雖然生意上軌道，但讀到中二就輟學的 Kenny亦不忘以前捱苦的日子：「我唔會開貴價餐廳，開呢度就係想同人講食和牛都唔使千千聲！」
壹盤生意
危中有機 牛扒即揀即煎 月賺$25萬
做生意有危就有機，安東奶奶雞老闆劉建偉（ Kenny），最深明此理。
只是一年前，銅鑼灣及旺角被市民佔領，附近商店、包括 Kenny的韓菜餐廳，首當其衝，有的捱不住甚至要倉皇結業。不過， Kenny卻把握了時機，他聲援「黃絲」、發起「著黑衫戴黃絲有半價」行動，
深得年輕人歡心。生意重拾升軌之餘，今年更逆市開六間餐廳！
其中一間是三個月前開的日式扒房「 Metal Steak」。
新店主打「人人豪得起」路線， A4佐賀和牛最平三百多元有交易，即揀即煎即食，現時月賺達二十五萬元。經歷過金融風暴、沙士，入行廿多年的 Kenny深知遊客生意「靠唔住」，他旗下餐廳全部主攻本地客，總收入突破千萬。他說：「我最想有華人嘅地方就有我餐廳！」
二○一五年可說是 Kenny豐收的一年。他一口氣開了四間分店，還有兩間在年內開業，旗下超過一百五十位員工，總收入突破千萬。最新的一家，不再是韓食，而是扒房。 Kenny講明開店的第一目標，就是改變香港大眾對「扒房」的看法：「以往鋸扒俾人感覺係 high level，一路飲酒一路慢慢食，但係香港人生活咁急速，我就諗點樣令鋸扒變做快餐。」
「快餐」要價廉物美，他以 A4佐賀和牛為例：「呢度好均真，三百安士 A4西冷，只賣五百幾蚊。出面高級餐廳，單件扒未計其他嘢都要過千」 Kenny指扒房營業額雖然比韓式餐廳高，但不是最賺錢：「我哋搵日本朋友幫忙入貨，入得夠多，先拎到個好價錢，毛利四成左右。」由於來貨價夠平，賣得多賺得多，他坦言是做薄利多銷。
高級牛扒 薄利多銷
要薄利多銷，「 Metal Steak」的玩法，是將鋸扒變得「速戰速決」。客人入到鋪內，便會見到一個如日本拉麵店的餐牌燈箱，主要有六款肉作選擇，包括日本和牛、安格斯西冷及澳洲羊鞍等。每人最低消費二百克， size比一隻手掌略大。揀好後，排隊去收銀處落單，客人即買職員即切；旁邊另一職員接過生肉後，亦立即放在架上燒烤。烤好客人拿去快餐枱開餐，通常半個鐘食完走人！
扒房以和牛作為主打，佔近八成生意：「西冷油脂分布較為平均，食落去有少少咬口，肉眼就入口即溶，但香港人鍾意西冷多啲。」 Kenny專程到日本採購火山石燒烤爐烤熟牛扒，加上盛載牛扒的鐵板維持超過二百度高溫，故他建議客人選擇五成熟左右就足夠。而 Kenny亦邀得在澳洲扒房擔任大廚的 Pat回港助陣：「個火山石爐有一千度，二百百克的肉燒兩分鐘已係極限。點知塊扒燒到幾成熟？就靠 Pat的功力，最緊要客人覺得俾呢嚿錢係值嘅！」
有別於一般的黑椒、蒜蓉汁，餐廳提供忌廉芥末籽、柚子味噌等特色醬汁給客人選擇。鋪頭開在歌賦街，就在著名食肆九記牛腩旁，啱晒貪新鮮的中環友。現場見不少客人亦愛由外區駕車來光顧。客人陸先生說，以同等質素及分量，街外餐廳都要九百多元，這裡只是六百多元：「做開服務業，都知有幾多錢去咗人工度，呢度有好嘢食無服務都唔介意。」另一食客林先生則說：「價錢接近超市價，但係呢度有得坐喺度食埋，價錢 keep到咁低都會再嚟。」其實店鋪原意是想「立食」，客人用餐更快，但 Kenny說暫時要無奈妥協：「客人鍾意坐多啲，我又唔會強迫客人企。依家都開始多餐廳無凳，香港人都要慢慢適應。」
佔中成轉捩點
Metal Steak月賺達二十五萬元，開業原來跟「佔中」有莫大關係：「我自己住喺旺角，記得上年九月二十八日，見彌敦道開始多人，我第一時間就諗：『今次真係大鑊！』」他坦言第一時間想到餐廳生意：「嗰時有兩間分店，一間旺角一間銅鑼灣，兩間都對到正佔領區。」主打韓式傳統菜的安東奶奶雞，一三年開張，上年食正韓劇《來自星星的你》，令餐廳一炮而紅，站穩陣腳之際，「佔中」令他始料不及：「生意跌到得番兩成，我每日向韓國入二百隻雞，賣得嗰廿隻，冰鮮雞唔可以留要日日掉！」
