2014年6月26日 星期四

[壹週刊 1268] 全面反枱 親證冇收前夫千萬 黎瑞恩:膝頭對上就係俾! 黎瑞恩,M1,




連日來為新居購買日用品,上週四下午,她帶著仔女到大埔超級城入貨。

娛頭

全面反枱 親證冇收前夫千萬 黎瑞恩:膝頭對上就係俾!

跟家族擁有過百億資產的金利來集團三少曾智明結婚十一年的黎瑞恩,因國產小三介入,導致婚變,年初帶同一對子女離開九龍塘大宅後,隨即搬入大埔凱悅酒店式住宅暫住。本月初,正式辦理離婚手續的黎瑞恩為讓子女重回正常生活,已搬離酒店,並以月租五萬多元,租住大埔比華利山屋苑,有指按月收二十萬贍養費的她,離婚後獲前夫分千萬身家,跟曾智明全面反枱的黎瑞恩斷然否認:「膝頭對上就俾!」㷫爆!

自力搬屋

上週六,黎瑞恩揸車到大埔凱悅酒店,將存放在酒店的六大袋物品搬走,然後再返比華利山新居。

黎瑞恩買了不少煮食用具。

在文具部流連了一段時間。

一味拖住

上週四(六月十九日)下午五點幾,黎瑞恩駕著平日用開的 Jeep,載住一對子女及兩名朋友,離開新居比華利山,到附近的大埔超級城買家居日用品。之前被拍到在宜家買平價傢俬的她,跟子女在一田百貨繼續格價,三人在家居用品部行了接近一個鐘,黎瑞恩發現記者後,即發火:「唔好跟住!」掃了多款減價煮食用具及大堆文具後,一家人便折返新居。

「新屋要五萬幾蚊租,得二千呎,比起以前住開嘅萬呎九龍塘大宅梗係細咗好多,但小恩子貪新屋方便仔女返學;話就話 Ricky(曾智明)照跟番以前喺大宅廿萬家用一個月咁,俾三仔乸生活費,但佢哋而家搬開住,交租都唔見咗一截, Ricky又唔另外俾租,變相減咗生活費;之前連仔女嘅課外活動費都拖得就拖,三催四請先肯俾,小恩子都冇符。」知情者說。

黎瑞恩當年嫁入曾家,據知一直不獲奶奶歡心,直至誕下兒子浩儒,在曾家才漸有地位。

有指曾智明向來孤寒,前妻黎瑞恩雖是百億新抱,但多年來衣著普通,少有攞名牌袋。

家底厚俾多啲

謝偉俊

就黎瑞恩與曾智明離婚,有關雙方贍養費問題,本刊諮詢了謝偉俊律師的法律意見,了解男方支付的贍養費數目,是否該給予女方離婚前一樣的生活水平?

「呢個係盡可能,當然最重要係睇番雙方經濟條件同需要,保持番離婚前生活水平,呢個係理想化,但實際上好多時做唔到,原本一份變兩份比較困難,所以只係其中一個考慮因素。(如果男方家底顯赫,是否要提供離婚前生活水平?)可以咁講,男方如果家底厚,可以俾多啲。」謝偉俊說。

冇偈傾

今年初爆出婚變的黎瑞恩,表現得很堅強,二月十八日生日的她,獨自外出買火鍋材料回家與兒女慶祝。

多年來長駐內地的曾智明,就算放假回港,也從不爭取親子時間,與一對仔女感情十分疏離。

據了解,女兒今個月小學畢業,缺席多次家長聚會的曾智明,為了不落人話柄,也有現身出席畢業禮。

「嗰日凱栭都係黐住媽咪,冇乜點理爹哋,曾智明都有等畢業儀式完曬,同個女影完合照先走,但黎瑞恩同佢就全程冇傾過偈,連企埋少少都冇,互當透明。」有份出席的家長透露。

斤斤計較

據了解,黎瑞恩未有如外間所指收過千萬贍養費外,曾智明對前妻及子女的生活開支,反而斤斤計較。

「當初小恩子以為自己搵到歸宿,為對方放棄事業,點知得到咁嘅結局;小恩子唔想再糾纏落去,佢覺得分開都唔緊要,只係曾智明竟然可以完全唔理對仔女,到今時今日仲同佢哋計較生活費,所以佢好傷心。」知情者說。

