2015年4月1日 星期三

慌死嫁唔出 撇 ex溝新仔 胡定欣姣夾金毛潮佬返閨過夜 [FACE - 410] 定欣,胡定欣,MF,



26/3  1:22am

上週四( 26日)凌晨,胡定欣繑實音樂人新歡陳明道,一齊行去攞車返屋企。

封面

慌死嫁唔出 撇 ex溝新仔 胡定欣姣夾金毛潮佬返閨過夜

先後同吳浩康、馬國明拍過拖的 33歲胡定欣,自從 12年搭上廣告闊少沈栢淳( Patt)便再冇緋聞,以為好快嫁出做沈太,多次傳出婚訊的胡定欣卻在去年 11月驚爆分手,搞足兩年又係得個桔。

做唔成少奶,原來定欣相當進取,知道出嫁無望後旋即轉移目標,搬離昔日愛巢渣甸山,擺明要同前度割蓆,更火速撻着金毛音樂人 Terry Chan(陳明道)。定欣新歡年約 46歲,一頭金髮卻相當潮,上週三( 25日)親自駕駛 Audi跑車接胡定欣睇舞台劇,之後直落打邊爐。定欣趁人少少更主動出擊又繑又攬夾新歡返香閨,含春樣出晒!

男友大 13年, so what?最緊要有仔陪呀!

去年尾出席公開活動時忽然自爆甩拖的胡定欣,分手後一度繼續住渣甸山舊愛巢,又處處維護被指偷食的前度,令人懷疑定欣希望死纏復合。誰不知分手冇耐,定欣已火速搵到新歡,仲要係大佢 13年的資深音樂人陳明道 Terry。

胡定欣去年 11月自爆與廣告公司老闆沈栢淳分手,點知話都冇咁快就搵到個有米音樂人新歡!

去年 11月,胡定欣出席活動時自爆已同沈栢淳分手幾個月。

《蘋果日報》圖片

含春睇《嬉春》

上週三( 25日)下午 5時許, Terry駕駛 Audi跑車到胡定欣新居附近,落車後直接用住戶卡開門入閘,當值保安員亦親切地打招呼,似乎頗熟絡。

1個鐘後, Terry與胡定欣孖住落樓,兩人笑容滿面,短短幾分鐘路程未停過口,定欣臨上車前更佻皮地輕攬男友, Terry亦立即報以甜笑,隔住個窗都感受到熱戀的甜蜜。二人隨後往理工大學睇老友單立文的舞台劇《嬉春酒店》,之後再會合胡說八道會的黃智雯、李施嬅(李詩韻新名呀)等到九龍城打邊爐。能夠融入定欣一班姊妹淘, Terry明顯已與定欣交往了一段時間。

25/3  5:30pm

陳明道揸車到胡定欣寓所,自己拍卡入閘。

6:33pm

兩人雙雙落樓,胡定欣輕輕掂住男友手臂,好黐纏。

11:21pm

睇完《嬉春酒店》,定欣改坐李施嬅(左)車去九龍城食飯, Terry(中)就自己揸車。

1:37am

含春笑

打完邊爐㷫合合,兩人泊好車即急步上樓 sweet sweet!

見光前後腳

烚到凌晨 1點幾散 band,其他人上的士離開,定欣同 Terry自己行去攞車。沿途人都唔多個,定欣開始放下戒心,主動繑實男友手臂, Terry亦非常受落,笑到四萬咁口!之後兩人飛車返回定欣寓所,天光前未見男方離開。

其實早於本月 18日,本刊已經發現胡定欣與 Terry到將軍澳 PopCorn商場搵食。當時定欣冇化妝,與男友並排而行,更一度親暱地搭住 Terry膊頭。期間有途人眼望望認出定欣,定欣立即與男友保持距離,前後腳行入一間平民日本餐廳食拉麵,半個鐘後極速食完走人。原來當時定欣已搬到 PopCorn附近的天晉 II期,當晚相信是小聚後落街醫肚。

'15 3月

單立文將上週三舞台劇後台相放上微博,當時定欣(左二)同 Terry(左一)未知會被老友出賣,故毫不避嫌頭貼頭合照。

網上圖片

'14 10月

早於去年 10月, Terry已經同胡定欣(左二)喺祖兒演唱會後台合照,定欣更疑似捉實男方手臂。

網上圖片

胡定欣只將佢同李施嬅(中)、黃智雯(右)的合照放上網,擺明要保護戀情。

網上圖片

新歡 Terry:好錫佢

連續兩個星期三同定欣拍拖見面, Terry週一( 30日)在電話否認係定欣男友,「梗係唔係拍拖啦,我哋成班朋友好 friend㗎!(有冇考慮追定欣?)唔敢肯定住!佢好好、好乖,(我)好錫佢!(你哋繑到實喎!)冇啲咁嘅事,係咪玩緊咋?應該睇錯咋!」

