今年年初曾有雜誌影到二人撐枱腳，最近已甚少見兩人同場。《蘋果日報》圖片
封面
23年情轉淡 閉門避朋友 倪震周慧敏分房瞓
愛情長路唔易跑，自 91年周慧敏和倪震相愛開始，分手傳聞傳出多次，雖然二人終在 09年結婚正式成為夫婦，可是 23年來的感情最近出現暗湧，加上有傳倪震近年多次在股壇有上有落，夫妻二人溝通日漸減少，據知二人曾出現分房瞓情況。
上週雖然老婆周慧敏在港，但二人甚少一齊出街，倪震被問到已與老婆分房瞓時只笑說：「邊有咁多間房？」家住過千呎跑馬地三房兩廳豪宅的他，唔通家中貓咪都要瞓房？
拍拖 23年，結婚 5年，周慧敏和倪震可說是同甘共苦，但最近有傳二人感情開始轉淡，加上倪震曾在股壇上損手，有時意見不合下，終令二人有分房瞓情況出現。
唔認炒燶股
週日（ 26日）已經半百的倪震單拖現身接受本刊訪問，聽到在股票場上偶有輸錢即激動回應：「點會！邊個講？邊個講你問番邊個！（上次贏咗成千萬！）我無講過！你問番周顯！（你瘦咗好多！）我 5呎 9， 150磅，我覺得標準（同老婆關係點呀？）當然好（𠵱家分房瞓喎？）邊有咁多房呀？無呀，都係啲唔正確嘅傳聞嚟！」
據知倪震近年性格變得孤僻，但反而 46歲、 04年開始復出娛圈的周慧敏似乎越戰越勇，開過多次個唱，去年更參演九把刀的電影《等一個人咖啡》，除了拍戲花時間，之後港、台兩邊走的宣傳，周慧敏都幾乎個個到齊，上心程度可見一班。
「近年阿 V（周慧敏）同 Joe話題唔多，雖然係同住一間屋，但係 Joe一係掛住睇書，一係就炒股票，佢一玩股票就成個人都好緊張，冇見佢一排成個人瘦晒，又憔悴晒，以前成班朋友上佢哋屋企，佢梗會出嚟一齊傾偈，但𠵱家佢寧願自己鎖埋喺房，有時得番阿 V一個招呼朋友。」據二人身邊密友透露。
傳炒冷門股賺千萬
去年金融專欄作家周顯於報章大爆倪震炒冷門股疑似賺過千萬，雖然當時有網友質疑其可信性，不過倪震炒股進取作風亦令人印象深刻，當時周顯說：「佢連續發咗 2、 30個短訊給我……我只係覺得倪震好好彩，我都覺得隻股票有問題，所以我唔會推介畀人。」
但對於有傳倪震最近於股場損手，周顯至週一（ 27日）截稿前仍未回覆！
同屋異夢
倪震沉醉在股票天地，反而周慧敏不斷出席商演，到美國開巡迴演唱， 06年周慧敏個唱，倪震仍然會扮「周慧豹」（兩人養的愛貓）跟老婆同台，但 11年周慧敏再開個唱時，倪震只做觀眾。周慧敏熱愛睇演唱會，過往倪震都會陪伴在側一齊睇，如今周慧敏睇演唱會的 partner已換成古巨基。
其實二人畢竟共同生活多年，感情深厚，故二人仍共同生活。周慧敏近年頻頻蒲頭，商演亦越接越多，期間收過不少劇本，夫妻感情轉淡要搵工作填補，未嘗是壞事嘅。
獨持新公司
自 04年復出，周慧敏逐步逐步踩番入娛圈，先後出唱片和兩次紅館開個唱，期間又參演過《得閒炒飯》和《等一個人咖啡》，商演次數更加多到數唔晒，終於今年 6月周慧敏以個人名義開設新公司「主意工作室有限公司」。
開新公司咁獨立，做乜唔預埋老公呀？
倪震 23年拖 6女
才子多情，呢句說話真係冇講錯， 89年倪震與周慧敏相識， 91年開始地下情，到 09年正式結婚至今 23年來，二人並非風平浪靜，大部分皆因倪震才子風流，難得阿 V多次原諒。
家有 7貓
眾所周知周慧敏愛貓如命，而「周慧豹」就係周慧敏最愛錫嘅貓仔，曾經倪震就試過捉住阿豹遮住下體影相而被指有虐貓之嫌。 11年阿豹過身，周慧敏未有為家中增加新成員，現仍有 7隻不同品種的貓，當中豬皮和 B仔正是阿豹的親生仔。
|
鍾意就快D Share啦！
|
|
|
