跟天后老婆楊千嬅同樣是搏殺型的丁子高，不靠父蔭，寧願自己創業。
探熱針
捉到路 丁子高賣 BB家品
雖然有個富貴老豆，但丁子高未有繼承父業，寧願自組市場策劃公關公司，自己江山自己打。 RM Workshop成立三年，生意已上軌道，近日丁子高再有新大計，睇準天下父母肯為兒女大灑金錢的心態，決定開採這個金礦，更成功攞到一個德國品牌的大中華區代理權，年中將推出一系列 BB家品搶灘。
陳慧琳老公帶挈
丁子高自立門戶已經三年，做公關公司做得有聲有色，客源穩定的他，依然滿腦生意大計。
「阿 Real（丁子高）細細個睇住爹哋白手興家，所以佢都要憑自己對手打拼未來，就算入行做公關，但好早佢就明白， PR公司只係踏台。」丁子高身邊人說。
幾經考慮，丁子高終於搵到商機，決定進軍 BB市場。
「 Torres出世之後，因為個仔，阿 Real開始留意 BB家品，為人父母，無論幾唔捨得買嘢俾自己，一定捨得花錢喺小朋友身上，一張高級 BB床可以賣過萬蚊，依然大把人買，阿 Real將心比己，開始構思搞 BB用品生意，後來佢識咗 Kelly老公 Alex，一個搞開 BB用品生意嘅朋友，大家一拍即合，決定一齊合作。」
受囝囝啟發
籌備兩年，近日丁子高成功攞到德國一個 BB家品的大中華代理權，會將品牌推到亞洲不同地區。
「為咗攞呢個代理權，過去一年阿 Real飛咗幾次德國，終於俾佢傾掂同品牌簽合約，應該年中就會陸續推出市場。除咗香港，仲會推埋去中國、台灣同日本，嚟緊會去海外做展銷。」
對於搞 BB家品生意，丁子高說一切正在籌備階段。
「係攞咗個德國 BB家品嘅大中華區代理權，應該會先重點推出一個產品，其他慢慢嚟！ Torres啟發到我， BB家品的確係個好大嘅市場，我希望產品唔單只入大陸，仲會去其他國家。今年會更加忙，因為要不停飛！」丁子高說。
寧願捱世界
現年 35歲的丁子高，曾以 VRF組合加入樂壇，當時已傳他是富二代，直至與楊千嬅秘婚，才被踢爆父親丁永方是上海大業主，在上海南區開設三間製衣廠及一間紙箱廠，廠房面積達過百畝，身家以億計，丁父亦一直希望丁子高能繼承衣鉢。
○三年，丁子高加入 IPS公關公司工作，並火速成為老闆 Peter Wong得力助手，一一年他離巢自組 RM Workshop，至今手上有唔少大客。
|
鍾意就快D Share啦！
|
|
|
