李思欣的做手同唱腔，拍得住啲大老倌。
娛樂喧
李思欣處女舞台劇唱粵曲 單立文爆肚 艾威做軍師
離開大台接近一年的李思欣，繼開火鍋館及保齡球場後，又以代言人及股東身份，發展有機水耕菜生意，瓣數多多。
近日她更參演舞台劇《嬉春酒店》，好戲之人如艾威、單立文及伍詠薇等亦同台演出。李思欣在處女舞台劇中更會以平喉唱粵曲〈帝女花〉及〈紫釵記〉，歌詞改了現代版，她對演出十分緊張，搵粵劇老師學唱功及做手。記者直擊她上堂學呼吸、咬字及走位，新手的她有板有眼，甚有功架。
《嬉春酒店》於 3月 20日公演，首次演出舞台劇的李思欣甚為緊張。雖然戲份不多，與譚凱琪、李綺雯及梁嘉琪飾演四姊妹，艾威飾演她們的父親，不過，李思欣要在劇中唱粵曲，有一定難度。
早前，她抽空上堂，雖然有唱歌根底，但粵曲與流行曲是兩碼子事，她不敢掉以輕心，「我有少少懶音，本身要改善。唱粵曲更加要字正腔圓，所以難上難。加上呼吸位同唱流行曲唔同，所以老師要我企埋牆，背住鏡學呼吸，連嘴形都要練，老師要我有共鳴感。」
其實，李思欣唱〈帝女花〉是平喉（即男聲），〈紫釵記〉則因應劇情需要，改編成「鬧鬼版」。她說：「我哋四姊妹一起唱〈紫釵記〉，係搞笑版多啲。不過要四個人夾就有難度，至於唱平喉，雖然可以用真聲，但仲要配合走位同手勢，兼顧嘅嘢好多。」
艾威做發哥角色
不足一個月便要公演，李思欣每星期除了學唱粵曲外，也要抽空排練。劇中李思欣除了與艾威有對手戲外，更與單立文、伍詠薇、林嘉華同場演出。談到綵排趣事：「豹哥（單立文）次次都爆肚，同佢對稿要打醒十二分精神。而且舞台劇現場感好重，艾威俾咗好多意見，同佢哋（指前輩）綵排好有得着。」
問番豹哥，他說：「依家有四個 project做緊，比較辛苦。其實我都係首次做舞台劇，都係摸索中。舞台劇講求連貫性，要配合全部對白唔可以 NG，我哋成班演員都係電視劇出身，希望做到平衡及中和嘅感覺。」艾威則說：「同佢哋（指後輩）綵排充滿活力，將我哋平均年齡拉低。我做嘅角色廿年前發哥（周潤發）做過，唔怕貨比貨，輸俾發哥係應該。」
豹哥伍姑娘演夫妻
同樣是初演舞台劇的伍詠薇則說：「今次嘅 chemistry（化學）作用好好。我同豹哥飾演夫婦，不過佢走去追飾演賢良淑德嘅江美儀，所以綵排時大家都會度啲新嘢出來。」
另外，李思欣近日代言水耕菜，不時會到農場視察。她說：「呢個係離開大台後首個廣告，自己又有股份，所以會特別落力。做咗代言後先知做農夫係『粒粒皆辛苦』，雖然過程辛苦，但我當做運動 keep fit囉。」
《嬉春酒店》講啲乜?
建築師陶花琿（單立文）一向在家中冇地位，連妹仔懷春（陳彥行）都看不起他。花琿對好友戴年業（林嘉華）之妻潔貞（江美儀），心存非份之想。潔貞亦覺得丈夫不解溫柔，常與其拗撬。花琿便乘虛而入，引誘潔貞到「嬉春酒店」偷情。與此同時，年業視察一間鬧鬼酒店，原來鬧鬼酒店是嬉春酒店，眾人同時入住，加上酒店鬧鬼，掃黃組來掃蕩，陰差陽錯令笑料連珠炮發。
中途出家
粵曲一向予人難度甚高，而且事前一定要做足準備功夫，不少藝人由唱流行曲進而唱粵曲，殺出另一條血路。
胡美儀 粵曲中堅
入行接近四十年，灌錄唱片種類多不勝數，包括傳統粵曲，而且她活躍於粵調文化藝術，故有「新派粵調天后」之美譽。近年她拓展粵曲事業，常在演唱會中唱經典粵曲，如〈平貴別窰〉、〈唐伯虎點秋香〉、〈幽媾〉等。
|
鍾意就快D Share啦！
|
|
|
