掃呢頁CODE去手機

2015年11月5日 星期四

摺埋餐廳止血 郭少芸瞓身消息股 勁蝕百萬 [壹週刊 - 1339] 郭少芸,M1,



郭少芸信錯「山埃」貼士,買股票損手蝕百萬,搞到要結束餐廳填氹。

探熱針

摺埋餐廳止血 郭少芸瞓身消息股 勁蝕百萬

五月拍罷《愛•回家》後,「馬柔」郭少芸一直坐冷板冇工開,去年投資百萬在旺角朗豪坊開食肆「小台北」,最近仲執埋笠,心血化為烏有,原來同炒股有關。

據了解,今年四月郭少芸聽朋友「內幕貼士」,瞓身買入一隻消息股,撞正七月股災,買入的股票全線都冧價,令她損失過百萬,蝕到人肉,唯有將最後一間餐廳「小台北」,結業止血。

曾經風光過

現年四十七歲的郭少芸,○二年已開始投資飲食生意,○四年更打正自己旗號在朗豪坊開了間叫「簡單廚房」的 cafe,又不時落場做生招牌,製造明星效應,生意好到開分店(將軍澳),一二年再擴張版圖,在朗豪坊做埋台灣菜「小台北」,晚晚打蛇餅,有指最好景時,旗下食肆每月營業額高達三百萬。

「其實間西餐廳生意真係好好,旺角同將軍澳兩間鋪都經常滿客,不過近年經濟唔好,做食肆競爭又大,被迫要做特價套餐爭客,但來貨愈加愈貴,餐廳又要請唔少員工,後期已經好難做到收支平衡,舊年業主又加租, Florence(郭少芸)頂唔住,唯有執咗佢。『簡單廚房』做咗十年,佢係好唔捨得,但都冇辦法,因為仲有間『小台北』,都係好勉強先頂得住。」郭少芸身邊人說。

以往郭少芸經常親自落場打理餐廳生意,斟茶遞水,甚至抹枱都做埋。

好景時,郭少芸在朗豪坊有兩間餐廳。

信貼士蝕入肉

投資做生意,需要一定資金周轉,即使有彈藥,郭少芸手上物業唔多,去年與姐夫合資買入一個市值一千一百萬觀塘工廈單位,至於現居七百多萬的西灣河逸濤灣,也是與胞姊共同持有。

股票唔同磚頭,買賣套現較靈活,所以郭少芸鍾意買股票,除了實力股,亦會炒消息股;今年四月,她聽「貼士」大手買入一隻消息股,結果損手過百萬。

「 Florence以前都試過聽埋聽埋啲貼士蝕過唔少錢,後來佢就算玩股票,都只會買啲大藍籌;今年四月股市爆升,佢就好似鬼揞眼咁,收到風就瞓晒身,點知撞正股災,蝕咗成百萬。」

手上「磚頭」唔多,郭少芸連平日代步的坐駕,都係由家姐姐夫持有。

《愛.回家 II》換班底,五月至今,郭少芸冇工開。

圈內好姊妹先後嫁人生 B, 47歲郭少芸事業感情雙失,好唔掂。

約馬壯去行山

股票唔見一大嚿,一直捱住捱住的「小台北」,最終難逃執笠。

「本來諗住撐得幾耐得幾耐,但股票蝕入肉,與其個個月蝕錢,索性(八月)摺埋佢。」郭少芸身邊人說。

入行二十三年,郭少芸出名好戲,不過原裝《愛•回家》今年五月收檔,《愛•回家Ⅱ》又冇佢份,跟無綫尚有幾個月便約滿的她,大把時間煲劇,又約埋「馬壯」黎諾懿、「嚴謹」張達倫等人去行山,「家人」敍舊,由過去三年忙到爆騷變到好得閒。

郭少芸得閒約埋「家人」黎諾懿去行山。

早前郭少芸被拍得同一名四眼男到圓方食飯睇戲,事後她澄清對方只是普通朋友。

冇工開又冇拖拍,郭少芸終日匿喺屋企煲舊戲解悶。

馬家姑姐

92年選港姐入行的郭少芸,在 TVB超過二十年,演出過不少為人熟悉的劇集包括《真情》、《大鬧廣昌隆》、《法證先鋒 II》等,近年人氣下滑,在《同事三分親》、《畢打自己人》等處境劇做三、四線角色; 12年長命劇《愛•回家》大受歡迎,連帶飾演姑姐馬柔的郭少芸爆晒騷,但新版《愛•回家》無得留低,郭少芸坐冷板等約滿。

生意失敗

好多藝人黐其他人做生意,撻個名出嚟做生招牌唔出錢,計落係有着數!不過,一旦真金白銀科水,蝕錢仲要冇埋面,大有人在。

王敏德

去年尾,王敏德在銅鑼灣租鋪開設自家品牌 MW賣男裝,開業半年已慘蝕百萬,要提早解約離場。

黃宗澤

一心在飲食業大展拳腳的黃宗澤,去年與四洲太子女戴凱欣合資在九龍城開糖水鋪「笑甜甜」,有指太子女戀上做金融的新歡後即閂水喉,糖水鋪做唔夠一年執笠。

陳豪

咖啡癡陳豪, 11年在大馬同富商朋友合資開咖啡店,第一次做老闆,陳豪無論選址、裝修、入貨都親力親為,可惜經營不善,一年未夠就要關門大吉。

撰文、攝影、攝錄:娛樂組

鍾意就快D Share啦!