掃呢頁CODE去手機

2014年4月9日 星期三

[FACE 359] 紅 VAN起義 MF,




小報告

紅 VAN起義

千呼萬喚, hit爆高登的懸疑小說《那夜淩晨,我坐上了旺角開往大埔的紅 Van》電影版,將於 4月 10日上映。

導演陳果同三位主角黃又南、徐天佑和文詠珊,率先解構戲中角色同劇情,與及電影和小說版的分別。呢架紅 Van,你預備好上車未?

徐天佑(飾演阿信)

Q:點樣演繹戲中角色?

A:我飾演阿信,不過都睇埋「眼鏡青年」嗰部分,演繹時將兩個角色溝番勻。睇小說時,大家都唔知阿信諗咩,但我同導演商量過,應該要將佢人性化啲,聰明只係佢嘅性格,其實佢內裏係有陰暗面,可能係恐懼、可能係慾望。

Q:最想戲中邊個角色死先?

A:咁嘅環境,梗係唔想有人死,多一個人幫嚇手都好嘛!我記得其中一場戲講我哋喺好迫不得已嘅情況下,先放逐其中一個人!

Q:同一班前輩合作,有咩學到?

A:華哥(任達華)好犀利,拍咁多晚通頂都可以好精神,可能食咗卡士蘭!有時拍到 3、 4點開始眼光光,但華哥仲好有精力,試過有日拍到淩晨 5點,佢仲話:「 5點好早喎,返去跑個步先!」

導演陳果

Q:點解會拍?

A: Amy Chin(監製錢小蕙)畀本書我睇,睇完後覺得呢個講成個香港冇曬人嘅題材好特別,有懸疑、驚慄、科幻等元素咁豐富,應該拍得過!

Q:電影同原著小說有咩分別?

A:開拍前我叫 Pizza(小說作者)寫個劇本畀我,之後我再寫一個詳細少少,我哋傾完後都唔想改動太多劇情,惟有就係喺角色方面埋手,例如白粉仔(李璨琛)原本冇乜戲分,但我加咗條佢同小巴司機嘅線畀佢,成個人物性格會立體好多!

Q:對票房有咩期望?

A:嘩,唔敢諗呀!同期仲有幾套港產片,好多對手,費事希望愈大失望愈大

黃又南(飾演阿池)

Q:阿池之外,最想做邊個角色?

A:如果可以男扮女裝,我想試嚇做 Yuki,呢個角色神神秘秘好大發揮、好好玩,有好多內心戲,同埋揀都揀唔喺上集就死鬼咗嗰啲

Q:再同陳果合作,有咩感覺?

A:佢真係好勁,選角選得好中,例如一睇林雪就覺得佢係一個唔識揸小巴嘅小巴佬!同埋佢喺片場係一腳踢,服裝、燈光乜都要理,一日又要拍 3百幾個鏡頭,仲要不眠不休剪埋片,我都戥佢辛苦!

Q:電影最吸引之處?

A:套戲 1,500萬成本,係平時港產片嘅 3倍,淨係用 CG執走啲人都好花錢花時間!同埋部戲好有香港本土味道,小說入面提過嘅茶餐廳,真係去番大埔嗰間拍,而且對白上好多用語,真係香港人睇先有感覺!

文詠珊(飾演恐怖 Yuki)

Q:點解會接拍?

A:我本身好少睇香港小說,但身邊人討論得太熱烈,同埋我助手日日拎住本書同我講,我咪借嚟睇囉,點知隔冇耐就收到劇本搵我演「 Yuki」,我都覺得好有緣!

Q:《紅 Van》同以前拍過的電影有咩唔同?

A:好難得呢套係純香港電影,唔係合拍片,同埋導演加入好多社會元素,例如青少年嘅心態、時下流行嘅嘢等等,比原著更豐富,但又唔會完全改咗本身個故事。

Q: Yuki係一個咩角色?

A:我個角色係一個好奇怪嘅女仔,好多小動作、好 stress,佢冇一份長工,上小巴前被老闆炒魷、出隧道後又同男友失去聯絡,你想像嚇佢嗰種徬徨無助!同埋導演加入少少靈異元素落 Yuki身上,例如阿池(黃又南飾)每次望住我都會見到啲奇怪影像,總之成個角色都好神秘!

