2014年6月25日 星期三

[FACE 370] 演最低薪校長 千嬅落區玩細路 千嬅,楊千嬅,MF,




FBI

演最低薪校長 千嬅落區玩細路

雙非學童問題未解決,本港學位供不應求,為咗子女學位個個爭崩頭。由執導過多套福音電影的導演關信輝執導嘅新戲《五個小孩的校長》,正正就係改編自「 4500蚊」校長呂麗紅嘅真人真事,仲話要帶出關注小朋友就學機會嘅問題,而戲中靈魂人物,呂校長一角就交由楊千嬅飾演,日前大隊仲預先同戲中一班小朋友進行熱身活動。

《五個小孩的校長》上月開工拍攝,戲中會有 5個小朋友角色,電影公司事前喺 4,000個合資格小朋友中篩選出 10個名額,當中小朋友都係來自基層或少數族裔家庭。拍攝前楊千嬅亦做足功課,拉埋導演同編劇去到社區中心同小朋友進行遊戲,了解佢哋嘅性格習慣。

FBI聽落套戲都幾有意義,原來仲吸引到古天樂演出其中一個角色,古仔同 FBI講:「自己嘅戲份唔多,不過覺得個劇本好感動,真係好想拍呢個故仔,所以唔會介意戲份多少都想參與埋一份。」 FBI心諗,衰在千嬅寶貝仔 Torres得兩歲,仲返緊 playgroup,唔係就可以客串埋一份囉!

楊千嬅喺新戲《五個小孩的校長》飾演呂校長(小圖)。為演好角色,拍戲前同戲中小朋友玩遊戲,玩得熟啲,拍起嚟都易啲

楊千嬅同小朋友玩遊戲,戴上「三啲」眼鏡氹戲中學生,睇嚟榮升媽媽後嘅千嬅對小朋友真係有一手。

千嬅喺小朋友嘅分享環節中,好有耐心咁聽番佢哋嘅心聲,連凳都唔坐,眼定定望實啲小朋友,細路仔拍戲,難搞㗎。

拍攝後,千嬅同導演關信輝企埋一邊傾偈,睇嚇套戲有乜地方可以改善,點先可以更貼近現實!好鬼認真!

古天樂低調做慈善多年,先後喺內地捐建咗 61間學校,今次佢一聽到個故事有意義即刻話要演,片酬當然係講心,唔講金。



鍾意就快D Share啦!
Related Posts Plugin for WordPress, Blogger...