掃呢頁CODE去手機

2015年11月5日 星期四

鄉音講唔掂 馬明搵幕後配音補鑊 [壹週刊 - 1339] 馬明,馬國明,M1,



娛樂偵訊

鄉音講唔掂 馬明搵幕後配音補鑊

打正影帝火併視帝旗號,由黃秋生、黎耀祥和返娘家助陣的湯鎮業,合作的台慶劇《梟雄》搶到聲勢。備受注目,「柴九」黎耀祥和黃秋生較技成為箭靶外,做秋生年輕版的馬國明亦被抽秤唔跟影帝講上海口音,角色分裂。據了解,馬明在劇中原要講鄉音對白,但因為講唔掂,要勞煩後期搵配音補鑊。

跟影帝口水尾,無着數!

苦練兩個月

無綫台慶劇《梟雄》因為有黃秋生在陣而受到注目!對於影帝自度講上海口音對白,外界反應好壞參半。播出首週後,有網民發現劇中飾演黃秋生年輕版的馬國明,有幾秒對白沒有配合中年版講上海口音,影帝幫晒口!「成日話馬國明冇口音,佢啲戲份都未出,未出點知冇!」

據悉,馬明原本有配合黃秋生講鄉音對白的演繹方式,甚至在埋位前兩個月,已經遵從監製王心慰指示,學好上海口音。但到正式埋位,天資有限的馬明講極都講唔掂,監製最後惟有放棄,讓馬明講番廣東話,等做後期想辦法補鑊。「馬明話唔夠時間學喎!監製唔想夾硬收貨,寧願之後搵人幫佢幕後配音,觀眾聽落可能覺得怪,但咁係唯一解決方法。明知要做黃秋生年輕版唔易,但馬明顧得做戲又顧唔到其他,都冇辦法!」一名劇組人員說。

影帝加視帝的組合,令低迷多時的大台劇有番啲起色。

秋生年輕版

本週出街的《梟雄》,馬明開始多戲份,要他演黃秋生年輕版,點會冇壓力。

有指開拍前馬明花過時間苦練上海口音,可惜埋位時都係講唔掂,拍住一班好戲之人,只可以講少啲功力都比下去。

上海變潮州

要搵個識講上海口音,把聲又要近馬明的配音員亦唔容易。雖然最後搵人代馬明配音,但據劇組人員指,出來的效果竟然似潮州話,嚇一跳。「睇試片嗰陣發現幫馬明配音個配音員係就係講上海鄉音,但唔知點解對方發音聽落似潮州話,即係似李嘉誠講廣東話,唔似上海口音。黃秋生讀演藝學院出身,好多地方方言都要學,所以佢識分上海口音係點發音。負責搵配音員個導演唔識分,所以搞到咁!」劇組人員說。

胡杏兒的戲份貫穿馬國明與黃秋生,由頭帶到尾,想封殺她的大台,冇得剪走其戲份下,惟有當女一消失,唔俾佢宣傳。

唔使為台慶劇宣傳,在內地拍劇的胡杏兒一有時間便回港籌備婚禮,兼夾陪未婚夫夜蒲。

今次搵到秋生同湯鎮業回巢坐鎮,有指全靠監製王心慰(左二)與他們的交情。

胡杏兒剪唔走

明明是台慶劇《梟雄》女一的胡杏兒,因為已經成為叛將,宣傳海報被放在尾位,女一變大茄。據了解,大台有高層一度下令要將胡杏兒的戲份大幅刪剪,但她的角色由馬明年輕版貫穿到秋生中年版,根本剪無可剪。

被封殺,冇得做宣傳,在天津拍劇的胡杏兒毫不介意,得閒返香港陪未婚夫夜蒲,話之你!

撰文、攝影、攝錄:娛樂組

鍾意就快D Share啦!