續牌唔成 亞視仲搞末代亞姐 [忽然1周 - 1028] 亞視,亞洲小姐,亞姐,MW,

據知因為收咗某啲贊助，所以亞視死都要搞亞姐亞生。葉家寶周三（ 8日）返亞視總台，俾大班記者包圍，但佢話今日唔會講任何嘢喎。

媽咪姐

續牌唔成　亞視仲搞末代亞姐

查實呢，亞視可唔可以俾大家唞吓㗎？上個禮拜，喺王征「英明」領導之下，亞視終於成為香港史上第一個冇得續牌嘅免費電視台，搞到 6百幾個員工冇晒希望。但原來佢仲未收手㗎！媽咪姐收到風，亞視管理層已經落咗 order，話會搞埋末代亞姐同亞生，一班服裝部阿姐已經收晒通知，要準備啲戰衣㗎喇。

其他影片：>>李超人寸爆亞視

Well，不過大家都知亞視冇錢出糧有錢打官司，依家仲續唔成牌。葉家寶話賣埋片庫同器材，啲營運資金都係頂到 4個月度咋喎！而依家開始招募亞姐，搞得嚟都差唔多年尾，唔係諗住叫啲員工白做吖嘛？至慘係搞完一場大龍鳳，個節目最後好可能出唔到街！上期《忽周》先報道過，來自國內嘅 2013年亞姐季軍陳夢圓攞住旅遊簽證幫亞視做黑工，而近年參選亞姐嘅，好多係大陸同胞，勞工處呢次唔係唔做番啲嘢吓嘛？

都係嗰句，與其搞咁多嘢，阿王征先生不如出嚟同員工交代清楚「後事」，準時出糧。執都執得好好睇睇吖！

上年亞姐冠軍張軼珺（中）、亞軍唐淑薇（左）、季軍陳洋鈴（右），大家應該都唔會有印象。值得一提係佢哋個后冠係膠造，當選之後，仲無乜工開。唔知有冇人仲咁勇，參加今年嘅末代亞姐競選呢？

自從 3月 31日俾傳媒喺九龍站港景滙捕獲之後，亞視最大股東王征又繼續龜縮，令成班亞視員工勁嬲呀！《蘋果日報》圖片

黎燕珊：作為亞姐嘅大師姐（首屆冠軍），我一直都希望亞洲小姐能夠傳承落去，尤其呢個選美會係由邱德根先生創辦。邱生逝世已經好傷感，好希望能夠守住亞洲小姐選舉。但今年可唔可以再辦都係個問號，因為即使有人贊助，但製作費龐大，加上人手呢？ 6百幾位員工已經堅守咗幾個月，但唔能夠無止境地等，就為咗等有大型節目做！

劉錫賢：佢搞（亞姐）咪由得佢搞囉，依家先講籌備，搞得嚟都係 10月 11月嘅事，我同威仔（蔡國威）份約 8月 30號就滿約。（會唔會做義工 MC？）到時嘅嘢唔知今日開番工，（公司）未講過任何嘢，冇交代過。我哋睇緊有乜自救方法。 aritist保障一向較少，大家聚埋一齊，睇吓可以點做。我就隨遇而安，唔會有問題嘅。

筱靖：好可惜！自己都係亞姐（ 07年）出身，只可以話係完成咗歷史使命。其實亞姐係一個好好嘅品牌，可以考慮賣咗出去，俾員工出糧囉。

楊玉梅：其實呢 10年真係冇乜睇，如果係冇人睇，唔似我哋（楊係 90年亞姐季軍）以前咁，不如唔好搞。

鍾意就快D Share啦！

下一篇 》