掃呢頁CODE去手機

2015年3月19日 星期四

怒炒張栢芝 追賠千萬 向生:佢冇得救! [壹週刊 - 1306] 栢芝,張栢芝,M1,



為《 3D封神榜》拍了十多日戲,連場景、特技及張栢芝片酬,令中國星損失過千萬。

探熱針

怒炒張栢芝 追賠千萬 向生:佢冇得救!

入行至今情緒與事業同樣大上大落的張栢芝,年前被封為票房毒藥,多得前經理人向太伸出援手,力排眾議,安排張栢芝拍《 3D封神榜》,希望令她事業重新出發。

只可惜死性不改的張栢芝,繼續無緣無故開工玩失蹤,投資四億開拍電影的中國星下令張栢芝即時執包袱,離開劇組。身為中國星主席的向華強,怒火未熄,連珠炮發:「佢好神經質,經常發脾氣,留難製片!坦白講,個個演員都比佢好,比佢紅!」向華強更強調要張栢芝賠償過千萬片酬及損失,並且永不錄用:「仲合作乜嘢,佢無得救!」

向太傷心

張栢芝有份演出的《 3D封神榜》,正在北京拍攝得如火如荼,當外界以為她可以憑哪吒一角事業反彈,但原來張栢芝已於三月十六日,被中國星炒魷,要即時執包袱。

向中國星主席向華強求證事件,他直認已飛起張栢芝。「呢個係尋日(三月十六日)決定,本來應該向太講,但因為呢件事,佢好傷心,覺得好冇面。」

近年多套電影票房失利,向太陳嵐仍對栢芝不離不棄,今次開拍《 3D封神榜》,更主動俾機會她事業翻身。

「大家都知栢芝一路以嚟態度都唔係咁好,我哋都幾年冇拍戲嘞!呢部戲籌備咗兩年,大家都好睇好,栢芝喺六七個月前,同向太喺微信傾起屋企嘢,向太覺得佢又離婚又自己一個女人帶住兩個仔,覺得佢好可憐,所以想俾機會佢。」

令向太無面,「龍五」向華強狂轟張栢芝,更指她「反轉豬肚就係屎!」

《 3D封神榜》一月在北京開鏡,向佐還擁着媽咪陳嵐及張栢芝合照,儼如一家人。

被飛的栢芝, 3月 16日已執包袱飛往上海。

講過唔算數

為接拍《 3D封神榜》,張栢芝表示會戒除昔日一切陋習。

「栢芝都承認自己以前拍戲態度唔係咁好,想重新嚟過,佢覺得呢部戲拍完會幫到佢,向太決定再幫佢一次!諗住扶番佢起身。之前栢芝低潮,都係向太搵杜琪峯、爾冬陞幫佢攞影后(電影《忘不了》)!」

可惜,只拍了十多日戲的張栢芝,又再故態復萌。「點知佢拍戲時又死性不改,佢好神經質,經常發脾氣,留難製片。」張栢芝甚至不滿工作人員,只對其他大牌演員如古天樂、李連杰、梁家輝、黃曉明等特別照顧。「去到片場,佢見到工作人員對其他演員好啲,唔係咁重視佢,佢就唔舒服,為咗呢啲事扭計,但因為呢啲演員都係有時間限制(指工作檔期),栢芝覺得劇組太重視佢哋,唔高興。」

唔單只妒忌心重,張栢芝試過一日突然由新加坡飛到北京,明明當日無佢戲份,仍嚷着要拍戲。「佢嘈晒點解冇戲俾佢拍,要拍其他人先!今時今日,仲係咁,心態好有問題,死性不改!」

在中國星力捧下,張栢芝憑《忘不了》奪金像影后。

向太陳嵐待張栢芝如親生女一樣,去年「鋒菲」復合時,向太亦力挺張栢芝要照顧兩個仔十分辛苦。

張栢芝與霆鋒離婚,湊住兩個仔的她,曾致電向太哭訴。

張栢芝與內地富商孫東海傳緋聞,男方更陪她及兩個兒子買玩具。

徹底死心

提到會否覺得張栢芝因為結識了有錢男友,才故態復萌?向生並不認同:「我就唔覺得囉!有好多人都有有錢男友,唔係個個都係咁!佢拍戲咁耐,應該係專業。」

被飛無得撈,張栢芝知衰搵經理人了解及道歉,不過向生強調已經死心,即使張栢芝親自道歉認錯,亦會永不錄用她。

「今次死心啦,唔會要番佢,唔能夠再忍受嘞!好多人知我哋搵佢拍戲,都問我哋點解仲用佢,叫我哋小心!但向太好有主意,覺得栢芝會改,栢芝開頭仲口口聲聲話會幫向佐,會帶住向佐啲戲,點知正式開工時,就神經質,每日都同製片話唔拍,失驚無神就走,我唔會再氹,今時今日唔需要,損失幾多都無所謂,唔會俾人吊住條頸,我拍戲都係玩票性質,換佢咪換佢!損失咪損失!無謂揸頸就命,佢呢個係計時炸彈,如果拍到 ending時先嚟爆,仲痛苦!佢呢啲做法,簡直反轉豬肚就係屎!而家栢芝再飾演少女、女人角色都無人睇!(係咪同栢芝永不合作?)一定,仲合作乜嘢,佢無得救!」

上週三( 11/3),張栢芝由司機陪同到又一城買唇膏,發現記者即火速走人,全程無回應。

中國星計劃再傾文章取代栢芝演哪吒。

中國星投資四億開拍《 3D封神榜》,向太更碌盡人情咭,搵黃曉明、古天樂、李連杰等大牌客串。

反面收場

19歲出道的張栢芝,入行 15年多次跟合作的經理人及公司反目,甚至對簿公堂。

朱永龍

98年張栢芝由男友朱永棠介紹下簽約朱永龍,並獲力捧,憑電影《喜劇之王》一炮而紅,其後有指她因父親鬍鬚勇欠下賭債而引發江湖姦殺令,而張栢芝亦於 2000年與朱永龍鬧翻,兩人更因片酬問題對簿公堂,最後由向太為她贖身,並代張父還債,自此簽約中國星旗下。

陳少寶

憑《喜劇之王》走紅後,張栢芝在朱永龍引薦下簽約環球唱片, 99年 7月火速推出首張 EP《任何天氣》,因反應熱烈備受力捧,但走紅後張栢芝卻開始失控,經常失場錄音,並缺席環球活動,前環球高層陳少寶曾公開批評張栢芝只顧拍戲,忽略歌唱事業,雙方反目收場。

向太陳嵐

06年張栢芝突然跟謝霆鋒秘密結婚,事前未有知會當時的經理人中國星,令向太心灰意冷,決定跟她解約,當中國星仍未計清楚張栢芝欠公司的欠款時,她卻入稟控告中國星旗下的經理人公司違反合約,指公司拖欠她 1,588萬港元,當時便有指張栢芝受謝霆鋒唆擺,自此與向太關係決裂。

鍾意就快D Share啦!