掃呢頁CODE去手機

2014年10月30日 星期四

[壹週刊 - 1286] 觀瀾湖開波 周杰倫報喜  Kenny G收聲 周杰倫,BKD_S,M1,




同你吟一吟

觀瀾湖開波 周杰倫報喜  Kenny G收聲

上個禮拜一連三日舉行嘅「 2014觀瀾湖世界明星賽」,唔少中港台韓美巨星一齊嚟到海南島打高爾夫球,而出發前嚟過香港撐佔中學生嘅美國色士風樂手 Kenny G,去到海南島,唔敢再提佔中,仲响個人社交網站 twitter澄清,自己當日係以遊客身份路過,被人利用撐佔中喎!

搬龍門快過吹色士風,都係有份嚟做推廣大使身嘅周杰倫最大方,提到有傳林志玲收到佢張結婚請帖,個個諗住佢同𡃁模女友昆凌好事近,記者索性同佢講恭喜,平日唔肯講感情事嘅周董忽然好大方:「希望在我生日之前,因為過生日後就 36歲,我想有一個很棒的家庭,會有小朋友,想小周杰倫來看我演唱會,所以不能晚婚。」

明年 1月 18日就係周董 36歲生日,睇嚟就快有好消息公布,其實感情同言論,個個都有權自由發表,最緊要係光明磊落啫!

周董大方講女友昆凌,仲話想明年一月 36歲生日前娶老婆,目的係想盡快做老豆。

周董愛得光明磊落,反而原本親身嚟過香港撐佔中學生嘅 Kenny G,去到海南島,即刻收聲兼轉軚,人民幣魔力,非同小可!

丁生丁太都有出席活動,丁子高就同摩根費曼打招呼,而楊千嬅就捉住「美國隊長」基斯伊雲斯合照。

有份比賽嘅荷李活女星妮歌潔曼,雖然最尾一日賽事落住雨,但妮歌心情同佢塊膠面一樣無受影響,佢仲俾摩根費曼攬實吹水。

「被退出」少女時代嘅 Jessica,首次以個人身份出活動,更大方提起佢同 K先生嘅戀情,雖然雙方未有結婚計劃,但承認自己同其他女仔一樣咁恨嫁。

十幾年冇打過高爾夫球,吳尊要响比賽前,搵教練惡補球技。



鍾意就快D Share啦!