掃呢頁CODE去手機

2015年3月19日 星期四

睇拍戲 自費打真軍 古巨基爆粗 [壹週刊 - 1306] 古巨基,M1,



探熱針

睇拍戲 自費打真軍 古巨基爆粗

要定時定候返大陸做節目《我是歌手 3》外,已經兩年冇拍過戲的古巨基還唧出時間,接拍新片《衝鋒車》,與兩大影帝吳鎮宇及任達華合作。

戲中基仔有幾場單車追逐戲,堅持打真軍唔用替身的他,埋位前用了兩個月時間,認真到搵來前香港單車隊成員方家進幫忙,進行地獄式特訓。

但最大突破,基仔在戲中首度爆粗,尺度可挑戰阿 Sa(蔡卓妍)在《雛妓》的金句,「我有俾你×!」

炒到翻轉

《衝鋒車》是講吳鎮宇、任達華、譚耀文同鄭浩南四人假扮警察,將架十六座小巴改裝成衝鋒車去打劫,其間被真警察古巨基揭發。

兩位影帝吳鎮宇同任達華雖然係賊,但打劫中途不單勇救細路女,還阻止強姦案發生,又同基仔合作,對付一班撞晒橋同樣假扮警察的悍匪。

由頭到尾都係飾演正義警察的基仔,戲中有不少動作場面,其中一場炒車戲要他在公路將整部衝鋒車炒到反轉,被困在車內的他,全程整個人倒轉,為防基仔長期腦充血,導演每五分鐘便停機,讓他爬出車廂休息一陣,如是者,基仔前後要爬出爬入十幾次。

另一場戲基仔要企在一隻被吊起三層樓高的快艇上,同吳鎮宇、任達華等人對峙,雖然有做安全措施,但快艇被風吹到左搖右擺,又驚險又難平衡。「之前做演唱會都成日要吊高,呢啲碎料嚟啫!」基仔說。

這場炒車戲基仔要翻轉在車內,拍到腦充血,拍完之後要坐低回氣。

吳鎮宇、鄭浩南、譚耀文同任達華,假扮差佬去打劫,點知反而變救人同對付悍匪。

自費特訓

片量唔多的古巨基,為了將角色發揮到最好,埋位前更搵來前香港單車隊成員方家進,幫他進行地獄式特訓。

「基仔見自己喺戲入面有幾場單車追逐戰,就自動波自費搵教練幫佢操車,都練咗兩個月,其實劇組嗰邊都話明有啲高難度動作可以用替身,但基仔想自己親身上陣,開工咁耐替身係就係 ready咗,但全部基仔自己嚟。」一名幕後工作人員說。

有備而戰,動作場面難唔到基仔,但戲中一場爆粗戲「唔×知咪話你知囉!唔×行得咪×搭小巴!×街!」反而要過經理人 Mani一關。

「基仔形象健康,唔食煙又唔講粗口, Mani知道要佢爆粗有啲擔心,反而基仔覺得冇乜所謂,仲話場戲有粗口更加有真實感,接得個角色,就唔會顧住個形象。」工作人員說。

為了應付單車場面,基仔搵了前港隊成員方家進為他特訓。

要吊到三層樓高,基仔未驚過,因為以前做演唱會經常都要吊高,所以都好習慣。

任達華同吳鎮宇兩大影帝在戲中有大量嗌交戲,兩人表示拍得十分過癮,更不時爆肚加入粗口,令對白更加寫實。

鍾意就快D Share啦!