《紅 Van》之謎

未上大帽山前就係 ending,雖然好多網友要求上埋山先完,但導演唔想片長要 3個鐘,惟有留番下集。

IIB版有冇姦屍?

遲 III版一個星期上映的 IIB版,都有交代姦屍情節,陳果話:「呢幕太重要,關係到後來一連串喺茶餐廳發生嘅事,就算整黑曬成個畫面,都要打住『姦屍中』三個字去交代!」

中大仔變喪屍?

網絡版《紅 Van》中,輕輕帶過「中大四子」落車後的事,電影版則加了一段,講其中一人病毒發作變了喪屍;另外三子從校園逃走,途中遇見男主角阿池。

上山路線唔同咗?

原著講白粉仔係大埔人,而電影則將佢改為荃灣人,因搶粉食入咗大埔。原著中小巴經林錦公路上大帽山,導演則改了由大埔先出九龍再經荃灣上山,更預告下集會有事在九龍發生!

有咩新角色?邊個最搶鏡?

惠英紅飾演的「神婆」穆秀英,係電影版唯一新角色,負責為成件事解話。而最搶鏡嘅演員,除咗男主角黃又南同被外國傳媒力讚的 JM,仲有入型入格的爛口小巴司機林雪,另外仲有周國賢客串添!

陳果:今次真係玩大咗!

憑 96年的《香港製造》、 02年的《香港有個荷里活》兩度成為金馬、金像獎「最佳導演」, 54歲陳果封刀十年後再次做導演,執導由高登同名小說改編的《那夜淩晨,我坐上了旺角開往大埔的紅 Van》。

「個個都話我成 10年冇拍戲,原來唔覺唔覺咁就 10年,我自己都冇為意!呢段時間其實一直做啲剪片、監製呀,我都要搵食,呢啲(做導演)搵唔到食,興趣嚟咋!」

10年後再出擊,陳果睇準劇本先出手,不過《紅 Van》實在有太大發揮空間,而且資金唔夠,電影要分上下集拍攝,勁吊癮。「我𠵱家都好苦惱,好多讀者睇完小說都話個結果有少少爛尾, Pizza(原著作者)自己都承認埋尾唔夠好,咁即係變相將個波射畀我全世界都等緊睇嚇我點死!今次真係玩大咗,好難搞,我到𠵱家都未敢諗住!」

至於上集的結尾,陳果亦炮製了一個 open ending畀觀眾自行想像,「第一集係冇 ending,算係創咗少少先河,不過觀眾寬容量好大,竟然收貨喎!你知啦,都要高登仔滿意先得,佢哋唔 happy嘅話,第二部點拍呀!佢哋啲影響力幾勁呀,所以都要就住班高登巴打,我諗等套戲正式上畫後,我都唔敢上高登睇留言,驚俾人插呀!」

'96《香港製造》

陳果憑《香港製造》奪得 98年香港金像獎的「最佳導演」。圖片

巴打發圍

高登仔收貨

自從改編自高登巴打向西村上春樹、 12年上映的《一路向西》成功突圍後,陸續有其他高登小說被搬上大銀幕。除了《紅 Van》,暫定已有三套排住隊上畫,巴打們儲定錢撐

《男人唔可以窮》

導演:鍾澍佳

演員:黃宗澤、鄧麗欣、陳偉霆、陳嘉桓

故事大綱:打工青年薛可正一夜間被老闆開除,同時與女友分手,頓成雙失青年。在朋友和剛出獄的弟弟介紹下,進入倫敦金公司成為黃金經紀,正當事業剛剛有起色,卻傳來父親患上末期癌症的壞消息……

《含忍.死人.的士佬》

導演:梁子明

演員:關楚耀、何佩瑜、 HotCha

故事大綱:中年漢事業失意淪為變態的士司機,一次接載了曾折磨他的前老闆女兒,決定將她先綁架後撕票。司機得到贖金改行做生意,可惜經營不善,受挫折後畏罪自首。

《高登闊少踎監日記》

導演:孫立基

演員:張建聲、 BabyJohn、黃光亮

故事大綱:富二代因醉駕導致他人死亡被判入獄,向來以 M6代步的他一夜間一無所有。獄中的 365天歷盡監獄風雲,還認識了一班老同。一夜又一夜的獄中生活,其實比地獄世界更加黑暗,還是天堂般的樂土?



鍾意就快D Share啦!