2015年11月5日 星期四

馬勝基金台灣爆煲 艇仔黃佩霞伍詠薇上錯船 [壹週刊 - 1339] 伍詠薇,M1,



黃佩霞和伍詠薇都有投資馬勝基金,如今有排煩。

娛樂偵訊

馬勝基金台灣爆煲 艇仔黃佩霞伍詠薇上錯船

錢搵錢!不少圈中人熱衷於外匯基金,其中伍詠薇在黃佩霞介紹下,各以二百萬和三百萬港元投資馬勝基金,真金白銀俾錢外,二人更做埋「艇仔」,拉攏相熟藝人和模特兒做下線。今年五月,基金在台灣爆煲,之後台灣地檢署更以詐欺等罪名,起訴當地馬勝總裁張金素等十三人,牽涉金額達 139億台幣。上錯船,隨時渣都冇!

一倍利潤做餌

教瑜伽多年的黃佩霞,已是業內姐級人馬,搵長錢,諗住投資翻幾番,點知上錯船!

去年,自稱專營全球外匯、黃金及採礦等業務的馬勝基金來港設局,以投資基金每年可獲利一倍為餌,吸引投資者加入。

「 Almen(黃佩霞)係經做健身教練嘅老友 Alan Ho介紹投資馬勝,佢係 Alan下線。 Almen自己投資咗最少三百萬。個玩法要擺筆錢入馬勝一年半後再連本帶利攞番,但期間佢介紹咗好多 model同圈中朋友投資,亦賺咗唔少介紹費;伍詠薇見有錢賺,就跟佢投資咗二百萬,自己仲唔執輸做埋一份,另外介紹咗其他圈中人買,大家啲銀碼都唔細。」知情人說。

台灣馬勝爆煲,總裁張金素(右)被控詐欺等罪名,之前她曾來港出席投資講座。

台灣地檢署在馬勝集團成員家中搜出現金七千多萬元台幣,總裁張金素家中更有「銀紙花」,全是苦主血汗錢。

搵阿佘省招牌

黃佩霞和伍詠薇之所以落疊,全因馬勝搭棚搭得靚。

「佢哋舊年先過嚟香港,喺五星酒店包 ballroom搞千人投資講座,請咗王冠一、郎咸平等知名財經專家做主講嘉賓。之前喺澳門、台灣同大馬都係用同一手法擺靚個陣,澳門嗰次仲請咗李思捷、佘詩曼同徐子珊做特別嘉賓,好落本!」

今年五月,馬勝基金在台灣爆煲,九月台灣地檢署起訴當地馬勝總裁張金素等十三人,正式控告詐欺、非法吸收資金經營銀行業務、違反多層次傳銷管理法等罪名。一班圈中投資者,擔心到有得震,冇得瞓。

「大家都只有搵 Almen同伍姑娘,佢哋話台灣單嘢唔關香港公司事,又話我哋啲投資未到期,到期一定可以攞番。而家我哋都冇嘢可以做,只有等到期再打算。」其中一名投資者說。

同圈中人熟絡的 Alan Ho(右一)是黃佩霞上線,之前伍詠薇演舞台劇,二人有去後台探班。

之前台灣馬勝未爆煲,伍詠薇和 Alan有錢齊齊搵, friend到任嘴唔嬲。

近日黃佩霞仍有閒情逛街購物,但心情一般,唔多歡容。

取回本金斬纜

本刊致電黃佩霞求證,她直認有投資馬勝基金。

壹:壹週刊 黃:黃佩霞

壹:聽聞你有投資馬勝基金,佢哋喺台灣爆煲,擔心嗎?

黃:我同佢哋啲嘢已經完晒,所以都唔係好清楚。

壹:你已攞番本?

黃:係呀!年頭攞番,我而家冇(做)啦。

壹:投資咗幾多錢?

黃:唔……唔好講過咗去,而且我唔係好清楚人哋公司成件事。

壹:有冇圈中人跟你玩呢個基金?聽聞伍詠薇有跟你投資。

黃:(猶豫)唔係好清楚,如果有……係我唔識嘅,我……都係自己玩,冇同其他人講過。

壹:有冇介紹其他親友?

黃:全部都冇問題嘅,全部都攞番晒。

壹:你好好彩喎!

黃:而家我有啲朋友(投資緊)都冇問題喎,之前介紹俾我啲朋友都冇聽到有咩特別問題!好似話公司轉型,唔係乜嘢大件事。

壹:但台灣馬勝已被刑事檢控!

黃:以我所知唔關公司事,係個人操守問題。

壹:咁點解唔繼續投資馬勝?

黃:我啲資金有其他用途吖嘛!哈哈!

投資可能出問題,近期伍詠薇再度活躍工作,日前拍外景被集郵。

完成拍攝,伍詠薇去銀行理財,睇住自己啲資產。

受馬勝事件困擾,伍詠薇黑口黑面睇燈飾。

逛完一輪,買了點食物返回車上等候,表現奇怪。

在車上等了個幾鐘,伍詠薇突然戴口罩變身入酒店,幾個鐘後都未出來。

近日伍詠薇冇乜心機,好在老公練海棠陪伴左右。

被證監列入可疑名單

近年活躍於東南亞的馬勝,聲稱公司從事全球外匯、黃金交易平台業務,並推銷「馬勝基金」投資方案,投資人每次投入本金十八個月,期滿前不得取回,回報率接近一倍,以超高利息做餌,引人入局。

近月再向投資者推銷母公司 ROGP(皇家控股集團)的股票,又聲稱公司明年初在美國上市,回報率可觀。但有傳媒翻查美國證券交易委員會記錄,皇家控股集團截至現時從無遞交過任何申請上市文件,而最新季度的財務報告更加未核數。

香港證監會有一個無牌公司及可疑網站名單,馬勝亦榜上有名;此外,該公司亦同時被列入大馬中央銀行的消費者警示名單。今年五月,台灣馬勝爆煲時,香港馬勝即申請成為「不活動公司」,表示它不再有業務。

馬勝在澳門搞活動時,請來李思捷、佘詩曼、徐子珊任嘉賓,出手豪!

馬勝艇仔除了向身邊人埋手,更會在網上留言搵生意,早已有網友指疑似種金。

撰文、攝影、攝錄:娛樂組

鍾意就快D Share啦!
Related Posts Plugin for WordPress, Blogger...