2015年7月8日 星期三

估中有獎  3肌男測基 周秀娜:睇有冇剃格肋底毛 [FACE - 424] 周秀娜,MF,



周秀娜喺 nowTV《攣直後援會 II》中接受測試,喺 3位裸男中估誰是同性戀者。

真面目

估中有獎  3肌男測基 周秀娜:睇有冇剃格肋底毛

美國通過咗全國同性婚姻合法化,睇 facebook朋友頭像轉晒七色彩虹就知幾令人鼓舞之但係同志都係平凡人一個啫,有冇辦法一眼睇得出呢?周秀娜就有特別的測基技巧。

早前娜姐周秀娜上 nowTV節目《攣直後援會 II》,要喺 3位裸男當中估誰是基男,娜姐嘅絕招竟然係睇吓對方有冇剃格肋底毛喎!測試完畢,娜姐更高票奪得網民票選「最想變攣女藝人」冠軍添,真係估佢唔到呀!

周秀娜獲網民選為「最想變攣女藝人」,主持梁梓禧同茜利妹即時頒獎,原來男男女女都咁鍾意娜姐。

新一輯《攣直後援會 II》可以話食正美國同性婚姻合法化條水,播咗 5集觀眾反應非常之好,新一集將請到周秀娜做嘉賓,娜姐更要問 3個大隻裸男問題,喺對答當中估吓邊個係同志。

「成日有人𥄫我!」

娜姐一開始已好煩惱,掛住望大隻男騷肌唔知問乜好,只係問吓對方鍾意食飯定食甜品;娜姐又忍唔住伸手篤肌男腹肌測試結實度,去到關鍵時刻娜姐用女性角度問:「你哋有冇剃格肋底毛?」果然其中一名肌男格肋底毛剃得乾乾淨淨,娜姐即估中佢係男同志,真係犀利!

周秀娜同時亦奪得網民投票選出「最想變攣女藝人」冠軍,亞軍和秀軍分別係蔡卓妍同譚玉瑛,主持人梁梓禧及茜利妹即席頒后冠同權杖畀娜姐。娜姐接受本刊訪問時好興奮:「好驚喜!好開心佢哋(網民)記得我!係咪因為知我冇拖拍呢?」佢又爆曾經被女同志追求:「我讀中學時第一日返學,未入課室就俾一班女仔望實,突然有個女同學拍我膊頭,送朱古力俾我,佢係代另一個女仔送㗎!佢話嗰個女仔想同我做朋友!我係冇拗攣到,不過成日覺得有人𥄫住我。」

周秀娜仲話好鍾意跟女同志做朋友:「因為佢哋好細心,又知道我需要啲乜,不過拍拖嘅話都係要保護到我嘅男性好啲!」

肌男的手機殼竟然係 Barbie公仔男友 Ken,周秀娜大感驚奇:「你自己整㗎?」

肌男露腹肌,娜姐好奇地伸手去篤並問:「唔好谷唔好谷,係咪真㗎?」

周秀娜問:「你哋有冇剃格肋底毛?」肌男舉手乾乾淨淨嘅格肋底被估中,娜姐你好嘢!

娜姐估中其中一名基男,卻估唔中另一個,苦笑不得。

勁多話題

繼周秀娜同邵仲衡之後,《攣直後援會 II》仲會有前新聞主播同埋早前喺港鐵遇到惡女嘅慢必陳志全添!

跨男跨女 柳俊江、曾美華

喺大台同有線做過主播柳爺柳俊江同曾美華,會喺節目同跨仔跨女玩遊戲,咩係跨仔跨女?即係準備變性但又未變嘅男女囉!

bear bear蒲 魯芬

魯芬 BB身材絕對有份量,呢集會跟同志界肥人 bear bear type去到老蘭基吧,肯定爆晒鏡!

港鐵事件 陳志全、袁彌明

可以話係政界代表,陳志全會親自重演喺港鐵車廂俾人鬧嘅情景,佢要喺鬧佢嘅人當中估吓邊個係女同志,會唔會爆粗㗎?

反客為主 王賢誌、黃宇詩

王賢誌同黃宇詩呢集會做主持人,梁梓禧同茜利妹反而係嘉賓,更會請嚟 3個靚女試圖拗直梁梓禧添!

邵仲衡演基全裸都制

大佬孝邵仲衡則攞咗「最想變攣男藝人」季軍,贏番方展博劉青雲一次。邵仲衡攞獎時話:「我永遠 support free love!最好好似泰國、馬來西亞咁好多人着住女人衫,或者改變自己性別,可以共存嘅!」

佢又話好想演同性戀角色:「演同性戀係好有挑戰,等我自薦下先。我冇底線,只要唔係賣弄色情,全裸咪全裸囉!男人同男人怕咩啫?老婆就一定要知會聲。」邵仲衡會喺周秀娜之後嗰集做《攣直後援會 II》嘅嘉賓,會喺 3對孖仔、孖女中估吓邊個係同性戀者。

邵仲衡呢期梗係 hit啦,仲被網民選埋「最想變攣男藝人」季軍。

邵仲衡喺《大時代》咁講兄弟情,上到《攣 II》就要喺孖生兄弟姊妹中估吓邊個係攣。

網民「最想變攣女藝人」

冠軍

周秀娜

亞軍

蔡卓妍

季軍

譚玉瑛

殿軍

佘詩曼

網民「最想變攣男藝人」

冠軍

謝霆鋒

亞軍

彭于晏

季軍

邵仲衡

殿軍

劉青雲

鍾意就快D Share啦!
Related Posts Plugin for WordPress, Blogger...