然而，一星期後，他決定支援示威者：「我喺新聞畫面見佢哋要避雨，知道會有人嚟拆佢哋啲障礙物，當時我好驚佢哋有危險。」他想出一個辦法，幫示威者，亦幫自己：「佢哋要走嗰時真係無定匿，我就喺 facebook發起戴黃絲半價食雞，嚟到都有地方避一避。」發起活動後，不少佔領人士紛紛前來支持，他們更特意不挑選任何優惠：「嗰時好多傳媒都有採訪我哋，令好多人嚟試吓，之後生意仲要比運動前好！」除了生意，更重要是報導後不少人有意跟他合作開餐廳，令旗下店鋪愈開愈多。
與八九十後拍住上
Kenny對年輕人的想法很明白，而餐廳現場所見，員工以年輕人為主。對於不少人以「廢青」來形容八九十後， Kenny就有另一番見解：「依家年輕人，確實係比較溫室啲，我對住自己個仔都知。我以前做廚最緊要尊師重道，分尊卑，但係依家要同佢哋做朋友。佢哋返工目標未必係搵好多錢，但最緊要開心。」訪問期間，看到 Kenny不時與員工到門外「吹水」，了解他們想法。
原來 Kenny為了員工工作更順暢，在不少細節位都花了心思：「我 set餐單，我都係諗員工先，好似『奶奶雞』，我會整一張圖文並茂嘅 menu來剔，減少誤會，等新入職嘅人都易上手。」 Kenny亦會設銷售目標，令員工更有歸屬感：「我 set條數都好低，好似呢間 set營業額過七十萬就有百分之一佣分俾大家。達唔到唔使罰，主要想大家開心，開業到依家，餐廳每個月都有錢分。」
自由行靠唔住
Kenny在九十年代曾在尖東開酒吧，專做遊客生意，但九八年金融風暴、禽流感，令訪港遊客急跌，酒吧亦無以為繼。對於近日零售業大吹淡風，稱「慘過沙士」，他表示：「我之前做過遊客生意，知道佢哋一唔嚟就死梗，所以依家開餐廳一定做本地人生意。有啲人收入少咗自然冇咁捨得使錢，但影響真係好微。到唔得時咪再諗辦法囉，有手有腳死唔去嘅！」創業多年， Kenny坦言最重要是自強：「佔中嗰時，我啲員工都喺度怨，我見生意唔好當然唔開心，但係不如諗辦法好過啦，就咁喺度鬧都無意思！」
壹週 tips：跟風開韓菜必賺？
Kenny以韓菜起家，近年韓風強勁，韓菜一開即賺的報導比比皆是。《壹盤生意》亦曾邀請 Kenny，為開韓國餐廳的年輕人提供意見。近月 Kenny再夥拍 80後 Diana開韓式混合菜 119plus。問一問 Kenny，跟風開韓菜，是否一定賺？
無經驗易玩完
「而家好多嘢上網就好容易搵到，開餐廳睇落好似好易就做到，但係如果無廚房、樓面經驗，好似你想慳成本、偷雞想入平少少嘅貨，到頭來唔啱用，或者客人未必啱口味，咁好易玩完。」
一年內要回本
「餐廳啲嘢日日用，折舊得好快。如果一年內回唔到本，之後維修費就慢慢嚟，支出起碼多十至十五萬，到第二年傾續約、裝修，到時未賺到根本計唔掂條數。頭半年係俾你去試，唔得嘅就要轉型，半年後仲係唔得就要同業主傾，因為做一年都頂唔住，做落去無意思。」
定位要清晰
「開之前要對餐廳定位好清楚，好似 target咩客人、菜式同定價係點，一定要好清楚。仲有就係要對自己嘅菜式有信心，唔好人哋有其他意見就即刻動搖。」 Kenny的忠告，唔只開韓菜，開任何類型餐廳都啱用！
開業資料（ 07/2015）
租金# $520,000
裝修 $1,500,000
日本火山石燒烤爐 $200,000
食材 $450,000
雜費 $50,000
總投資 $2,720,000
#三按一上
營業資料（ 09/2015）
營業額 $900,000
租金 $130,000
人工* $130,000
食材 $340,000
水電等雜費 $50,000
盈利 $250,000
*八位全職
撰文：梁延宇
攝影：鄭樹清
攝錄：陳浩樂
ed_bn@nextmedia.com
|
鍾意就快D Share啦！
|
|
|
