掃呢頁CODE去手機

2015年11月5日 星期四

劉青雲孖古天樂演茅躉華 [壹週刊 - 1339] 茅躉華,青雲,劉青雲,古天樂,陳慎芝,M1,



爆壹爆

劉青雲孖古天樂演茅躉華

巴之閉囉,上年《壹》仔獨家訪問慈雲山十三太保首領「茅躉華」陳慎芝,已被好多香港人遺忘嘅佢,原來喺黑道上地位更高,唔少江湖大佬都要俾面佢,等佢拆解江湖各種恩怨。訪問一出街,即刻引起好多電影公司興趣,仲計劃將佢嘅故事擺上大銀幕,嗱!話咁快套戲就開鏡,戲名叫《神行太保 2016》,卡士好乜勁,茅躉華個角色由劉青雲擔正,另一巨星古天樂都有份做喎,而蔡少芬老公張晉亦會飾演茅躉華嘅好兄弟貓仔,貓仔死之前都有同《壹》仔做訪問回顧前半生,當時感動過好多人。

據聞套戲主力市場會喺大陸,因為大陸人對香港黑社會話題好有興趣,認為係香港傳統文化,相信票房又係億億聲。女主角方面,爆哥聽聞係大陸演員江一燕,其他配角都好多大陸人。爆哥走去搵茅躉華真人傾偈吹水,佢話第一次見到劉青雲扮自己就好鍾意:「大家都睇落黑黑哋,好似冇沖涼。」咁見面有冇偈傾先?佢話:「我覺得佢係一個好敦厚好戇直嘅人,有啲似我。因為佢份人唔會花巧,話一就一,話二就二。」爆哥再問佢套戲最緊要有咩江湖料爆吓,茅躉華當然賣關子啦,講你聽仲有人買飛入場咩,佢「咔咔聲」大笑:「估唔到有電影公司會拍我嘅古仔,我發夢都估唔到喎。」

套戲都算大卡士,除了青雲和古天樂外,仲有盧海鵬。

幾十年前嘅茅躉華,曾經橫行慈雲山。

屯門猛人蘇牛娶新抱

屯門江湖猛人蘇牛,今年真係喜事重重,五月先嫁完女,上星期日個細仔又結婚。可能今次娶新抱做老爺嘅關係,蘇牛零舍開心,所以決定大搞,殺出屯門去到尖沙咀美麗華酒店擺酒,一於帶班圍村兄弟出去見吓世面。

有朋友同爆哥講,蘇牛當晚好豪氣,一層四個宴會廳佢全部包晒,筵開五十幾席大宴親朋戚友。不過圍村人始終都係迷信,所以逢係四字同七字尾嘅枱號都冇。上次蘇牛嫁女,葉劉、田北辰同專幫特首影相擺上 FB嘅馮煒光都有出席,朋友話本來今次想集郵,同班大人物影吓相,點知佢哋冇出席,惟有搵咗高佬和合照囉,話晒人哋都係鄉紳土豪,好過冇啦。不過,蘇牛話晒係屯門猛人,所以都有唔少江湖人物俾面出席,好似藍地新義安話事人肥傑,不過就唔見佢手下排骨,可能因為玩殘金毛收數佬逼人食衣紙單嘢搞大咗,仲未敢蒲頭。

蘇牛設宴,筵開五十幾席。

勝和坐館 個仔入娛圈

上月尾,有團體喺觀塘搞咗個 party,介紹一班專門喺網上發表音樂嘅年輕人。音樂嘅嘢,爆哥真係識條鐵咩,不過有機會同班後生仔交流吓都唔錯,所以都跟朋友去咗趁熱鬧。去到現場,見到兩個貌似竹升仔嘅小男孩,好鬼熟面口,但一時又諗唔起佢哋似邊個。朋友同爆哥講,呢兩個細路背景唔簡單,原來係和勝和現任坐館沙田 Me兩個仔。

呢兩個細路分別叫 Zachary( 18歲)同 Aden( 16歲)。爆哥問佢哋做乜想入娛樂圈,佢哋話自細就好鍾意唱歌跳舞,所以想試吓入呢行,依家兩個都有跟吳國敬學唱歌。而 Aden早兩年,已經喺泰國拍過一部講打拳嘅戲。兩人仲話,老豆本來反對佢哋入呢行,但最後都冇符,俾佢哋試一試。咁,驚唔驚老豆嘅麻煩背景,會有影響先?細仔 Aden就話人哋點講控制唔到,但佢話自細喺外國長大,唔知社團係乜嘢喎,只知老豆係一個生意人。

爆哥乜料

金融界撈家,穿梭黑白政商界,朋友遍布旺角至中環,每星期都八到

唔同料,同《壹》仔讀者過吓癮!

鍾意就快D Share啦!