上週日（ 8/2），求婚成功的 Eddie帶準老婆朱慧敏到淺水灣酒店睇結婚場地。
探熱針
外母墳前求婚 Eddie：照顧朱慧敏一世
33歲的朱慧敏，與 EO2成員 Eddie（彭懷安）地下情三年，直至去年泊住上開餐廳，感情才正式浮面；近日朱慧敏更被發現身形突然膨脹，傳出有餡要趕住結婚。
雖然兩人否認搞出人命，但一直有結婚打算的 Eddie，上月就度好一條絕橋：帶女友到外母墳前，向對方求婚，並許下照顧一世承諾，終於得到朱慧敏 say yes答應。
冧死人
與 Eddie拍住搞食肆，夫唱婦隨的朱慧敏，對男友被網民踢爆夜店與韓妹把酒談心，又翻炒兩年前拖女夜蒲緋聞，仍擺出一副打風都打唔甩的姿態，投對方信任一票。
朱慧敏咁定，皆因今年初已獲男友派晒定心丸。
手揸四間「華星」餐廳的 Eddie，決定向拍拖三年的朱慧敏「找數」。為求一舉成功， Eddie揀在外母墳前求婚，向女友許下照顧一世承諾，令一直跟母親相依為命，○五年母親因乳癌病逝，無依多年的朱慧敏冇得 say no，爆！
「 Queenie都覺得 Eddie有啲古怪，成日問住佢幾時去拜 auntie（朱母）。上個月初 Eddie就對住 auntie個墓碑講，會好好照顧 Queenie一世，會好錫佢，叫 auntie放心，講完就攞咗隻鑽石戒指出嚟求婚；雖然 Queenie講過自己唔鍾意男友當住好多人面前同佢求婚，但真係冇諗過喺墳場囉！不過嗰刻真係好感動， Queenie一直好遺憾媽咪唔可以睇住佢出嫁，佢好明白 Eddie揀喺媽咪墳前求婚嘅用意。」知情者說。
擺五十圍
最近朱慧敏被影到睇婦科，身材又突然吹脹，於是被傳有餡。但據了解，墳場求婚後，朱慧敏即搵老友蘇民峰擇好日子，二人婚期已定於明年初，堅持娶老婆要大搞的 Eddie，已開始拖埋準老婆四圍睇場地。
「原本 Queenie話旅行結婚，但 Eddie話今次係自己一生人最大成就，結婚開心事唔可以低調，至少擺五十圍。早排佢哋去過 Country club睇場，因為 Queenie鍾意戶外婚宴。
「我哋成班朋友都有問過究竟係咪『搞出人命』？佢哋話做足安全措施，唔會有意外。」知情者說。
設宴提親
上週六（二月七日）晚， Eddie約了女家親屬，在灣仔君悅酒店的扒房飯聚見面，正式向女友的親人提親。翌日，兩人再拍拖到淺水灣酒店睇結婚場地，適逢有婚宴進行中，讓他們可以現場取經。
對結婚一事， Eddie承認婚期已定在明年初，但否認女友有咗。「佢日日落鋪頭打躉試菜，食到個肚腩凸晒，絕對唔係有 BB。」
至於選擇墳場求婚， Eddie解釋說：「 Queenie一直當佢媽咪係偶像，所以想呢個重要時刻（求婚），對住佢心目中重要嘅人做重要嘅事。不過可能太重口味，嚇咗佢一跳，過程唔算十足成功，所以遲啲都要補番少少飛，補番個求婚浪漫版。」
羊年喜事多
由去年開始，娛樂圈喜事浪接浪，繼官恩娜、吳雨霏、王祖藍等人先後結婚，踏入羊年，亦有不少圈中情侶拉埋天窗，恭喜、恭喜！
章子怡 汪峰
二月初，汪峰在女友章子怡的 36歲生日派對上，安排了一部白色的飛行器，把從英國訂製的 9.15卡巨型求婚鑽戒送到女友手上，再加上紅寶石鑲鑽手鏈，結果求婚成功。
|
鍾意就快D Share啦！
|
|
|
