2015年2月19日 星期四

[壹週刊 - 1302] 劉華犯太歲 七人護駕落花墟 朱麗倩擺陣化煞 朱麗倩,劉德華,劉華,M1,




踏入乙未羊年,屬牛的劉華沖太歲,將家居布置得充滿節日氣氛,有助化煞。

娛頭

劉華犯太歲 七人護駕落花墟 朱麗倩擺陣化煞

農曆年前夕,不少「一家之煮」都要爭取時間四出辦年貨,就連深居簡出的天王嫂朱麗倩,即使有外傭、保鏢代勞,華嫂都堅持自己嚟!鑑於生肖屬牛的劉華羊年沖正太歲,朱麗倩更加緊張,親自殺落插針都插唔入的旺角花墟,購買賀年裝飾及風水擺設,幫老公化煞。

當日有胞妹朱麗華再加三名親友及兩個保鏢加司機,七人護駕,連掃多袋裝飾及擺設,由保鏢分批放上車。

為屋企、為老公,朱麗倩做足一百二十分好老婆。

逼入花墟

臨近新年,旺角花墟由早到晚都出現人車爭路情況,舉步難行。但平日深居簡出的天王嫂朱麗倩,逼都要去一轉!黃昏六時,素顏戴口罩的華嫂殺落花墟,在胞妹朱麗華、三名親友以及兩名保鏢及司機陪同出動買年貨。

店員、客人各有各忙,加上朱麗倩打扮樸素,完全無人發現天王嫂大駕光臨;反而同行保鏢大為緊張,只要有人行近劉太身邊,定必充滿殺氣「睥到行」。

孖住胞妹同親友在店內巡圈,朱麗倩睇中收銀處旁邊的字畫,其中對「三羊開泰」同「招財進寶」兩幅特別喜歡,手指指以一口馬拉音廣東話同胞妹說:「可以兩邊四個角咁擺!」

胞妹示意店員攞年畫,對方再確認一次:「要左面(三羊開泰)嗰張?」朱麗倩馬上更正:「 No!我要『招財進寶』,四張唔該!」

朱麗倩對和合二仙的招財進寶年畫愛不釋手,一口氣購入四幅。

臨走前胞妹朱麗華𥄫中金豬賀年飾物盒,好睇唔好用,最終忍手冇買。

有保鏢(箭嘴)傍實,朱麗倩仍堅持自己的事自己做,將不合心水嘅貨物親自放回貨架。

打扮樸素的朱麗倩在穿紅冷衫的保鏢同親友護送下,過馬路上七人車離開。

其中一名保鏢分批將朱麗倩的戰利品搬上車。

老公犯羊

上月中劉華開始為三月上畫的《失孤》在北京出席電影發布會。

劉華生肖屬牛,與羊相沖,據堪輿學家麥玲玲表示,肖牛者家居不宜擺放有關「羊」的任何擺設,難怪天王嫂如此緊張!

買完年畫,再去揀剪紙圖案掛飾,由於有多種尺寸選擇,朱麗倩一時間無從入手,好在胞妹醒目:「呢個 size得」華嫂二話不說放入購物籃,再去睇其他新年飾品。

朱麗倩忘形購物,一左一右的保鏢,則每分每秒𥄫實身邊陌生人。一行七人在店內流連個多小時,朱麗倩終於買夠走人,保鏢在人群中開路,過馬路時,朱麗倩下意識垂低頭,避開途人目光,之後急步行去上車離開。

牛羊相沖

踏入羊年,生肖屬牛的劉華沖正太歲,據堪輿學家麥玲玲表示,傳統上屬牛人在十二生肖當中變化特別多、欠缺穩定性,尤其要注意身體健康問題,為避免沖太歲,可利用喜事沖喜,例如結婚、添丁、買樓等。

家居布置方面亦要留心,因為牛羊相沖,應避免買有個「羊」字或發音相近的揮春或年畫,如「喜氣洋洋」、「五羊獻瑞」等,可主力買旺財的物品布置家居。至於藝人,應多出外走動,但要注意腳部容易扭傷。

沖太歲家宅運同樣不能忽視,不妨裝修居所、搬遷或換傢俬,盡量避免參加喜宴、探病問喪等活動,投資方面更加要謹慎保守。

抽獎攞禮券

劉華身價二千五百萬人仔起跳,即使老公有本事累積多幾個零,朱麗倩依然故我,過着簡樸生活。

月前,華嫂趁減價清貨優惠,孖住保鏢現身油麻地永安百貨執平嘢。當日下午四時,朱麗倩坐的七人車在百貨公司卸貨區出入口停低,保鏢落車先視察四周環境,留在車上傾住電話等的朱麗倩,十分鐘後戴住口罩,落車行入百貨公司,明顯去慣去熟的她,坐電梯先到五樓的家品部揀廁所刷。由於是閒日,百貨公司內人流不多,但華嫂依然高度戒備,一對眼珠周圍碌。

揀完廁所刷,轉去搵保暖杯,細細聲問店員:「個杯可以暖幾多個鐘?」決定買!準備行去收銀處時,見到推銷員示範使用新款生鐵鑊,朱麗倩同普羅 C9一樣,停低睇,又跟店員訴苦:「我屋企隻鑊好易燶!」想老公同囡囡食得健康,朱麗倩拍板買下中國製、價值$698的「天上野」納米生鐵皇,抵!