年約 46歲的 Terry,是行內著名的音樂人,入行超過 20年,圈中人緣極廣,並曾經替多位天后如王菲、林憶蓮和陳慧琳等做唱片監製,亦係容祖兒、謝安琪等的演唱會音樂總監。 Terry現時有份與單立文在《今晚睇李》做 live band,據知定欣亦是由豹哥介紹 Terry認識。唔知新秀出身、又曾經話過想出唱片的定欣,有冇同新歡講吓音樂呢?

雖然年近 50,不過一頭金毛的 Terry打扮夠潮,而且有個市值 1千萬的跑馬地單位、一架林寶堅尼同 Audi;加上相當識得享受生活,閒時會到外地賽車,又愛飲靚酒食好嘢,難怪與定欣相差 13年都冇代溝喎!呢次定欣扑唔扑得中順利嫁出呢?

情人節收花

網上圖片

Terry有份喺《今晚睇李》做 live band,之前亦有為《荃家福祿壽》做音樂。

電視畫面

胡說八道會,唔係流㗎!

由一班大台姐仔組成的胡說八道會,當中的大家姐胡蓓蔚率先嫁咗畀單立文做人妻,不過佢啲姊妹都唔弱,幾個核心成員全部感情有着落,仲要個個目標一致,另一半全部非富則貴!計感情生活,胡說八道會完勝咗 dry爆岑麗香、苟芸慧等單身姐仔的處女黨喎!

網上圖片

胡杏兒

去年與獵頭公司兼夜場老闆 Phil出席除夕 ball斷正,之後大方直認熱戀中,近日盛傳結婚做羊年新娘。

《忽然 1周》圖片

李施嬅

原名李詩韻的李施嬅,同鄧建泓分手後轉向有米男埋手,曾與告東尼子、巫雨平等富二代傳緋聞,新歡係投資公司董事總經理潘樹維。

《忽然 1周》圖片

姚子羚

去年與圈外有米男友分手後,鍊贏 Janice Man,成功將有過億身家的鄭子邦(的士邦)綁實,更有傳男方已向佢求婚。

《蘋果日報》圖片

黃智雯

形象踏實的黃智雯,唔聲唔聲戀上謝瑞麟高層詹文天,兩人一度傳出分手,但去年 12月又被影到去大坑撐枱腳。

新歡撈足 27年

46歲陳明道係行內著名音樂人,第 1首編曲作品係 88年林志美〈沒有中間路線〉,其後與倫永亮合作,一度憑〈何日君再來〉得到金像獎及金馬獎提名。後來陳明道開始任音樂總監,與多名樂壇巨星合作過,而新一輩的容祖兒、 Eason亦愛搵佢做唱片。

Terry(中)早於 94年已同陳潔靈(左)到福岡開騷。

網上圖片

祖兒同 Kay開演唱會亦愛搵 Terry做音樂總監。

網上圖片

網上圖片

曾擁有多部名車的 Terry,鍾意到外地賽車。不過 03年 Terry揸架波子,載住張栢芝細佬張柏文發生意外,架車撞到 total loss,兩人輕傷。

網上圖片

揀仔冇路捉

胡定欣歷年只承認同吳浩康、馬國明及廣告才子沈栢淳拍拖,三個舊愛以至新歡 Terry Chan全部唔同類型,究竟定欣鍾意咩 type先?

《蘋果日報》圖片

吳浩康有聲

兩人識於微時,當年 Deep衰藏毒事業跌入谷底,定欣不離不棄,可惜男方唔領情,為莊思敏狠撇定欣。

《蘋果日報》圖片

馬國明 有樣

08年因參加《舞動奇跡》撻着,有傳馬明頂唔順定欣的公主病,拍拖約 3年最終分手。

《蘋果日報》圖片

沈栢淳 有米

12年開始拍拖,其後感情穩定迅速同居,有傳因男方偷食導致分手,亦有傳係定欣迫婚不遂。

鍾意就快D Share啦!
Related Posts Plugin for WordPress, Blogger...