豪語錄
呢期又唔死得 吳孟達
三個月前忽然患了心臟衰竭入了 ICU的吳孟達，說話仍氣若遊絲，坐在冷氣房還不斷冒汗，陪伴前來做訪問的馬來西亞老婆忍不住遞上紙巾讓他印汗。
六十三歲，面容凹陷帶點憔悴，吳孟達連忙解說︰
「今日狀態差啲，昨日去深圳做電視劇宣傳，由八點到夜晚十點先返到香港，忙到飯都無時間食。
太太唔想我來做訪問㗎，但我一早應承你，所以依家用把死嚇死嚇的聲同你講嘢。」
唯獨面對鏡頭，他才精靈醒神，扮鬼扮馬手到拿來，難怪他說怕沒工作會悶死，「要休息半年至九個月，如果個病養唔好，拍戲激動啲興奮啲都唔得，有動作又唔得，咁工作能力就喪失百分之八十。我係覺得無癮，演戲做了廿幾年，唔通叫我日日坐喺度漚到老咩？」一代笑匠幽幽地說。
十五年前的訪問，吳孟達表示最困擾的錢銀、女人通通被他搞掂唔死得，今期患上心臟病，他一樣好彩，大步𨂾過死唔去。
寫個繼承人
吳孟達說，入院住一星期，已急不及待趕回石家莊繼續拍電視劇，我不懷好意以為是錢作怪，達哥說，簽了合約，作為專業演員只是履行責任，「如果唔係有病，拍戲又點會辛苦，我又唔係主角場場有我份。況且我在電影圈廿幾年，我出名捱得，唉，諗唔到突然間有心臟病。
「我唔擔心無嘢撈影響經濟，老實講，我仔女讀大學的錢都預備曬，老婆在馬來西亞又有幾間屋，又有鋪，全部買嘅無欠銀行錢，怕咩？我在大陸的戶口又有相當分量的人民幣現金，都要想方法變回港紙，上面銀行個經理提議我寫個繼承人，我都仲未整。
「我生活又唔奢侈，得閒入嚇馬場同老友吹水，玩得唔大都係三、五千，打嚇麻雀仔，以前我就日日贏，吖，自從醫院出來就連輸六場，降曬班，我話大佬唔好再贏，我有心臟病。」
我會好番
他說話總帶點幽默，心臟病明明已殺到埋身，但他表現得很輕鬆，敍述時七情上面好入戲，「入 ICU時其實我清醒到不得了，心情好平靜，醫生話我心臟歪咗又大咗，被病毒感染令心跳節奏不正常，嚴重起來分分鐘就跪低，仲第一時間叫曬我親人嚟，我心諗有無咁誇張呀？
「我見住 ICU的病人基本上無反應，由出院到入院都同一姿勢，好鬼驚。舊年我才做身體檢查，肝、腎都靚仔到不得了，最擔心都係個肺，食咗四十幾年煙都知唔靚仔，但又完全正常。」
吳孟達現時的狀態是，主要靠食藥及有充足的休息，至於何時再戰江湖，他卻不敢多想，「就係未知要睇情況，一係退休拍嚇廣告、簽個名俾張相做肖像權，一係開刀做手術，但我完全無諗過，我認為我會好番。」
說著說著，電話忽然響起，原來是國內導演找他拍戲，短短兩個小時訪問，他已推掉兩個工作。「仲有部韓國劇我都推，其實都幾誘惑，兩、三個月就撈兩、三嚿（百萬），但依家唔諗啦，先養好個病。」
未滑牙
千禧年後北上拍戲賺人仔，吳孟達承認他片酬絕不便宜，每集閒閒哋收十二、三萬人民幣，當然，他亦交足功課，算是貨真價實。「好彩我仲未滑牙，每場戲都想辦法盡量演好啲。我從來唔帶劇本入片場，因為每晚我都拿住劇本研究。我唔敢講專業，但拍戲永遠無遲到，片場的人覺得我敬業。
