2015年1月30日 星期五

[忽然1周 - 1018] 離 EXO冇自信 怕醜鹿晗 唔俾女埋身 EXO,鹿晗,MW,




鹿晗對住「嫲嫲」楊子姍唔只面紅咁簡單,叫企埋少少,佢哋同時爆笑,個身仲硬晒。鹿晗真係怕醜到咁?

媽咪姐

離 EXO冇自信 怕醜鹿晗 唔俾女埋身

韓國男團 EXO前成員鹿晗,離隊前拍緊嘅電影《重返 20歲》,話咁快拍完上映喇!劇情講飾演嫲嫲嘅楊子姍(拍過《閨蜜》,係趙薇愛將嚟㗎!)忽然由 70歲變番 20歲少女,仲俾飾演孫仔嘅鹿晗追求,好 fantasy呀!媽咪姐咁跟貼韓風,趁鹿晗嚟香港宣傳,梗要去八吓

吖,導演陳正道話用鹿晗做男主角,係貪佢人氣,唔求演技。訪問嗰陣,鹿晗果然一句起兩句止,似乎唔夠自信。問佢覺得自己做成點?佢即刻射波:「導演你說說吧!」仲話:「唱歌跳舞對我比較舒服吧,因為是最擅長,演戲需要再加強,(冇隊友傍住)我每次都很緊張。」

「嫲嫲」楊子姍仲爆料,話鹿晗一掂就耳仔紅,特別怕醜。影相嗰陣,楊子姍未掂到佢,鹿晗唔只個身硬,連表情都梗咗,睇佢真係好怕異性喎!查實子姍姐姐都當佢係孫,又使乜驚成咁呢?

嚟自強國嘅鹿晗,雖然走咗轉韓國,氣質變得韓氣咗。之但係睇佢小時候個樣,一睇就知 made in邊度。

咪以為鹿晗脫離咗 EXO,就會變得平易近人咗。錯晒!簽名要 check過簽乜外,寫名咁簡單都話唔得!

鹿晗同女主角楊子姍嚟香港宣傳新片,現場有九成人都係為咗鹿晗而嚟。但呢位 fans咁好運抽中上台,都冇把握機會親親偶像,蝕呀!

楊子姍話同鹿晗合作,唔擔心佢啲 fans討厭自己,因為大家已代入角色,覺得佢係鹿晗嫲嫲,好尊敬佢喎!如果係演情侶,會有亂倫感覺,接受唔到㗎。

上年 5月, EXO爆完 Kris離隊,又到鹿晗喺 10月申請「合約無效」。佢哋嚟緊會一齊出席央視《春晚》,鹿晗仲話係秘密,問大家點解會知喎!

「強人」退團潮

唔少喺韓國發展嘅強國同胞,最後都提出同公司解約。好似鹿晗喺 EXO嘅隊友 Kris,同埋 Super Junior嘅韓庚咁,解約後返強國拍戲,最多咪唔再去韓國,「國情」嚟㗎!

韓庚喺 09年底向韓國法院申請「專屬合約無效」,搞到唔可以再返韓國。直到去年底,接拍中韓電影《夏有喬木,雅望天堂》,同 Kris仲有韓國演員周元合作。

Kris(吳亦凡)同鹿晗係 EXO出晒名嘅「富二代」,上年提出解約,未等判決已返強國拍戲。比起佢啲前輩俾公司封殺, Kris嘅舉動型好多。

流感勁啫,都唔使企咁開嘛?

鍾意就快D Share啦!
Related Posts Plugin for WordPress, Blogger...