上週六(二十一日)下午二時,黎瑞恩將早前入住凱悅酒店期間的行裝搬走,在數名酒店職員幫忙下,將六大袋紅白藍膠袋搬上車。

自從鬧婚變開始,黎瑞恩得到不少好友的支持,早前湯寶如及劉小慧等老友,更陪她到泰國散心。

黎瑞恩與十一歲女兒曾凱栭的感情要好,母女間毫無代溝。

黎瑞恩一班朋友包括草蜢等會不時相約她吃飯出席聚會,表現關心。

愛打高爾夫球的黎瑞恩因打波而認識「免稅大王」鄭應南,有指兩人相處投契,關係密切。

20萬點分配

每月 20萬生活費,一般人超級豪華好使!但對零收入、要請工人、一對仔女讀國際學校、交租都冇咗四分一的黎瑞恩來說,七除八扣下,不算好鬆動。

屋租 $55,000

國際學校學費 $15,000×2

補習及課外活動費 $15,000×2

日常生活雜項 $30,000

工人 $6,000

總支出:約$151,000

一個笑話

本刊記者趁機上前,問她有關曾智明拒負責交租一事。

壹:搬咗去比華利山?

黎:係,唔通長時間住喺度(大埔凱悅酒店式住宅)。

壹:有傳聞話你收咗前夫一千萬。

黎:你覺得有冇吖!

壹:新屋係曾生負責俾租?

黎:膝頭對上就俾。

壹:你自己俾屋租?

黎:梗係我自己俾啦。

壹:之前囡囡畢業禮,你同曾生一齊?

黎:我見唔到佢喎。

壹:有報導話你收三千萬復出。

黎:真係多謝大家俾面,到今時今日都有唱片公司肯俾面用三千萬簽我,真係一個笑話。不過好多謝大家鼓勵,我暫時未有呢個諗法,只係想全心全意照顧一對仔女。

開車前,黎瑞恩校低車窗說:「唔該唔好再問我,呢啲咁負面嘅嘢,我唔會再答。」

爆出婚變後,她上好姊妹劉小慧主持的電視節目,被問到前夫是否有第三者,她即時眼紅紅。

未有第三者介入前,黎瑞恩會將一家四口的幸福家庭相放上微博。

去年未爆離婚,黎瑞恩開了兩場慈善演唱會,為長者籌款。

一向人緣甚好的黎瑞恩,雖然退出樂壇多年,但她經常與當年共事的寶麗金戰友聚會,保持友好關係。

婚後相夫教子的黎瑞恩,雖然全面退出,但也會帶住女兒賣旗做善事。

衰收尾

一生一世的時代早已過去,夫妻關係到盡頭只有離婚,繼而爭撫養權、拗贍養費,醜惡人性暴現。

葉蘊儀

13歲出道的葉蘊儀, 95年下嫁玩具商人陳柏浩,後因第三者介入,結束六年婚姻,離婚後,葉蘊儀慘被前夫爆閨房事,對方更唔肯俾贍養費,為搵錢養大一對仔女,葉蘊儀幾乎有乜做乜。

羅霖

去年羅霖和劉坤銘離婚,協議共同撫養三子,及後羅霖曾公開暗示前夫俾唔足贍養費兼倒欠她過百萬,之後劉坤銘更反口力爭三子撫養權,並倒向羅霖追討贍養費。

小雪

與家人台灣旅行期間,小雪老公陳迅元竟與大乳牛蔡慧敏在當地開房,二人 06年離婚,但陳迅元一直拖欠贍養費,經常要出動律師追討; 11年,小雪甚至要申請前夫破產來追贍養費。



鍾意就快D Share啦!
Related Posts Plugin for WordPress, Blogger...