掃呢頁CODE去手機

2014年7月24日 星期四

[壹週刊 1272] 無面俾 帶挈唱《囍帖街》 謝安琪拒撐 Eric Kwok 謝安琪,M1,




臨出場前, Eric Kwok與大班歌手好友在台下合照。

探熱針

無面俾 帶挈唱《囍帖街》 謝安琪拒撐 Eric Kwok

今年五月,謝安琪加盟北京「華誼兄弟唱片」,放眼大中華市場,事業扶搖直上,講到底,當日無 Eric Kwok作曲的《囍帖街》,就沒有今日的謝安琪,但對方舉行一連三場作品展音樂會,謝安琪卻全程無影,最後要由蘇永康幫手聲演男版《囍帖街》,難怪 Eric在台上語帶無奈說:「阿 Kay(謝安琪)話佢好想嚟!但佢經理人周博賢話夏森美唔俾佢嚟!」

阿 Kay唔俾面, Eric Kwok坦言自己盡了力:「我同佢(謝安琪)有 message,佢話好想嚟!我有親自打俾周博賢,但佢無覆我!後來阿 Kay話接咗嘢做,所以嚟唔到!」

相對有份演出的陳奕迅、李克勤,寧願推 job見財化水,都要上台做嘉賓,俾面又夠義氣。

講心唔講金

《囍帖街》橫掃 08年度樂壇大小頒獎禮,更為阿 Kay擸唔少獎。

作曲人的 Eric Kwok,上個禮拜舉行三場作品展音樂會,但原唱者阿 Kay謝安琪卻全程無到,反而歌神陳奕迅,唱足三場、晚晚唱超過六首歌,仲做埋搞笑環節,由頭撐到尾。

「 Eason年頭知道 Eric會做作品展,二話不說應承做嘉賓,佢工作期表有幾密,大家都估到,但佢講明,點都要遷就 Eric個期,呢啲咪朋友囉!」一名工作人員說。

除了 Eason,梁詠琪、蘇永康、梁漢文等個個唱足三晚,而剛在巴西睇完世界盃的李克勤,亦推掉內地商演趕返香港做嘉賓。

蘇康代唱

「創作人開作品展,主要係靠班歌手撐場演出,同之前 Wyman、 Mark Lui開騷一樣,歌手只會象徵式收利是,呢啲時候,根本唔會計較錢銀,始終遇到一首好歌唔容易,純粹想報答創作人啫!」知情者說。

○八年, Eric的作品產量唔多,當中《囍帖街》能夠突圍而出,對 Eric的事業,絕對意義重大。

「其實○五至○八年, Eric冇乜點寫歌,○八年《囍帖街》唱到街知巷聞,橫掃晒大小頒獎禮,甚至將謝安琪推到做天后,所以 Eric根本無諗過,阿 Kay會唔嚟唱呢首歌!」知情者說。

音樂會以「頒獎禮」形式串連,十首 Eric Kwok「我最喜愛歌曲」,每晚都有些微變動,但三晚都由《囍帖街》成為第一位歌曲。原唱者無影,最後由蘇永康代唱:「做兄弟嘅嘢,兩肋插刀無所謂!」

蘇康幫手寸阿 Kay, Eric見嚟足三晚唱《傷逝》的葉蒨文,台上一時感觸。「有啲人你以為佢一定會嚟,點知佢又唔嚟,有啲人你無諗過佢嚟,佢竟然晚晚都嚟!真係好多謝佢!」

為搞好個騷, Eric Kwok十分緊張,除親自邀請嘉賓,更搵 Hi King排舞。

少有做嘉賓的張學友,亦有現身首場作品展。

雖然只係唱一首歌,葉蒨文撐足三晚,令 Eric相當感動。

李克勤由巴西趕返港,出席 Eric Kwok音樂會。

由頭撐到尾的陳奕迅,半年前已度定期俾老友,尾場更唱足八首歌。

Eric Kwok表示, GiGi早年已用他的作品,儼如帶佢出身。

日日為新戲開工的楊千嬅,亦連做兩場嘉賓。

軟硬任尾場嘉賓外,林海峰還幫手度橋,教 Eric將音樂會以「頒獎禮」做主題。

除了唱歌, Eason更與蘇康、 Edmond、師兄一齊講笑話。

無回覆

完騷後,向 Eric求證阿 Kay無影一事,他無奈說:「我同佢有 message,亦有親自打俾周博賢,但佢無覆我。後尾經我 management同事,知佢嚟唔到,我咪自己打俾阿 Kay囉!佢話佢好想嚟,但因為接咗嘢,所以嚟唔到。(會唔會好遺憾?)最緊要首歌有喺個 show度出現,邊個唱都唔重要。」

謝安琪於七月十八及十九日在廣州有活動,但十七日 Eric頭場,人在香港的她,卻寧願留在家織手繩。

Eric Kwok承認,有親自致電邀請阿 Kay做音樂會嘉賓,可惜最後都唔成事。

不可一世

人紅,是非愈多的謝安琪,多年來與傳媒、唱片公司積落唔少牙齒印。

當紮

08年憑《囍帖街》橫掃四台冠軍歌曲獎的謝安琪,成為環球唱片一姐,收入十級跳,短短一年內更在紅館連開七場個唱。

囂張

升呢天后,謝安琪多次跟傳媒發生衝突,在無綫「四大版稅」事件,帶頭拒絕無綫訪問兼「推咪」;發表「餵仔食屎」論同時,又拒絕做傳媒文字長訪問,其經理人夏森美試過郁手推記者,令 Kay與傳媒關係愈搞愈僵。

解約

與填詞人 Wayman及作曲人 Eric Kwok,一齊憑《囍帖街》攞獎。

入行以來,幾乎跟所有唱片公司不歡而散的她, 11年與環球續約四年,但簽約不久,即向東亞、 BMA、 Neway Star探路,雙方最後在惡劣情況下解約。



鍾意就快D Share啦!