2015年3月6日 星期五

歸港再開酒吧 喬寶寶印度擺百圍慶銀婚 [忽然1周 - 1023] 喬寶寶,MW,




喬寶寶一家四口與喬母(右一),齊齊穿上傳統服飾在金寺前合照。

娛樂喧

歸港再開酒吧 喬寶寶印度擺百圍慶銀婚

喬寶寶百足咁多爪,多年來密密登台,經營酒吧、單車及食店生意,無非為應付細仔龐大醫療費。不過 2012年因喬嫂嫂未能獲香港居留權,喬寶寶要陪家人去英國生活,故要結束香港所有生意及事業。

不過,近日太太搞掂居留權,喬寶寶可以回港工作,令事業再露曙光,加上細仔 Arvin的脊椎去年尾於蘇格蘭動手術後已可行動自如,而大仔 Inderpal又開始出來工作養家。喜事重重下,喬寶寶決定二月尾舉家返印度,筵開百席慶祝「銀婚」,花費達廿萬。

今年二月尾,喬寶寶帶同喬嫂嫂及兩個囝囝返印度慶祝銀婚廿五周年,一家穿上印度傳統服飾,筵開百席與親友一起享受傳統印度餐,現場氣氛熱鬧。在影片中,喬寶寶充當攝影師,問大仔 Inderpal有冇賀禮送俾自己?大仔一啲都唔俾面,笑住寸老竇:「我估唔到我老母可以同你捱到廿五年囉,喬寶寶!」而 12歲的細仔 Arvin難得由英國返印度,亦立即按印度傳統去金寺沐浴聖水,祈求身體健康。

印度的金寺有五百多年歷史,傳說接觸河水後百病均可痊癒,細仔 Arvin做完手術回印度即在河中洗澡,希望身體健康。

一家四口享受銀婚宴的美食,當中都是以咖喱為主。

喬寶寶舉起蠟燭台,是印度人在喜慶活動中必做的動作,寓意接受現場親友的祝福。

三百萬醫療費

其實 Arvin在港期間,喬寶寶為醫好他的軟骨病勞心勞力,花了 3百萬醫療費。現在總算雨過天青,去年九月細仔在蘇格蘭做了手術,在腳內鑲了鐵片,雖然現在仍要食藥,但起碼行動自如,可以做番個普通的小朋友。「喬寶寶個細仔喺蘇格蘭出世,初時唔知乜事,只知雙腳冇力行唔到,喺香港睇咗八年醫生都搵唔到病因。最終喺 2012年去蘇格蘭睇咗兩年醫生,發現腳筋生長得快過骨影響行路,舊年先做手術,鐵片 6年後取出,理論上可以完全康復。」知情者說。

細仔健康問題解決,大仔又大學畢業,令喬寶寶鬆一口氣,故上個月他便返印度慶祝銀婚,花費廿萬也在所不計。

落場招客

喬寶寶身為酒吧老闆,中午時份落場巡視,更親自傳菜招呼客人,親力親為。

喬寶寶行入廚房檢查食物,更吩咐員工要重視食物衞生及品質。

酒吧去年十二月開幕,場內可容納廿餘人。場內擺了不少開幕當日的照片,喬寶寶不失搞笑本色,戴上粉紅色假髮扮鬼扮馬。

再戰商界做老闆

「佢(指喬寶寶)以前賺埋賺埋都俾晒屋企人,細仔嘅醫療費好甘,加上佢係屋企經濟支柱,一個養四個,點會唔辛苦!」知情者說。

喬寶寶見擔子輕了,去年尾膽粗粗再戰商界,豪擲五十萬與友人合資在尖沙嘴開酒吧。本周一( 2日)中午時份,喬寶寶現身酒吧內打點,招呼客人及傳菜,又入廚房視察食物。被問及榮升老闆,他說:「同 partner一齊,有少少股份,舊年十二月先開,入得嚟,客人就係朋友,所以要落手落腳招呼。」

問到細仔情況,他說︰「 OK嘅,舊年九月喺蘇格蘭做咗手術,佢喺蘇格蘭出世,醫療唔使我哋負擔。(之前喺香港醫咗幾百萬?)都有㗎,不過依家輕番,舒服晒。大仔又畢業,可以幫補家計,所以我可以做生意,香港人精神嘛。」喬寶寶除了開酒吧,也與經理人李麗霞合資搞製作公司,他表示:「除咗紅館外,乜都做。」繼續發揮「爛做」精神。

喬寶寶為了家人辛苦工作,去年曾因此患病睇腸胃科醫生,最近更幫李思捷做嘉賓主持。

鍾意就快D Share啦!
Related Posts Plugin for WordPress, Blogger...