[FACE 370 外地娛樂] f(x) Kryatal 長腿維穩 MF,

身高 165cm、只得 19歲的 Krystal，唔只青春可人，仲有一雙白滑長腿，成功俘虜宅男心。

韓面

f(x) Kryatal　長腿維穩

韓國 K-pop界出名多靚女，好似性感美艷的 4MINUTE主將泫雅、少時最靚成員允兒就五官標緻似公主……講到近期最 hit靚韓妹，必屬同允兒好似樣，來自女團 f(x)的風頭躉 Krystal（鄭秀晶）。

現年 19歲的 Krystal，其實是 K-pop一姐女團少女時代成員 Jessica的親生細妹。長腿 Krystal出道 5年，最近唱歌拍劇起雙飛，仲孖住家姐 Jessica演出真人騷節目《 Jessica& Krystal》，節目大受歡迎。下週 7月 1日， Krystal將率領 f(x)隊員來港演出維穩騷《香港巨蛋音樂節》，先接機再遊行都得啫！

現年 19歲的 Krystal，同家姐 Jessica一樣於美國加州出生。自小講得一口流利英文的 Krystal， 6歲時已同家姐一齊被星探發掘繼而加入韓星夢工場 SM娛樂， Krystal被安排加入 5人女團 f(x)。出道 5年， Krystal除了跟住 f(x)唱歌出碟開騷，個樣生得甜，又有觀眾緣的 Krystal 4年前開始拍劇，去年底更被導演薑信字及富聖哲睇中，邀她加入 hit爆亞洲的韓劇《繼承者們》，飾演刁蠻有錢女， Krystal入型入格的演出，被唔少觀眾大讚。

09年已殺入樂壇的 f(x)，同師姐少女時代一樣，主 sell又唱又跳，隊中以最靚女的 Krystal最受歡迎。 f(x)（紅圈）亦將於下月 1日跟師姐 BoA及師弟組合 Exo等巨星來港演出《香港巨蛋音樂節》，想行 7.1美女計呀？

真人騷入屋

Krystal在 K-pop界已經是一線，但講到真正入屋，一定係最近孖住家姐 Jessica，為韓國收費電視 On Style演出的真人騷節目《 Jessica& Krystal》。難得兩姊妹合體演出，電視台當然隆重其事，專誠搭一間屋給兩姊妹生活，然後將她們一舉一動全部攝入鏡頭。

雖然似係做騷咁做，但因鏡頭全天候跟到足，兩姊妹難免顯露真性情，例如玩到不顧儀態，打打鬧鬧的場面全被清楚捕捉。正因為觀眾鍾意她們夠率真，所以節目出街後大受歡迎，除 Jessica外連帶 Krystal亦入埋屋，人氣再升呢！

真人騷《 Jessica& Krystal》中，鄭氏姊妹對住鏡頭全冇避忌，表現真我。首集， Krystal試過用腳趾夾手提電話畀家姐，雖然好失儀，但觀眾卻覺得佢好可愛。

比 Krystal大 6年的 Jessica，自細已負起做家姐責任，抱住 Krystal照顧，姊妹情深。

入行以來拍過 5套韓劇的 Krystal，去年尾在《繼承者們》中飾演刁蠻有錢女，還與 CNBLUE鼓手敏赫上演咀戲，雖然只屬配角，但一樣大把人讚她做得好。

賣口乖讚家姐

於美國加州出世的 Krystal，講得一口美式英文，前年來港出席《 MAMA》頒獎禮， Krystal在台上以流利英文同港人打招呼。

Jessica與 Krystal同屬 K-pop界數一數二的大美女，雖一直被傳媒拿來作比較，卻無損兩姊妹感情，最近 Krystal便公開大讚家姐：「以前做練習生時，只要講出我係 Jessica妹妹，就會得到好多照顧，佢（ Jessica）係最了解我嘅人。」

鍾意就快D Share啦！

下一篇 》