王浩信去年同大台續約 5年，小生嚟講叫好忠心，大台當然識做，上年就谷佢做男一拍《樓奴》，同劇又有李施嬅、岑麗香，兩位女神傍住，收視點都好過《風雲天地》囉。
真面目
台慶鋪路 播大陸劇 缺人選視帝 大台硬推王浩信犧牲馬明
選視帝同選特首一樣，除咗內定嗰位，其他有份陪襯嘅都要有番咁上下地位。只是大台小生花旦逐個走，加上今年連播大陸劇《武則天》和《風雲天地》，親生仔女劇集自然少咗，咁就出事喇！據知最近有極高層數下手指，原來年尾頒獎禮，唔夠人爭視帝，唔通頒俾劉愷威、李治廷咩？
趁𠵱家仲有得補鑊，大台惟有臨時抽起今年已有劇出街的馬國明套《流氓皇帝》，改播王浩信嘅《樓奴》頂上，等佢年尾有份排排坐扮下爭視帝。
大台赤化，早前黃金時段播映《武則天》同《風雲天地》就知，一台獨大收視根本冇問題，廣告照收。據知最近極高層開會，數數下男主角，竟然唔係好夠數，因為兩套大陸劇男主角都唔係「自己友」，加埋台慶劇已決定播《梟雄》，男主角為黃秋生、湯鎮業，斷估都唔會係視帝人選。
湊夠數候選視帝
為咗湊夠人數，將原本 8月 3日播映馬明孭飛嘅《流氓皇帝》突然抽起，無綫外事部曾醒明就話:「《流氓皇帝》啱大時大節播，《樓奴》就想食正𠵱家香港房屋問題所以提前推出。」
其實房屋問題就幾時都啱㗎啦，說穿了，因為馬明今年 1月已有套《宦海奇官》做男一，已夠資格入閘選視帝，無謂「嘥位」之下，決定搵王浩信首做男主角的《樓奴》頂上，而王浩信上年加簽五年約俾大台，咁聽話大台即捧佢做男一，最近拍完嘅《 EU超時任務》更加再冧莊男主角。
年底有份同一眾阿哥排排坐，雖然擺明係「攝」，不過王浩信都唔介意，他說：「套劇幾時播就公司決定啦，我都唔知㗎！（搵你湊夠視帝人選？）有得提名都偷笑啦，我唔介意頒獎禮齋坐㗎。哈哈！」咁識撈，坐多幾年視帝就到手喇。
有咩人入閘？
大台小生買少見少，除咗今年播咗兩套大陸劇，台慶劇《梟雄》兩位男主角又唔係自己人，已播嗰啲又唔夠班，真係擔心視帝最後 5強齊唔到腳喎！
|
鍾意就快D Share啦！
|
|
|
