斜視藐嘴
周日（ 26日）在港舉行首映禮，發哥多次背住甄子丹。被問到傳不和，發哥話：「佢唔敢當面話我，佢想死咩！」難怪冇聲出嘅丹爺忍唔住嘴藐藐。
滾熱辣
甄子丹片場發老脾 發哥暗寸：動作做唔到梗忟憎
賀歲 3D片《大鬧天宮》拍攝時，飾演主角孫悟空及武指的甄子丹因為力求完美，壓力爆煲，不時喺片場發老脾，狂噴工作人員。出名親民的周潤發曾經好言相勸甄子丹收火，豈料甄子丹唔領情繼續爆火。自此兩人冇偈傾，早前兩人在北京出席宣傳時更當眾針鋒相對，火藥味濃。
本刊追訪發哥，他向本刊直認甄子丹「脾氣臭」，仲話︰「動作做唔到梗忟憎」飾演玉帝嘅發哥，似乎有心出手整治下呢隻馬騮！
- 發哥 3月搬上 2億半山
周潤發在賀歲片《大鬧天宮》和「馬騮精」甄子丹不但多對手戲，戲外兩人亦連番交鋒。早前在北京出席《大鬧天宮》記者會，發哥忽然話︰「希望甄子丹拍完這部電影後，脾氣可以好一點……」寸爆「宇宙最強」愛發老脾。
甄子丹亦即場還擊︰「發哥這麼貴，他的鏡頭很珍貴，拍起來要格外注意。尤其發嫂在旁邊，不僅現場工作人員配合不能出錯，發哥走出來的樣子還要很帥。」反寸發哥人工高又多要求，更燒埋發嫂嗰疊，火藥味濃。
發哥按組拍
其實兩人不咬弦，全因原則問題。發哥片酬一向逐部計，不過今次為了和甄子丹合作，亦不介意將片酬「斬件」，拍一組收一組錢，變相減收片酬。不過發哥有一個要求，就是每組戲只可以拍 8小時。
身兼主角及武指的甄子丹，不時要臨場度對打戲，但《大鬧天宮》是 3D片，拍攝時現場以「全藍幕」代替真實背景，以便加入電腦效果。甄子丹要面對空氣度位，難度更大，經常要度五、六個鐘才度好。很多時發哥呆等甄子丹大半日至拍攝，拍得兩、三粒鐘就輪到發哥夠鐘收工，進度因此拖慢。
「子丹私下都有微言，覺得發哥俾唔夠時間。但人哋準時到場，加上又係國際巨星，子丹惟有穀住度氣，咪轉移向工作人員同武師發炮囉，搞到片場氣氛勁緊張。」
和事老遭冷待
甄子丹飾演孫悟空，動輒要花五小時化妝，化妝後又不能飲水及進食，甄子丹承受雙重壓力，片場躁爆。「子丹試過度極都度唔掂場埋身對打戲，導演鄭保瑞見佢開始躁，咪改拍威吔戲先囉。發哥見子丹鬧武師鬧得好狠，試過好聲好氣勸佢收火，點知子丹唔領情，轉頭仲大聲繼續鬧。發哥 EQ高冇再出聲，但自此同子丹都冇乜兩句。」知情者說。
甄子丹自《特殊身份》後，票房不如從前，為守內地億萬票房的位置，故對《大鬧天宮》精益求精。「子丹接呢套戲時都係收老闆王海峰舊價，演員連武指兩職合共都係收二千五百萬。佢本身收開三千萬，咁都肯接，睇得出佢對《大鬧天宮》好大期望。不過老闆王海峰都覺得子丹貴，嚟緊雖然打算拍續集，可能飛起子丹。」
上周六（ 25日）早上十一時，發哥為治療肩部舊患，如常到佐敦踩背通淋巴。談到甄子丹片場發老脾，發哥收起笑容，嚴肅地說：「子丹要幾個鐘化妝、黐曬毛易忟憎，做唔到啲動作，動作做唔到梗忟憎！」問到有冇牽連佢，發哥嘴角一翹說︰「佢對我都唔知幾好呀！（你哋片場鬧不和？）黐線，大人大姐搞啲咁嘅嘢！」發哥笑住嚟寸甄子丹，但又踢爆佢躁底，認真鬼馬。
問番甄子丹，佢直認拍攝時要「壓場」：「發哥同城城都要吊威也，我壓力都好大。對住武師唔會好斯文，我都要壓場！發哥鍾意講笑啫，多謝發哥塞錢落我袋啦！」
3月搬新屋
發哥農曆年有兩部賀歲電影上映，搵埋唔少。為了慰勞發哥，發嫂用半年時間將市值 2億的加列山道陽光花園別墅重新裝修，裝修費達千萬。據悉發哥三月就會入住新居，由九龍塘搬過港島區山頂。
回應就快搬新居，發哥回復談笑風生本色︰「你又知？你入過去呀？唔知㗎，價好賣鬼咗佢都唔定。（你之前買落啲樓升好多喎！）唏！唔好講呢啲！（搬過海會唔會唔習慣呀？你日日行呢條路？）咪又係咁行！（你同霆鋒拍戲時，佢係咪好 chok？）佢個角色係要 chok！（霆鋒跟你學嘢？）我同佢學嘢就真。」
答完記者，發哥繼續徒步返家，沿途又發揮親善大使精神，同 fans合照兼吹水。發哥咁襟撈，丹爺真係要學！
5億 4物業
多年來，發哥都愛買樓保值，而且都是長揸居多。發哥的物業雖然只有五個，但由於多屬優質樓盤，加上購買逾十年，所以現今升值數倍。
- 發哥 3月搬上 2億半山
|
鍾意就快D Share啦！
|
|
|