一手戰利品仲未夠,朱麗倩再踩落地庫超市,掃埋台灣食品。臨走前,朱麗倩無蝕底,參加百貨公司舉行的現金禮券抽獎,雖然面額最多得一百元,但天王嫂一樣抽得好開心。

離開前,記者上前拍照,朱麗倩反應錯愕,極速避開鏡頭上車。

月前朱麗倩趁百貨公司大減價狂掃平貨,由保鏢幫手攞上車。

買到有得抽獎的朱麗倩,親自抽獎碰運氣。

俾錢經過示範攤檔,朱麗倩𥄫中七百元有找的生鐵鑊。

區區一個廁所刷,由揀款到俾錢,朱麗倩都一手包辦,絕不假手於人。

掃完減價貨,朱麗倩再殺落超市,捧走一大袋台灣食品。

慳家天王嫂

揸住幾億物業,但貴為天王嫂的朱麗倩,仍然知慳識儉,唔平唔買,幾乎與名牌絕緣。

12蚊抽濕器

06年,被拍到在旺角一家雜貨鋪買抽濕器,華嫂逐個牌子、價錢做比較,最終買入一排三盒裝、做緊特價 12蚊的防潮抽濕器。

平民時裝店

10年聖誕節前夕置新裝,朱麗倩選擇到平民化的 Uniqlo買衫,每件百零二百蚊有交易,買到大袋細袋,滿載而歸。

買餸逼街市

明星買餸愛到大型超市,但朱麗倩只愛逼街市。 10年被發現到九龍城街市,在師奶堆中為準備出發內地拍戲的劉華買定幾箱麵,之後再到北角街市凍肉鋪買魚蛋牛丸等火鍋料食材。

IKEA買家品

去年,朱麗倩為寶貝女劉向蕙添置家具,帶埋保鏢到大眾化的傢俬店 IKEA,在兒童家品部買寢具及床單。

難捨愛女

家有賢妻愛女,勤力如牛的劉華近年刻意減產,抽更多時間陪家人。

「以前劉華喺香港,一定搵朋友碌 lane(打保齡),而家除非係開工,否則佢唔捨得離開間屋,無時無刻都黐住個女,有時要返公司開會,都帶囡囡一齊。」劉華身邊人說。

堅持不讓女兒向蕙曝光的劉華,為免寶貝女受到騷擾,就算大時大節有家庭聚會,也嚴選場地,如非會員不招待的私人會所。去年聖誕節,就有人目睹劉華一家三口,同家人到九龍塘會飲茶,其時更有七個保鏢傍到實。

稍後將要為春晚做表演嘉賓,又要為三月上畫的新片《失孤》做宣傳,劉華有賢妻朱麗倩持家照顧女兒,完全放心。

月初到台灣公幹返港的劉華,主動同記者揮手打招呼。

同老婆一樣愛事事親力親為的劉華,親自拖喼返港,拖喼更是無印良品貨色,二千五百元有找,好平實。

少有孖咇出席公開場合的劉華伉儷,對上一次已是去年一月,到廣州出席粵劇名伶紅線女的遺體告別儀式。

在《失孤》扮演農民的劉華,留到成面鬚,連食飯都要踎,入型入格。

十年沒有被點燈做春晚的劉華,今年再度入選,○五年他穿上長衫獻唱《恭喜發財》。

家有賢妻

成功男士背後總有個好女人,圈中亦有唔少賢妻典範。

劉青雲

結婚十七年,劉青雲、郭藹明一直是圈中模範夫婦。去年劉青雲因拍戲太投入搞到情緒出問題,郭藹明寸步不離陪埋出埠照顧。雖然老公搵到,但郭藹明均以素顏平民牌子出動,比起其他星太,低調得多。

黎耀祥

黎耀祥同太太 Julia結婚 20年,黎太一直身兼多職,要照顧兒子黎正橋外,更兼任老公經理人及助手,平日無論拍外景或出埠, Julia都跟足。

周潤發

身家億億聲的周潤發,生活一向平民化,發嫂亦出名慳家,平日衣著樸素,又會親自落九龍城買餸煮飯,打理家中大小事務外,發嫂仲要幫老公搞合約和理財,鐵人一樣。

鍾意就快D Share啦!
Related Posts Plugin for WordPress, Blogger...