轉做 sales後，李蘢怡用回自己的真名李宜錚 Oliviia。
探熱針
谷「行」做 OL 李蘢怡：有人覺得我好慘！
曾被捧為新一代性感女神的李蘢怡（ Tiffany），年前與星皓電影解約後，現已轉行做珠寶 sales。
「有時見番啲圈中人，佢哋會露出覺得我好慘嘅樣，勁尷尬咁！我喺呢個圈已經歷咗好多嘢，開心就唔會走！依家我好開心！更加無諗過要入番呢個圈！」 Tiffany說。
車都賣埋
近日在一個珠寶展上，有圈中人撞到已經退出幕前的李蘢怡，昔日性感女神，即使轉行做 OL，仍谷行 36D，落力 sell客。
「娛樂圈唔啱 Tiffany性格，再等落去，都係浪費時間。佢一向對珠寶都有研究，仲讀埋 GIA珠寶鑑證文憑課程，依家喺間珠寶公司做 sales同公關，朝十晚六，又要困喺 office，同以前夜瞓晏起生活好唔同，但佢做得好投入！」 Tiffany友人說。
做 sales已經一年，完全放低昔日生活習慣， Tiffany連七人車也賣掉，每天坐巴士返工。
「冇做娛樂圈之後， Tiffany去咗中大讀 Fashion Design，以前用七人車係方便開工，唔做養車反而煩；嗰段時間佢仲去過檀島見工賣包，諗住兼職賺啲外快， Tiffany咁大個女第一次填履歷見工，雖然 auntie最後都唔俾佢做，但就知 Tiffany決心離開娛樂圈，唔係得個講字。」
唔做幕前，但 Tiffany的狀態跟以前沒有兩樣，出席公司活動，更 set到行。
有米蘢媽
Tiffany父母早年離婚，蘢媽鄭玉而（原名鄭玉嬋）之後再婚，後父是投資老手，兩夫婦高峰期坐擁廿幾個物業。屋企有財力，富貴人脈多，將來 Tiffany賣自家設計珠寶，不愁客路。
出自家設計
連日所見，李蘢怡每日準時一點離開在中環的公司外出與同事一起食快餐，十分規律。上週五（二十日），如常一點外出的她，一個人行去附近華人行，上 GIA報讀珍珠鑑證課程。
「 Tiffany做嗰間珠寶行老闆係以色列人，賣嘅全都係獨一無二款式，佢已經計劃好，讀完珠寶設計文憑後，就試嚇推出自己嘅 design！」
對轉行做 sales， Tiffany並不避忌。「我好開心能夠轉到行，呢個機會唔係人人有，我只想做個普通人。」
有指 Tiffany提前與星皓解約，與當時同公司的傅穎不和有關。
「我唔會不滿人，唔做係因為自己理由，我有個好嘅經理人，可能欠運喺呢個圈，我搵唔到被需要嘅感覺，覺得無機會發揮，咁我都做咗超過十年，唔可能再留喺度等機會！」
唱好劉心悠
唔願提傅穎，但對也是同公司的劉心悠則盛讚。「心悠係我好欣賞嘅人，又靚又聰明，份人仲好好，你從無見過佢有唔好嘅新聞，有時我都羨慕佢有咁多廣告，但佢真係形象健康嘛！依家有人話要搵人去 event，我一定提議搵心悠，唔會諗第二個！」
時至今日， Tiffany偶然亦會撞到圈中人。「好奇怪，佢哋見到我，會露出一種我好慘咁嘅表情，好似覺得乜你冇得做嗱！我想講我喺呢個圈經歷咗好多嘢，依家搵到自己理想，會一路做落去！」
對於將來會否由媽咪打本推出她的珠寶系列， Tiffany強調會以媽咪做目標。
「媽咪都做咗嘢幾十年，有時都覺得佢好辛苦，自己係時候要做番啲嘢！媽咪白手興家，我覺得我唔會做唔到！一步一步嚟」 Tiffany說。
|
鍾意就快D Share啦！
|
|
|
