2014年1月30日 星期四

[忽然1周 966] 周麗淇恨嫁催婚 徐正曦:冇諗過結喎! 徐正曦,周麗淇,MW,




無意結婚

上周五( 24日)徐正曦由上海秘密來港會女友,在 Niki貝沙灣香閨宿一宵後,翌日他單拖出旺角,其間對記者有問必答,講到結婚,即坦言「從未諗過」。

滾熱辣

周麗淇恨嫁催婚 徐正曦:冇諗過結喎!

已屆 34歲、步入中女行列的周麗淇( Niki),早前遭本刊斷正與內地有「黃曉明接班人」之稱的徐正曦拍拖。搵到筍盤趕上尾班車的她,拍拖唔夠三個月,已買定結婚戒指打算催婚。

上周五( 24日),徐正曦秘密到港參加公司春茗兼會女友,對本刊記者坦言未有結婚打算:「嚇!同佢啱啱先開始啫,佢都未見過我父母,冇諗過結囉!」

其他影片

斷正瘟仔

去年 9月,周麗淇遭本刊斷正到上海密會拍拖不久的徐正曦,二人十指緊扣在雨中慢步, sweet到暈!

在情場上屢敗屢戰的周麗淇,去年八月在上海橫店拍內地劇《大漢賢後衞子夫》期間,火速瘟掂內地四小生之一、有「黃曉明接班人」之稱的徐正曦。現年 29歲的徐正曦, 08年簽寰宇成為本港藝人,曾拍過《 B+偵探》和《我老婆唔夠秤 2》等港產片。雖然在港仍是起步階段,但在內地知名度不錯,單計去年廣告收入,便勁賺過千萬人仔。雖然出身並非大富之家,但絕對屬有潛質「新股」,難怪有幸得到姐姐周麗淇眷顧。

女方買定戒指

男方雖比自己細五歲,但難得搵到好碼頭,據知心急上岸的周麗淇,早在去年十二月,已向男友放聲氣希望在 35歲前嫁得出。知情人透露:「其實 Niki拍劇純為興趣,你睇佢一年先拍一套劇就知佢嘆慢板啦。加上舊年年尾喺台慶頒獎禮一個獎都冇,佢都話無心戀戰囉,淨係想學佢家姐咁,快啲搵到個好男人嫁出去。加上 Niki年紀唔細,想生仔都係呢幾年,所以明白佢點解會咁心急。」

以往甚少談及戀情的周麗淇,早前更罕有自爆有顆恨嫁的心。「以前太醃尖,依家要俾多啲機會人。我都開始有壓力,希望嚟緊呢年有眉目啦!」為夢想成真,據知早前周麗淇更一反過往只有男方求婚的傳統,自掏腰包在 Cartier買了隻價值五萬元的白金鑲鑽的戒指,打算送俾男友。知情人透露:「 Jeremy(徐正曦)原本舊年聖誕落嚟香港搵 Niki, Niki就諗住呢個時候送俾佢,點知 Jeremy大陸套劇超時,劇組唔肯放人,所以隻戒指仲喺 Niki嗰度。」

姊弟戀萌芽

周麗淇去年到上海拍《大漢賢後衞子夫》時,遇到當紮的徐正曦,有傳女方主動追求,姊弟戀瞬間萌芽。

情路坎坷

周麗淇情路坎坷,早年她和鄭嘉穎拍《天幕下的戀人》撻著,後因阿佘介入而告終。之後搭上紗廠太子爺 Eric,最後同樣分手收場,難怪今次再有機會, Niki要箝實唔放。

買 game買波衫

在港屬起步階段的徐正曦,搭地鐵到旺角逛了三小時,卻冇一個途人認得,他最後買了件林書豪球衣及 NBA game給自己。

男友秘密到港

上周五( 24日)下午三點,徐正曦秘密由上海來港,先到大圍家中放低行李,隨即到灣仔福臨門出席公司春茗。食到將近淩晨兩點鐘,徐正曦臨離開前,記者見他接了一個電話,聽到他說:「得啦,好快過嚟啦!」相信是周麗淇催促徐正曦到自己貝沙灣香閨相聚。

至翌日下午一時,陪足女友一晚的徐正曦,獨自由貝沙灣步出,乘的士到旺角信和中心買遊戲機。沿途記者訪問他,只見他一聽到 Niki名字,即冧笑叫記者千萬不要寫衰女友。「寫我差啲唔緊要,我冇所謂呀。但女仔係香港 artists,有 image喺度,寫衰少少已經影響到佢嘅廣告收入。」

雖然處處維護女友,但當記者問 Niki是否他的結婚對象時?原本和記者侃侃而談的他卻緊張地說:「唔……拍拖呢啲!( Niki好想結婚,仲買定戒指喎,你知唔知?)我冇諗過結婚,啱啱開始啫,有排啦,冇咁快,男仔嘛,事業穩定咗先啦!(係咪見過父母啦?)佢都未見過我父母,我就同佢爸爸媽媽食過一次飯!(嚟緊新年會唔會去 Niki屋企拜年?)唔會囉!我 30號要返上海過年。(同 Niki一齊去?)淨係我自己返!」 Niki一心泊岸做阿太,可惜男友只想拍拖未諗將來,看來 Niki想做馬年新娘,都要加多幾錢肉緊!

執靚見仔

周日( 26日),周麗淇到銅鑼灣執靚個頭約男友食飯,更打算即席送上戒指,可是當她發現記者後,即時嘟起個嘴,面露不悅。

求婚鑽戒

據知周麗淇買了價值 5萬元的 Cartier戒指向徐正曦求婚,為咗嫁得出,認真揼本!

極速上車

被記者緊追的周麗淇,跳上保母車後,為撇甩記者,過線 U turn樣樣齊,更兜勻港、九、新界,最後局住連人帶車返回貝沙灣寓所,睇嚟燭光晚餐要改為嗌外賣囉!

其他影片


鍾意就快D Share啦!
Related Posts Plugin for WordPress, Blogger...