[FACE 362 外地娛樂] B女遮大 S雙下巴 MF,

FBI

B女遮大 S雙下巴

娛樂圈呢幾年興生 B，喜訊一個接一個。上星期終於輪到結婚 3年的「大 S」徐熙媛報喜，佢同「俏江南」太子爺汪小菲嘅千金喺上週四（ 24日）出世，母女平安，阿女 3公斤重足曬磅，腳長五官似媽媽，第時走唔甩會係「正妹」喎！

37歲大 S喺微博率先曬完 B女相，老公汪小菲極速留言轉發話「老婆這 1年辛苦了！」陀 B最多咪十個半月， FBI計落，大 S又確係唔止辛苦十個月嘅。由 11年閃婚開始，就被人傳有喜，傳足兩年幾都食詐糊你估好過癮？仲有呀，話曬係偶像劇女花旦，大 S keep fit食素多年，都係陀 B前至為營養食番肉。其實生咗都未辛苦完，生完減肥就真係磅磅皆辛苦喇！唔怪得張張發相，都見大 S用 B女遮住自己個下巴醒喎！

生完翌日（ 25日），大 S喺微博公布一家三口幸福合照，頭髮梳得靚一靚、仲啱啱好遮咗雙下巴，呢啲咪專業發相囉。

2011年，相識 4個月就喺三亞閃婚、一結婚已經話不設防等生，佢老公同奶奶張蘭等大 S第一胎，等足 3年。網上圖片

十月懷胎，大 S行蹤極秘，大肚 look都係僅僅得有喜 5個月時一張自拍咁大把。

鍾意就快D Share啦！

下一篇 》