全知言
日匯新低買乜好？
閒時鍾意去日本旅行、入貨嘅朋友最近應該好 happy！事關日元匯率最近創下 6.3新低，去日本有「電視框」（ discount呀！）！
全知言今個禮拜梗係問吓一班要周圍飛嘅明星演員，到底佢哋最想去日本掃乜貨啦？陳法拉就最冷靜，話揸住港紙最穩陣喎！
黃美棋：換定等佢升！
𠵱家啲円跌到 6.3，自己都好鍾意日本，但就應承咗自己未生 BB之前唔可以去日本，因為驚會有輻射，所以我就會選擇「唱」定啲円，如果我有 BB都應該係 5年之後，希望到時啲円會升番上去 10，咁就可以賺番筆。
陳法拉：揸 cash最隱陣
我都有聽講円嘅匯率跌咗，自己未有時間去日本玩，之前聽過有投資產品會買円儲匯率會高啲，不過𠵱家就唔知動盪嘅時候揸住 cash係最穩陣。對於我嚟講都係穩穩陣陣揸住港紙，因為我嘅收入係港紙，使出去又係港紙，咁就唔使冒呢個風險！
姜文杰：狂買玩具
𠵱家啲円比較平少少嘅時候，大家可以入番多啲，因為 90年代無論音樂、飲食同玩具都係源自日本，好似五色戰隊或者幪面超人，對於我呢啲宅人都係非常鍾意，所以會入多啲日元，自己會「唱」定幾千蚊港幣，等有一日去番日本就可以去購物，雖然有人會驚食物會有輻射，但玩具就唔怕
周家怡：買嘢食
𠵱家啲円咁平，我覺得大家要入定貨，不過自己就會買嘢食，因為自己好鍾意食拉麵，加上有好多罐頭都好好味，所以我會「唱」定啲円跟住入貨，仲要全部都係食物！
姜皓文：殺波鞋
嘩！日本啲円跌喎，梗係「唱」番一大筆呢樣嘢我太太一早已經同我講晒，儲定一大咋彈藥去日本玩，至於儲定咁多円去日本攻陷啲咩？除咗食之外，我最鍾意就係波鞋，我要去嗰邊殺一咋波鞋番來！
梁小冰：掃化妝品
我好鍾意去日本，好似北海道、沖繩。《導火新聞線》裡面有個化妝師每年都會去日本幾次，我就話不如下次組團去瘋狂 shopping，佢就話每年 1月 1號嗰幾日仲有大減價！自己最想買化妝品、衫同護膚品，加上又好鍾意食日本嘢，所以魚生、刺身、和牛走唔甩
円大低水 街坊：掃情趣用品
至於一班街坊，大部份都係首選生活上嘅必需品，不過有位女街坊都算另類，首選竟然係情趣用品添！
知無不言 言無不盡 我係全知言
|
鍾意就快D Share啦！
|
|
|
