羅仲謙蔡思貝奉旨再煙韌
藝人蔡思貝、羅仲謙之前拍劇傳緋聞，由於觀眾對這啤「螢幕情侶」相當受落，故無綫再安排兩人於5月開拍的新劇再演情侶，可謂攞正牌談情！據知羅仲謙一直擔心女友楊怡的感受，但楊怡不想阻男友上位，寧願啞忍作犧牲，難怪謙仔識做地買樓派定心丸。而「緋聞之女」蔡思貝坦言不想再有負面新聞，但拍攝時不會專登避忌。
羅仲謙和蔡思貝之前拍劇集《衝線》連番傳緋聞，雖然思貝與多位男藝人如溫家偉、周志文等都傳過緋聞，但似乎觀眾最受落還是她與羅仲謙這對，無綫有見及此，希望再次力谷這對螢幕情侶，於5月中開拍的新劇《潮流教主》中，兩人擔正男、女主角，並有感情線。
廟街王后專賣老翻
據知羅仲謙亦擔心今次再與思貝合演一對，會辣慶正印女友楊怡，一度猶豫究竟接不接此劇，但據楊怡身邊的密友透露，雖然楊怡十萬個不願意睇住男友跟思貝談情，但亦不想阻謙仔發圍，惟有犧牲自己啞忍，但謙謙都好識做，最近一有時間就陪女友，早前更被拍到齊齊睇樓，派定心丸給女友！
新劇《潮流教主》以潮流雜誌社為背景，男主角之一羅仲謙飾演男模特兒，另一男主角陳豪則是雜誌社總編輯，女主角蔡思貝就飾演「廟街時裝王后」，在廟街賣老翻手袋及服飾，對於再次擔正女主角，思貝昨日受訪時坦言很開心，多謝公司給予機會。說到再與羅仲謙合作，會否怕再傳緋聞？她坦言：「希望唔好因為唔想有負面新聞，我淨係想專心做嘢！自己睇咗劇本都好開心，覺得好吸引，由醜小鴨變鳳凰，每個女仔睇劇本都應該覺得好靚，依家我都準備緊。」提到首度與「型男」陳豪合作，她指稍後試造型時便見到他，並笑謂：「我諗到時我會怕醜囉。」
羅仲謙則坦言知道與蔡思貝有感情線，會否怕緋聞再傳得熱烘烘？謙仔說：「唔驚，都只係一個工作。（劇中仲有好多靚女喎！）唔怕，大家都係專業嘅。」要否跟女友楊怡備案？他謂：「唔使，只要專業完成工作就得，都係做嘢啫！」飾演男模的他坦言不用特別操fit，更笑言：「只要唔再肥就得嘞！我做model啫，唔一定要除衫。」
莊思敏姊妹檔上陣
身為兩子之父的陳豪可說是緋聞絕緣體，提到劇中新演員眾多，他說：「好開心，同一班未合作過嘅新演員合作，希望帶到新鮮感畀觀眾。」《潮》劇除了陳豪、羅仲謙和蔡思貝外，港姐出身的邵珮詩、許亦妮及索女李亞男、楊秀惠、莊思敏、莊思明等也有份參演，現實中的索模更會在劇中演回「老本行」模特兒。眾女雖不用谷胸賣性感，但就會盡騷美腿及身段；服裝方面，劇中大都是高級時裝，服裝budget比平時劇集高出一倍，不少演員更會出動私伙。
莊思明與家姐莊思敏首次合作拍劇，但不會有太多對手戲，被問到家姐首次正式拍劇，會否指導對方？她笑言：「唔使佢拍咁多電影，自己識執生。（會否出動私伙衫？）睇吓公司安排乜先，應該都唔差。」。
文：影視組
|
鍾意就快D Share啦！
|
|
|
