掃呢頁CODE去手機

2015年3月18日 星期三

周家怡我點都賺咗! 可能係第一次兼最後一次做女主角 [FACE - 408 - 專訪] 周家怡,MF,



真人騷

周家怡我點都賺咗! 可能係第一次兼最後一次做女主角

港視開台一波三折,退一步讓劇集在網上平台播放,亦是有頭威冇尾勢。劇集播一部少一部,於是,上周出街的《導火新聞線》,很可能是 35歲的周家怡第一次、亦是最後一次做女主角。

雖說已經 35歲,可是看周家怡的外型,和聽她說話,都傻更更一點和真實年齡不附,也正是因為這樣,在大台捱足十五年,即使做極都係護士同妓女,她還是能苦中作樂,甚至又傻又天真,臨走最後一份約,夠薑向大台自薦做親生女……答案不說也知道:「公司暫時未有咁嘅打算!」

被拒絕感覺如何?

「早知就唔問啦……」

周街俾人叫茄喱啡?

「其實我細個都叫唔出啲閒角名……」

恨唔恨做女主角?

「喺 TVB唔會咁諗……」

怕唔怕今次係最後一次?

「唔會!我喎!女主角喎!點會呀?無論如何,我都係賺咗!」

差點忘了說,善於扮傻安慰自己的周家怡其實傻唔晒, 11年她一邊打大台份工一邊苦讀,畢業時以十個 A佳績考得港大法律高級文憑。

這也是她另一個傻得可愛的證明:「我讀 law唔係為轉行,係為咗安撫父母,繼續俾我做落去咋!」

爸爸叫我讀 law轉行

點解會讀法律?

爸爸啲朋友做律師,佢話我做嚟做去都係二打六,不如諗定後路……所以我 11年仲喺無綫時去兼職讀 HKU Space嘅法律高級文憑。好辛苦㗎,一年要記 80個 case。

自己係唔係真係諗轉行?

我唔係咁諗,我嘅打算係,想繼續做呢行,就要讀咗法律安撫咗爸爸媽媽先。我鍾意演戲,無諗過將來,無諗過後路。

結果讀成點?

好好㗎!我第一年一共五科,五科都係 A,畢業十三科,有十科都係 A。

明明讀得書,點解當年會去咗做演員?

我中四開始學跳舞,鍾意郭富城吖嘛,跟住入 dance club,又參加咗星工廠舉行嘅跳舞比賽,簽咗做 dancer。我跳過黎明〈 DNA出錯〉、跳過克勤、跳過小春,係冇跳過我偶像郭富城。當年細,俾個排舞師鬧到喊就唔再續約,聽朋友講,去咗考藝訓班。我記得嗰年只係得 17歲,簽約都要阿媽在場。

細個就話面皮薄,但喺無綫咁多年,會唔會已經俾人鬧到慣?

鬧,托賴就冇,因為企錯位俾個 camera man掟手套就試過……不過其實個 camera man好好人,肯教你先會出聲,佢嗰次係想掟個位,但係意外掟到我。嗰套劇係《火舞黃沙》。

爸爸覺得你做極係二打六,你自己覺唔覺?

我嗰陣時冇咁諗,淨係見到:咦,呢套戲多咗喎……咦,呢套又多咗喎……

所以你要求其實好低?

好低㗎咋……因為我開工開心吖嘛,我同啲人開工開心,就覺得賺咗㗎啦……

賺唔賺到錢呢?

我好好彩,年年都爆騷,個個月兩萬幾,算好好喇。

所以你有工開、有爆騷,就唔介意做二打六?

我自己唔覺㗎,但係有一次喺旺角行街,有個𡃁仔話:「喂!茄喱啡!」嗰日我啱啱同初戀男朋友分手,真係好唔開心!喂我已經好慘喇,你使唔使走埋嚟話我死茄喱啡呀……冇嘅其實,個𡃁仔冇加個死字喺前面。都正常嘅,我細個睇明星都淨係識得郭富城,有時入𨋢見到做戲嘅都噏唔出名,唔好因為入咗行就放大咗呢件事囉。

《導火新聞線》

《火舞黃沙》

大台做極係雞同護士

俾人叫完茄喱啡,有冇激勵你向上爬嘅決心?

向唔向上爬都唔到我話事……由我開始問 TVB肯唔肯簽我做經理人合約被拒絕時,我就明喇……呢行真係唔到我哋話事。

幾時問過無綫?

做完《火舞黃沙》。我入無綫一直係普通藝員約,隔幾年就會再傾再簽。

你都好天真喎,夠膽自己走去問?

咁年年都係咁㗎啦,藝員科同事同我傾:「做得幾好、爆咗幾多騷,嗯……出年就加你幾多幾多騷啦……」咁我咪問佢,其實公司有冇興趣簽我經理人合約,佢話:「其實應該暫時就冇嘅……」

被拒絕個感覺如何?

個感覺係……早知就唔問

既然想做好啲,點解唔嚮出邊發展?

冇諗過,因為一個人都唔識,出邊從來都冇人搵過我。

所以王維基一搵你,你就𦧲飯應?

