爆壹爆
港女轉飲威士忌
呢排江湖潮興威士忌，唔玩紅酒，睇來爆哥專欄右上角個頭像都要改改。自從日本山崎 Single Malt Whisky Sherry Cask 2013被評為全球最好威士忌後，各界老友都追飲日本威士忌。有人去到日本機場免稅店，見到高年份日本威士忌幾乎被香港和強國人搶晒。
上週五晚，金鐘有個威士忌拍賣會，爆哥又點會執輸，一於跟朋友去見識吓。見到每支酒唔夠五分鐘就成交，最貴嗰支輕井澤，要成廿五萬港幣。拍賣會嘅靚女評酒家 Katherine同爆哥講，原來近年多咗好多港女飲日本威士忌，「佢哋起初鍾意『響 12年』，柔和啲似干邑，聞落有種甜花香氣，之後就上癮愈飲愈濃味，如山崎 Sherry Cask。」 Katherine仲爆出港女棄紅白酒，轉飲威士忌嘅原因：「紅酒好難自己飲晒一支，威士忌開咗可以自己一個人慢慢飲晒，鍾意幾時飲都得。」
屋邨鏢王冧師奶
講起掟鏢，好多人即刻聯想到酒吧邊掟、邊食煙飲酒講粗口。不過，原來响將軍澳翠林邨一間酒樓，都有得掟鏢，仲要係全場無酒兼禁煙。爆哥去到，發現負責人係只得二十歲嘅 Aaron，佢話好鍾意掟鏢，咁啱父母開嘅酒樓有地方，於是就改建成掟鏢場。
掟鏢吸引到後生仔唔出奇，但奇就奇在掟到拍晒手掌嘅，竟然有師奶同阿婆。今年六十五歲嘅西施，係翠林邨老街坊，呢排開始咗掟鏢，仲話掟到身體都好埋添。「（未玩前）有時頭痛、肚痛、手腳痛，而家玩咗一段時間，腳都唔係太痛喇。」西施話口未完，又掟中紅心喇，開心到佢四萬咁口。所以話人活得開心，身體都健康得多。
水房高層頭都痕
近排江湖多事，最紅當然係水房內訌，高佬發一幫人馬狙擊業仔時，誤中咗勝和元老雞腳黑坐駕，之前爆哥已同大家講過，不過江湖友人話水房高層業仔，近日最頭痕唔係因為高佬發狙擊，而係下月開審嘅洗黑錢案。古惑仔而家最驚就係俾警方告洗黑錢，呢個控罪好嚴重，以往績計，打甩機會唔大，加上又要俾人充公家產，都咪話唔傷。
江湖友人仲話，水房百花蛇捧業仔出嚟爭坐館，照計業仔有呢支大水喉射住，走勢應不錯，但有人又走去搞外圍馬，亦因此而被警方跟到及告埋佢洗黑錢，新正頭，業仔煩官非外，仲要應付同門內訌，都咪話唔頭痕。江湖消息話，業仔女友可能見佢太煩，索性走去澳洲散心，所以話大哥唔易做，江湖飯難食。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|
