Isabella同 Baby John都是慢熱一族，勝在大家年紀相若又愛話劇，拍戲先至有交流。
探熱針
賀歲片 硬撐 40小時 Isabella打天才波
去年吳君如在《金雞 sss》頂住 38G奶，捧走四千萬票房，成為港產賀歲片 No.1。要再下一城，三姑（君如暱稱）決定將大波變平胸扮男人拍《 12金鴨》，唯一不變，碌爆人情咭出動群星客串，連身在加拿大湊仔的梁洛施都有俾面。
Isabella坐完三十幾個鐘飛機，一掂地就埋位同 Babyjohn（蔡瀚億）拍跳舞戲，零準備靠打天才波，開工十個鐘，拍到第二朝才收工， 26歲，頂得住！
埋位真喊
去年六月，梁洛施同恩師詹瑞文合演舞台劇《快樂勿語》作為復出頭炮，豈料反應麻麻， Isabella即時叫停接洽中的工作，返加拿大湊仔。抖足半年，吳君如拍門邀演賀歲片《 12金鴨》，未試過賀歲檔硬砌的 Isabella一口應承，再為復出試水溫。
身兼監製的吳君如特別安排 Isabella在片中飾演 YoYo一角。
「呢個角色真係為 Bella度身訂造，希望盡我所能，拍到佢有咁靚得咁靚，唔係花瓶，有得發揮。」吳君如說。
Isabella埋位當晚，吳君如本來可以一早收工走人，但為了遠道而來幫手的 Isabella，雙眼攰到得番一條線的三姑，仍留守片場陪開工。「 Bella同呢度啲人唔熟，點都要留低陪吓佢！」
晚上十一時，剛落機的 Isabella連行李踩去現場，同對手 Babyjohn開工拍跳舞戲，沒有跳舞底又零準備， Isabella唯有向拍過《狂舞派》的拍檔求救，點知對方都係水軍一名。
「我都無跳舞底㗎，之前拍《狂舞派》都係開工前一個月雞精班速成，導演（鄒凱光）無特別指示，自由發揮」 Babyjohn說。
同 Babyjohn初次合作，但兩人很快便搵到默契，停工半年的 Isabella亦 keep得到，其中一場傷感戲，唔使借助眼藥水，一 roll機已經流到真眼淚，兩 take收貨。落機通宵直踩到翌日朝九點，連同三十幾個鐘機程， Isabella連踩超過四十小時。
為 Eason再開機
而由《金雞》開始，到《金雞 sss》都傾力支持的陳奕迅，因為近年要做「陳永安」，逢五、六、日北上巡迴，一直就唔啱時間幫《 12金鴨》埋位；直到電影煞科，三姑同 Eason飯聚，席間， Eason說：「我忙完，你已經拍晒，唔係實抽時間同你拍番場。」
Eason一言，君如一鞭！《 12金鴨》專誠為 Eason再埋班，出半日通告，吹神落場做漏口髮型師，同君如做對手，片段以 bonus track形式播出。
無大陸市場，要觀眾幫幫手的《 12金鴨》，人強馬壯！
|
鍾意就快D Share啦！
|
|
|
