掃呢頁CODE去手機

2014年4月30日 星期三

[FACE 362] 唔信邪 相士批死於非命 森美:唔敢同老婆講 森美,MF,




佈道會直擊

唔使開劇捱殘,食得好瞓得又好嘅森美最近有少少發福,上週六( 26日)出席小型佈道會,任嘉賓分享當年因誤信神棍,搞到提心吊膽足足 4年。

真面目

唔信邪 相士批死於非命 森美:唔敢同老婆講

甘冒得罪大台之險,以健康為由辭演重頭劇《使徒行者》的森美,原來唔係天不怕地不怕,上週六( 26日),森美出席基督教佈道會,自爆 15年前(當時 25歲)曾經被於廟街擺檔的「師傅」狠批會在 29歲死於非命,嚇到佢瞞住老婆及家人,提心吊膽足足 4年!

唔只 29歲死唔去,森美 40歲人都 keep得一支花仲要愈撈愈掂,呢啲咪事實勝於雄辯囉!唔係話偏幫任何宗教,不過風水佬真係隨時呃你 10年 8年。



其他影片: >>森美生死論










全 hall爆滿

嘉賓森美嘜頭大過主持牧師。雖然喧賓奪主,但因此吸引將軍澳街坊早早排隊入場聽森美分享,小學禮堂約六百座位全數爆滿。

大台出名出手低、趕劇非人生活似收買人命,所以森美就算遇到「重頭劇」都不為所動,兩個月前提出辭演林峯及佘詩曼孭飛的《使徒行者》絕對係明智之舉,抖足精神保住靚樣得嚟,仲盡其虔誠基督徒責任傳福音。

自爆 15年前被批結婚翌年會死於非命,結果森美現時結婚 16年,長子 12歲、幼女 7歲,一家四個樂也融融。

'02 29歲

被批 29歲會死於非命,實情 02年森美 29歲時長子出世,亦憑電影《新紮師妹》成功從電台跳入電影圈。

拆廟街師傅招牌

捱過 29歲,森美不再被「大限說」困擾,再演出福音電影《翻生奇兵》,將真實經歷搬上大銀幕。《蘋果日報》圖片

上週六( 26日),本刊記者現場直擊森美落區出席佈道會,宣傳有限、場地亦唔算闊落(將軍澳田家炳小學禮堂),不過淨係賣嘉賓森美個名,六百座位一樣爆滿。

由萬姓牧師主持的佈道會全長個半鐘,嘉賓森美分享佔短短半粒鐘,但一上台已經單刀直入拆風水師招牌。

「風水命理嘅嘢,我以前都信, 25歲時聽人講廟街有個師傅睇姻緣好靈,即刻走去見下佢。佢叫我坐低傾下,第一句批我 28歲會結婚,我仲心諗我生得咁靚仔點會咁早婚?第二句就係話 29歲會死於非命喎。從此以後我就當曬真,連返工經過殯儀館都覺得殯儀館係為我而開,由 25歲至到 29歲都係提心吊擔,又唔敢話俾屋企人、同當時嘅女朋友即係𠵱家嘅老婆聽。最驚我真係 28歲結咗婚,又真係俾佢講得中吖嘛!」

家有賢妻

森美老婆陳雅嫻曾拍許冠傑主演的《全家福》,亦做過有線電視兒童台主持,佢同森美拍拖 8年後於 02年結婚。

「今年唔死下年都死」

森美 01年與做過童星的陳雅嫻秘婚, 02年即是 29歲當年未死得,仲添丁(長子出世)又拍戲(《新紮師妹》)搞作多多,森美當年重臨廟街打算質問睇相佬,誰不知對方還是一口咬定:「今年唔死你下年都會死!」提心吊膽幾年,森美終於唔再信睇相佬,改信耶穌仲拍埋福音電影《翻生奇兵》。「我成日覺得我死唔去一定有啲原因,原來神就係俾我有呢啲經歷,跟住叫我拍套有關睇相嘅福音電影囉。」信睇相佬,不如信自己

曾經抑鬱

去年接受本刊訪問自爆患過抑鬱症時忍唔住落淚,現時仍要服藥,森美卻沒有在佈道會上分享抗症經歷。

智商高,會考 25分,畢業於中文大學新聞系的森美,入行當 DJ 20年,一直平步青雲冇乜大風浪。但隨著工作量愈來愈多,森美近年竟患上抑鬱症。 12年年尾,森美因為一連 po咗好多女藝人,當中包括小儀的美腿相上微博而被指因抑鬱導致「戀足癖」,好彩宗教助森美渡過難關。

去年因為電視劇《法網狙擊》「波地 Sir」一角成功入屋,亦因此惹上「戀腳」疑雲,森美解釋:「成千張相得六、七張影腳,係誤會……我唔係變態㗎!」

網上圖片

網上圖片

廟街塔羅師:「唔知森美有冇講我!」

俗語有雲「睇相佬呃你十年八年」,今次森美因為睇相佬一句話驚足 4年, 29歲「大限」一過已經在電台節目分享被「騙」經驗,反而搞到傳聞是經手大師的「廟街阿 B」門庭若市。本刊致電查詢,塔羅師阿 B就大呼寃枉:「我唔睇電視、唔聽電台,唔知森美有冇講過我,但我肯定冇睇過森美。佢話佢 25歲、即係 15年前去廟街睇相,我喺廟街擺檔得十年咋!」

盛傳森美 25歲時走入廟街是幫襯「廟街阿 B」,塔羅牌師傅的阿 B(小圖)堅稱未見過森美,廟街擺檔史亦僅得 10年。網上圖片

99年, 25歲的森美已經係商台當紅 DJ,當時跟唔少圈中人一樣篤信風水命理。《蘋果日報》圖片



鍾意就快D Share啦!