「我叫得呢個價，係貴喎，搵家英哥可能唔使呢個價，但我連劇本都唔使睇，對手的對白我都記埋，就係咁簡單。」
十四年沒拍港產片，他最近的《香港仔》及《竊聽風雲 3》，都是捱義氣拍膊頭之作，「片酬真係是但收，差不多是三分之一。大佬呀，除咗中國，無邊度可以有呢個價，我哋呢啲老柴仲想點？」
他直言大陸市場俾得起錢，質素亦不斷超越香港，「《竊聽風雲 3》在香港都叫大製作啩，但比起大陸是小巫見大巫，人哋一個劇組已經百幾人，一個電視真人騷，錄影廠都有四十多部攝影機，呢啲係錢堆砌出來。
「我啱啱入大陸，人哋的水準可能接不上，現在人才濟濟，我剛剛拍完電視劇《十月圍城》，做咗廿幾年未接觸過咁好的劇本，香港無人寫得出。」不過，達哥亦好實際，劇本有幾好，片酬唔到價一樣無偈傾，他笑咪咪話，「例如《我不是明星》都搵我，但達哥有時好衰，唯有講對唔住，無期。」
後生風流
他如此努力搵錢，是否要養三頭家，即是前妻及一對孖女，及後的紅顏知己，和她生的女兒？本來暢所欲言的達哥，即時變得𠵱𠵱哦哦，「啲女都大曬，封利是俾啲女就梗要啦。」
然後，他偷偷打眼色，暗示不要再問，免得坐在身後的太太不高興。未幾，他趁太太去洗手間時補飛說：「孖女都有小朋友，最大的外孫都七歲，每年我媽媽生日、我生日總會坐埋食飯。」
別看吳孟達其貌不揚，後生細仔不知幾風流，正式數數他有三段姻緣，第一任太太麥莉莉替他生了一對孖女，八一年達哥因爛賭欠下三十多萬卡數導致破產，太太都一起共患難，可惜九四年便離婚收場。而達哥未離婚前，又暗撻另一《歡樂今宵》的同事盧少慈，二人共賦同居生埋個女。現任的馬來西亞太太侯珊燕，選過美，細他廿幾歲，婚後替他生了一仔一女。
老來得子，細仔今年都十二歲，自認傳統的達哥當然錫到燶，每年農曆新年必定停工，回馬來西亞交人。每晚他都拖住細仔的手，在床上講古仔，「個仔當我係偶像，他喜歡聽古靈精怪古仔，我講西遊記都有百幾個版本，他聽到津津有味。今次唔開工，咪乘機跟阿仔共聚天倫。」
講足兩小時，講到無乜氣的達哥，提起乖仔，又生猛番。
鬧周星馳
訪問吳孟達，怎可能不提周星馳。
差點入了鬼門關，周星馳有沒有打電話慰問？達哥即時拋個波給太太，「我啲電話交曬俾老婆。」
至於上一次見面，他都不記得何年何月。
「佢之前做天比高主席搞地產，就算電影圈都係投資，太耐無搵都唔知跟他講乜。他身邊都係超級富豪，可能講劉鑾雄啲嘢，大家生活都唔同。
「他一直都很尊重我，從來唔鬧我，只會鬧其他人，無人夠膽做和事老，係得我，但我鬧過他一次，因為他對阿媽無禮貌。
「那時我哋拍《百變星君》由夏威夷回港，在配音時聽見他在電話怨阿媽，好似因為炒樓，他叫媽媽落訂，但星媽猶豫咗一下，無買間屋，之後個價仲升上去。」
不過達哥懂得人情世故，沒有兜口兜面直斥其非，「拉開佢先話佢幾句。其實星仔當我半個阿哥、半個爸爸、甚至老師。」
相信吳孟達是圈中少數，還稱呼周星馳做星仔的人。凡是跟周星馳合作過的人，一般都客氣地稱他為「周生」。
|
鍾意就快D Share啦！
|
|
|
