2015年7月30日 星期四

舉家出巡 陳豪陳茵媺細仔首度見光 [壹週刊 - 1325] 茵媺,陳豪,陳茵媺,M1,



陳豪陳茵媺舉家出動去買 BB用品,五個月大細仔 Nathan終於曝光。肥嘟嘟的 Nathan眼仔碌碌,同哥哥 BB時餅印一樣,都係似媽咪多啲。

探熱針

舉家出巡 陳豪陳茵媺細仔首度見光

陳豪陳茵媺婚後三年抱兩,成為圈中模範家庭!幫大台拍完新劇《潮流教主》後,陳豪第一時間返回崗位做湊仔公,早前更一家四口出動,到入境處為細仔攞出世紙。

上週六(七月二十五日),陳豪同老婆帶埋兩個仔,到近海怡廣場選購 BB用品,五個月大的細仔 Nathan肥嘟嘟,皮膚白白淨,同大哥 BB時餅印一樣。

肉緊錫面珠

當日落住大雨,陳豪一家四口連同外傭上午十一點從大埔比華利山寓所出發,到位於鴨脷洲的新海怡廣場購物。到埗後,陳豪率先跳落車,開定 BB車,恭候豪嫂同兩個仔;發現記者,他大方笑晒打招呼。

已經歲半的大仔 Aiden由媽咪抱住落車,同媽咪齊齊著住黑白橫間母子裝, cute到爆!生得高大頭髮又濃密的他更加遺傳了父母基因,眼仔碌碌不停望住鏡頭,甚至主動同記者哥哥揮手,好有家教。

至於細佬 Nathan亦唔輸蝕,肥嘟嘟白白淨,有肉地似足節瓜仔,同 BB時期的哥哥餅印一樣。個仔實在太得意,陳豪都忍唔住肉緊係咁錫。

有外傭跟身,但湊仔不假手於人,兩公婆夾手夾腳安頓好兩個仔坐上 BB車後,便一人推一架,上樓掃貨。

一行六人搭𨋢直上廿二樓一間 BB用品店,睇完 BB車再睇孭帶,又徵詢售貨員意見。陳豪睇中潮媽熱選的 hip seat孭帶,更即買即用,讓 Aiden試坐。



歲半的大仔 Aiden完全唔怕醜,同媽咪一齊對鏡頭 say hello。

雖然有外傭跟身,但兩公婆唔靠人,安頓囝囝坐上 BB車,自己嚟!

老婆同兩個仔落車前,陳豪先預備好兩架 BB車。

等𨋢期間, Aiden繼續眼定定望實鏡頭, cute到爆!

蓋鳴暉好帶挈

行到玩具部, Aiden扭計要落地,只見他一邊睇一邊指手畫腳不停同媽咪傾偈,好精靈。之後兩公婆再揀多張 BB車專用的「太陽擋」,陳豪簽咭俾錢後,一行人轉去其他樓層繼續買買買。

之前大台安排陳豪同蓋鳴暉合拍膠劇《水髮胭脂》,搞到網民驚呼狂叫,直指大好筍盤慘被蓋鳴暉糟蹋,收視插水之餘,更令「師奶殺手」大扣分,嚇走不少廣告商。

「 Moses呢兩年刻意減產,接 job揀擇咗好多,亦企硬唔減價,加上而家經濟麻麻,有啲客會退而求次,所以 Moses都冇以前賺咁多,公司仲要佢襯蓋鳴暉,衰多兩錢!」陳豪身邊人說。

嗌停追女計劃

陳豪以妻兒優先,加上陳茵媺出名緊張媽咪,所以他寧願搵少啲,爭取時間幫老婆照顧兩子。細仔出世後,豪嫂百上加斤,早前更因體力透支,搞到要住院;一心要追個女的陳豪,見老婆健康亮紅燈,亦立即打退堂鼓,暫停大計。

「 Amiee樣樣都要親力親為,就算有工人,佢都唔放心,餵奶沖涼全部自己郁手,湊兩個好吃力,佢又容易緊張,身體都差咗,所以 Moses決定等兩個仔大啲,過多兩年先再追個女。」陳豪身邊人說。

兩公婆在 BB用品店內左揀右揀,有商有量。

其中一樣戰利品,是 BB車專用的太陽擋,約 630元。

湊仔唔假手於人,陳豪連囝囝的傢俬都親手做,無論裝嵌、上油都百分百 handmade,保證囝囝安全健康。

陳豪在新劇《潮流教主》飾演煙剷,搞到一身煙味,搞到被老婆禁止抱仔。

坐墊式孭帶

廿四孝陳豪買完 hip-seat孭帶,即場試用。

長時間抱 B,好易出現腰痠及手患問題,近年大受父母追捧的坐墊式孭帶,除了較用嬰兒車靈活方便,設計更針對性減輕腰背及頸椎的壓力,降低勞損情況。

一般的坐墊式孭帶適合 3至 36個月大嬰兒,並可承受最高體重至 20kg,坐墊式孭帶亦提供多種姿勢可自由選擇,配上雙肩孭帶時, BB可以面向外或向內,拆除雙肩孭帶, BB可以當腰櫈坐,功能多又孭得輕鬆,極受歡迎。

鍾意就快D Share啦!
Related Posts Plugin for WordPress, Blogger...