係呀,咁佢係第一個搵我嘛,人工又高喎,最緊要係 TVB唔肯做我經理人,但係王維基肯喎……仲有,咁少人過去,機會一定相對多啲。

好多人覺得,喺大台就算做個茄喱啡,都應該係個多人識嘅茄喱啡。

我冇……我唔會咁諗,因為最後嗰年喺 TVB角色又落番去。好似《 On Call 36小時》,又做番護士,叫做有少少戲,暗戀馬明。

《 On Call 36小時》

《王老虎搶親》

做演員要睇樣睇身材睇人氣睇手段,你樣樣都冇,所以連機會都冇,個感覺如何?

我算係好,咁多年都冇一個咁嘅思維,如果我係咁諗,會好辛苦。通常收到角色,見到劇本,我淨係睇自己嗰 part,唔會諗如果我係女主角就好啦……我一出嚟做都已經係咁,揭吖揭,揭好多版至見到自己。尤其係頭嗰幾年,做嚟做去都係 office、護士,同埋雞……

你有做過雞咩?

梗係有啦,雞係最經常做,古代做、現代又做,一路做呢啲,慢慢開始有名,由妓女 A,到「小紅」,慢慢開始要開會、見監製,仲要有天書,好好㗎喇!

唔會諗下做女主角?

唔會㗎……喺 TVB唔會咁諗。

好多人去到港視,都話待遇差天共地?

係,真係差好遠。首先拍《導火新聞線》,我真係唔知自己係主角,公司安排我先喺大陸拍咗一年劇,返到去見編審、傾新劇,我就喺度諗:「咦,幾好喎呢間公司,連二、三線角色都係單對單傾……」

做咩編審咁認真,對「小紅」都要單對單?

我攞住劇本,見到自己係女主角,真係好淆底。王生係有講過,佢哋人唔多,都想盡量推我一把,但係我亦都知自己唔夠卡士,揹唔起,人哋都唔知邊個周家怡,仲以為報新聞嗰個……

《一擲千金》

《金枝慾孽》

俾人彈鐘嬲到喊

不能說的秘密《忽然 1周》圖片

但怕唔怕《導火》會係你第一次亦係唯一一次做女主角?

我冇擔心係唔係最後一次,我相信全香港除咗王生應該冇第二個肯搵我做女主角,我點都賺咗!

除咗俾人話擔正未夠班,仲有冇試過跟紅頂白?

其實就有嘅,細個俾人彈咗都仲可以詐傻扮唔知,但𠵱家咁大個總唔可以……試過前兩年金秀賢嚟香港出席活動,經理人幫我搭路,唔收錢佢哋都話唔使你嚟……嗰陣時有喊,覺得真係好現實。

遇到呢啲嘢,有冇問下閨蜜佘詩曼意見?

有呀,嗰次同佢講,我今日俾人彈鐘吖……佢明我講咩。

佢點會明?佢一入行就係一線,從來未試過俾人彈鐘?

佢都係喺呢行,佢明發生咩事。佢叫我做好手頭上嘅嘢先,唔好諗呢啲。大家都係同行,我發生嘅事佢點都睇到,佢啱啱出道時都試過俾人針對、試過有人唔當佢係嘢。

咁感情呢?單身中?

唔講喇……係呀,單身中。

閨蜜無分階級

呢行就係咁,你越係唔想人知,越係有人影、越係多人講。

係,緋聞係會令我見報多人講,新聞雖然係得一浸,但係我覺得最蝕係,唔應該喺自己喺呢行嘅 history入面加咗呢一段,點嫁吖第時?大佬,係真尤自何,唔係真人哋以為我份人真係好花(心)!

咁林國斌係真定唔係真?

唔好啦……講番我自己,講番我初戀啦不如,初戀八年,都嘔心瀝血㗎。

你入行拍戲咁多年好似傻更更,好易滿足,愛情你係唔係都一樣?

愛情,我以後拍拖都唔會再好似以前咁……

點解咁講?

因為以前我係付出形,佢鍾意咩,我就逼自己鍾意咩!佢鍾意篤波,我陪篤波,佢鍾意賽車,我又去鍊車。我黐線㗎,真係揸車幫自己計時,唔知為乜,所以我咪話我冇性格但求迎合佢囉。一段關係唔應該係咁,佢係鍾意我嘅個性,但搞到最後,我完全無咗自己。

明知自己冇自我,咁你又做?

因為愛囉……因為想佢開心囉……

工作你會同朋友訴苦,愛情呢?

我會收埋自己。

點解一講愛情你就吞吞吐吐,仲要望住經理人?

因為唔想講囉……

係唔係因為上一段情傷未復原所以唔想講?

唔係呀……唔想成日提住想結婚想嫁人。

死穴

係嘅,講愛情真係周家怡嘅死穴。一講林國斌,周家怡就開始甩咳緊張心煩多疑,我甚至還看到她本來白雪雪的臉同頸,幾分鐘裡出現一片片紅斑。

寂寂無聞十幾年,突然有一天因為和已婚男的七年婚外情而登上雜誌封面,聽說報導出街不久,這段愛情亦正式告終。講到愛情,最叻傻更更對世事的周家怡,竟然連扮傻的力氣也沒有、一味想逃,看得出來,這一役,傷得有幾重。

鍾意就快D Share啦!