2015年3月18日 星期三

學界熱玩 知專劍球王上晒癮 狂煲日本仔技術! [FACE - 408 - 大專校園] MF,



劉駿謙(蝦米)知專設計學院軟件工程高級文憑 Yr.1

幾乎晚晚去朗豪坊格劍嘅蝦米(右前),即使同全港第一嘅李浩翔(左前) battle,都表現得相當淡定,蝦米話:「嚟緊會試吓參加日本搞嘅世界盃,出去見識吓!」

Main Camp

學界熱玩 知專劍球王上晒癮 狂煲日本仔技術!

如果你自認係一個 MK友,相信你一定見過班後生仔圍埋喺朗豪坊戲院對開潮玩劍球,不斷玩花式鬥高難度,一把十字木劍加一個木球,近來變咗學界新玩意。

每晚九點呢班劍客(劍球玩家)就自動埋位,十幾個板仔 look嘅劍客輪流 battle,玩家先使出花式,另一位即時跟玩,就算途人覺得佢哋小學雞,玩家都少理,一於自得其樂;仲有學生迷到搞埋自家品牌賣劍球,唔係 MK或者小學雞玩意咁簡單!

等𨋢都練

劍球講求手感,最緊要花時間練習,一班知專同學就連等𨋢嗰少少時間都唔放過!

絕版劍球約$5,600

一個劍球普遍百幾蚊有交易,不過呢個叫「夢元」嘅劍球堪稱係劍球界 LV,由於 08年已經停產,加上品質好好,炒價已經去到 700蚊美金(約 5,600港元)一支,好多人都買嚟收藏。

劍球,日本又名劍玉( Kendama),即係《叮噹》入面,大雄玩得幾叻而俾技安笑佢「乸型」嘅玩意。咪以為係低 B玩意,淨係啱啲宅男啪啪啪,本身係 X game( BMX)愛好者嘅劉駿謙(蝦米),現讀緊知專設計學院軟件工程高級文憑 Yr.1, GPA過 3,一年前跟朋友開始接觸劍球,一玩停唔到手, 19歲嘅蝦米話:「 1年前,我啲單車友帶咗個劍球出嚟,我試吓玩,點知好快就上手,從此就鍾意咗,之後一得閒,就會上網狂煲啲日本仔技術。」平時返學蝦米都會日日將劍球跟身,等車、轉堂,甚至在校園等𨋢都不會放過機會練習,「因為太多花式,有時突然諗到新招,我就急不及待攞出嚟練,玩開劍球嘅人就明白!」

噴波第一人

雖然蝦米的劍球技術不算好叻,但佢專注 D.I.Y.劍球,將原來平平無奇的劍球噴上不同顏色,全港只有佢幫劍球「扮靚」,所以喺香港劍球界,蝦米無人不識,由搵廠商、接訂單、設計、上色、裝嵌到交收,蝦米完全一腳踢。採訪當日,不停用手機同客傾訂單細節,返到屋企就即刻開壇整劍球,「平均每星期都有 20單生意,試過多單到通頂唔瞓整劍球,一個賣 200蚊,雖然每個月賺幾千蚊,一萬蚊都冇,不過見到啲客好鍾意自己整嘅作品,真係好有成功感!」

自製皮套

蝦米熱愛劍球,仲專程買部皮革印花機整皮革套,屋企十足蝦米嘅小工場。

皮套嘅外形設計來自日本嘅劍球手,但好似蝦米咁有 heart自己整嘅應該少之有少!

創知專劍球會

玩咗劍球一年,蝦米已經有 20多個劍球,「屋企地方唔大,所以都喺飯廳上色、噴油,有時要等屋企人瞓咗先可以開工,好多時都凌晨先整!」

由於蝦米日日帶住劍球返學,所以亦將劍球風傳到知專,轉堂或午飯時間,不少同學都會向蝦米請教劍球技術,十足半個老師。由於愈來愈多同學開始學玩劍球,蝦米仲同其他志同道合創立劍球學會,「𠵱家就係爭校方審批,如果通過,我哋仲想大搞,開班教學,令多啲人加入劍球運動!」

點解叫劍球?



由於手柄外形有尖頭狀,以便串起個波,所以叫劍球。劍球在 17-19世紀起源法國,到 19世紀再傳至全日本。 70年代日本更成立劍球協會,從此不再是小學雞玩意,每年有比賽及排名。

香港 no.1係亞視助導

要數香港劍球第一,一定係只得 23歲嘅李浩翔,𠵱家喺亞視做緊助導嘅佢, 14年就去咗日本參加劍球世界盃,拎咗世界排名第 14名,仲考到國際段位六段,香港劍球界一哥就係佢!

日練 2,500下

玩咗 7年劍球嘅浩翔試將個劍球上下揈,一口氣可以做二千五百下,勁有恆心。

日本參加世盃

上年 7月,李去了日本參加世界盃,喺 200幾人排 14。比賽以 3分鐘內做出不同 freestyle動作,玩咗 7年可以參加世界盃,真係為港人增光!

鍾意就快D Share啦!
Related Posts Plugin for WordPress, Blogger...