將推出的新唱片，炒冷飯翻唱十位男歌手的經典歌，又精挑五位高登女神包括陳法拉、謝安琪、黃美棋、杜小喬及董嘉儀客串拍《你是如此難以忘記》 MV。
拍攝當日，張太袁詠儀揀正陳法拉及謝安琪埋位時段，帶埋囝囝魔童踩場，𥄫實老公。
魔童跌親
上星期六（一月十八日），張智霖在清水灣製片廠和五個高登女神拍 MV，未有陪老公到場的袁詠儀，在臨近謝安琪與陳法拉埋位，忽然帶埋囝囝魔童踩場。
「之前都冇聽過靚靚會嚟，拍咗大半日到下晝三點幾，先話佢自己揸車嚟探班。謝安琪同法拉 call time係三點半到四點，靚靚將啲時間校到啱啱好！雖然阿 Kay結咗婚，法拉又話變單身，但兩個都係男人會嗒糖嗰隻，靚靚梗係要坐喺度睇住。」現場工作人員說。
據在場人士說，法拉埋位時，靚靚金睛火眼望到實，但做過人妻的法拉始終是個醒目女，一拍完即刻彈開，走埋一邊與助手化妝吹水，同 Chilam保持距離。
「法拉冇乜埋去靚靚嗰邊， Chilam唔使埋位都企喺老婆身邊，陪嚇個仔玩；魔童因為周圍走來走去，俾現場啲電線 kick低，嚇到 Chilam O曬嘴。」
魯芬做笑彈
Chilam在《你是如此難以忘記》 MV中扮宅男，做女神的除了陳法拉、謝安琪，還有黃美棋、杜小喬及董嘉儀及負責搞笑位的魯芬。
「法拉同 Kay嘅時間比較難就，開工頭幾個鐘係先拍黃美棋、杜小喬、董嘉儀、魯芬同 Chilam，魯芬嗰 part最好笑，拍完佢又要錫 Chilam，笑到大家彎曬腰！隻唱片今個星期五出， MV就下星期二（二十八日）首播。」一名工作人員說。
三月返大陸
雖然《衝上雲霄 II》已播完一段長時間，但「 Cool魔」熱潮仍然未減， Chilam食住條水，盆滿鉢滿。去年九月轉會蕭定一旗下的他，三月便要留守內地拍劇，故必須在此前錄好新唱片。
「其實 Chilam今次隻碟都係唱人哋嘅歌，佢揀咗啲佢好鍾意嘅男歌手好似草蜢、郭富城、梁朝偉嘅歌翻唱，做埋新碟宣傳後，佢就要返大陸拍劇。希望今年底可以開到演唱會，而家睇緊啲期。」知情者說。
|
鍾意就快D Share啦！
|
|
|
