2015年4月10日 星期五

視后利誘 徐子珊續約 鍾嘉欣坐歪 [忽然1周 - 1028] 嘉欣,徐子珊,子珊,鍾嘉欣,MW,



刮痧瘦腳

徐子珊為咗隻腳靚啲,刮咗 3日痧,搞到大撻瘀痕,好似遭到家暴咁。

滾熱辣

視后利誘 徐子珊續約 鍾嘉欣坐歪

亞視玩完,咪以為大台可留得住啲花旦小生。事關今年大把阿哥阿姐約滿北望神州,加上 now的港娛開台要招兵買馬,大台花旦、小生買少見少。造就今年 5月約滿的徐子珊,有機會發圍。

約滿在即,據知大台搵樂易玲出手留人,除了年薪加到 120萬,並拍心口為徐子珊度身訂造劇集,谷她攞視后。咁多甜頭,難怪徐子珊心郁郁,續約機會八、九成!

不過,與徐子珊平起平坐的鍾嘉欣,就被迫坐歪,暫時今年只係得一套劇《華麗轉身》 4月尾播。要爭視后,徐子珊睇高一線。







即將約滿大台的徐子珊,近兩個月與大台處於膠着狀態,事關她一日未簽字續約,大台亦不會安排新劇給她。冇劇一身輕的徐子珊,最近除了為《以和為貴》宣傳外,亦忙於為詩琳拍纖體廣告。

今次她在新廣告中穿上火紅 bra top加熱褲,形象野性。由於露腰又露腿,新年食大咗的徐子珊,為了減腿及去走包包面,半個月前開始節食做運動,更刮痧去水腫。她說:「為咗影相靚啲,我之前去咗刮痧同通淋巴,連續刮咗三日,搞到隻腳瘀晒。」

子珊加薪 15%

5月約滿大台的徐子珊,近日已經獲公司約見傾續約。大台在花旦買少見少的情況下,出盡法寶留人。雖然藝員部現由余詠珊及曾勵珍揸旗,樂易玲失勢,但由於樂過往湊開花旦,與她們稔熟,故大台今次亦找她做說客,出招利誘徐子珊續約。

「子珊有諗過向外闖,但佢知自己大陸巿場暫時仲未得,加上今次大台俾佢嘅 offer都唔差,包薪多了近 15%,年薪 120萬,爆騷另計。大台又講到明,只要她肯續約,即刻開部大劇俾佢,角色為她度身訂造,更會安排成為台慶劇,谷她攞視后。另外,大台拍心口開戲給她,構思一個以女性為題材的劇本,希望趕在聖誕檔期上映。」

徐子珊近日除了宣傳《以和為貴》之外,大台暫時都沒有安排工作給她。

《華麗轉身》之後,嘉欣今年暫時沒有其他大劇擔正,視后寶座無望。

徐子珊 12年憑《雷霆掃毒》攞到「我最喜愛的電視女角色」獎,幾乎笑到見牙唔見眼。

鍾嘉欣 06年在大台攞過「飛躍進步女藝員」獎,當年她喊到好似劏豬咁。

嘉欣失寵變配角

近日有傳鍾嘉欣嫌男友伍允龍事業冇成績,提出分手,結束 8年情。愛情冇咗,事業又有阻滯,嘉欣認真黑仔。

反觀休息了好一陣子的鍾嘉欣,過去兩年忽然失寵,由高峰期一年六劇,減至一年一至兩劇,氣勢大不如前。最近有指即將開拍的《巨輪 II》會加入珍姐愛將陳凱琳,而鍾嘉欣就會由上集的女主角變成客串。

雖然後浪陳凱琳同蔡思貝正面衝擊,鍾嘉欣仍唔識驚,早前趁假期忙玩煮飯仔,並跟馬浚偉學廚藝。月中才復工,與王祖藍飛往內地拍大陸劇《哪吒》,一飛便個多月, 6月才與黃宗澤開拍大台劇《警犬巴打》,分分鐘明年先出街。

事業愛情兩不順

徐子珊與鍾嘉欣並非第一次拗手瓜。去年,徐子珊取代鍾嘉欣成為詩琳代言人,搶完廣告又爭做一姐,兩個認真寃家路窄。

事業不順利,愛情也觸礁。有指鍾嘉欣家人嫌伍允龍冇出息,一直反對兩人戀情。她不堪壓力,最近向拍拖 8年的男友,提出分手,為了決絕斬纜,更向外宣稱單身:「我依家只係有朋友!」睇唔出嘉欣 BB都咁辣!

着住 7吋高踭鞋吹風扇,效果就好飄逸,但子珊企足成個鐘,拍完腳都震埋。

徐子珊換上 Haider Ackermann藍色晚裝,從休息室走出影樓準備攞高踭鞋着,老闆陳生突然失驚無神幫子珊挽鞋,子珊即說:「受唔起、受唔起呀!」

為咗展示子珊嘅美腿,工作人員不惜將萬五元嘅長裙剪爛。

徐子珊鍾嘉欣由纖體廣告代言鬥到爭視后。

花旦大執位

呢幾年大台花旦走吓一個又一個,剩低十隻手指數得出,仲肯搏又有番咁上下資歷的只是剩番徐子珊同鍾嘉欣,正如李嘉誠話齋:「冇能力嘅爭住做,有能力嘅又唔去做!」

楊怡 恨嫁趕生仔

今時今日楊怡穩坐一線花旦地位,不過她近年只顧住羅仲謙,被人影到孖住睇新樓,還打算今年結婚生仔,無心戀戰。

佘詩曼 拍電影搵真銀

13年阿佘返大台拍完《使徒行者》之後已經冇再拍劇,而大台見《衝上雲霄》電影版大收,繼續找她拍《十月初五的月光》。電影版賺錢,完全冇時間去拍劇。據知阿佘同無綫只剩一個劇,續唔續約仍是未知之數。

胡杏兒 拒續約遭雪藏

快將約滿大台嘅杏兒,續約機會近乎零,被大台投閒置散。現階段她只係寄情拍拖和內地工作,有傳男友 Philip已經向她求婚,隨時有可能同楊怡一齊做羊年新娘!

子羚定欣 忙瘟仔

胡定欣及姚子羚本來等接棒上一線,不過 33歲胡定欣近日被爆與 42歲音樂人陳明道,打得火熱,其好姊妹姚子羚亦正式入主有米男友的士邦(鄭子邦)寓所做女主人。兩人瘟仔大過天。

陳凱琳蔡思貝 未夠班

大台鬧花旦荒,惟有力谷陳凱琳、蔡思貝等新人上位,可惜佢哋演技稚嫩,觀眾緣一般,暫時難獨擔大旗。

鍾意就快D Share啦!
Related Posts Plugin for WordPress, Blogger...