2015年11月4日 星期三

好過冇 港姐黨夾擊 黃智雯慘變倉底女一 [FACE - 441] 港姐,黃智雯,MF,



新劇中黃智雯飾演教師,成個造型同當年走紅嘅鵪鶉妹一樣,黃智雯戴眼鏡,確係幾煞食。

真面目

好過冇 港姐黨夾擊 黃智雯慘變倉底女一

眾所週知大台劇集女主角,近年俾班港姐陳凱琳、蔡思貝等新鮮女霸哂嚟做,捱咗多年嘅花旦就人老變舊女, 10年喺《搜下留情》飾演鵪鶉妹彈起嘅黃智雯,原本上緊位,亦因為港姐黨出現,於劇集《張保仔》降為女四做妓女,認真慘情。

不過喺新劇《爸 B有話兒》黃智雯翻生變女一,原來呢套劇喺節目巡禮冇份,隨時攞嚟攝期或成為倉底,雖然孭飛新劇大台唔 care,但黃智雯依然積極:「我覺得一步步嚟先啱我,我唔會因為戲份少而唔開心。」呢啲員工大台要珍惜呀!

32歲黃智雯 07年選港姐入行, 10年喺《搜下留情》飾演鵪鶉四眼妹宅女造型,令她開始上位, 12年仲攞埋「飛躍進步女藝員」,以為可以繼續上,點知之後殺出黃翠如,同陳凱琳、蔡思貝、朱千雪等。黃智雯唔止冇得做女一,喺剛播完嘅《張保仔》更慘遭貶落大配角。

10年喺《搜下留情》拍住羅仲謙,黃智雯成宅男女神,羅仲謙亦因為騷肌上位。

難得做女一,黃智雯超認真,埋位前劇本不離手。

陳凱琳忙拍《巨輪 II》拍住當紅小生蕭正楠,嚟緊又會到北海道取景,重頭劇係唔同啲。 網上圖片

蔡思貝同吳啟華剛拍完《純熟意外》,現為新劇《味想天開》開工,得寵係咁㗎喇,冇得葡萄。  YouTube畫面

「我覺得會出街嘅!」

諗住繼續捱騮仔,點知黃智雯忽然又喺新劇《爸 B有話兒》做女主角,上週四(22日)同李思捷喺上環拍外景,難得做女一黃智雯亦顯得緊張,未埋位前狂刨本,又埋定位等導演,但據知黃智雯今次可以翻生,全因為《爸》劇監製潘嘉德不獲曾姐重用,年紀大又要逐年續約吊命,搵唔到大牌埋班,惟有用愛將黃智雯同自信王李思捷擔正。

最慘係《爸》劇於節目巡禮冇介紹,換句話即係唔係焦點劇集,最多攞嚟攝期或者成為貨底劇賣埠,但黃智雯態度積極。她說:「係!巡禮可能冇,但劇集幾時出街係公司決定,我覺得會出街嘅,機會方面我覺得公司俾好多機會我,我覺得一步步嚟先啱我,《張保仔》都有網友讚我做得好啦,有得演出,角色有發揮就得,我唔會因為戲份多少或者係咪女一而唔開心。」一步一步嚟係好,最怕係行一步退三步啫!女仔青春有限㗎!

攞過女飛躍

12年同梁烈唯喺《缺宅男女》爆出,二人仲攞埋當年嘅「飛躍進步男女藝員」獎,𠵱家梁烈唯雪緊,黃智雯都叫有女一做。

之前播的《拆局專家》都係監製潘嘉德(紅圈)主理,又被朱千雪、朱晨麗搶晒鏡,黃智雯就算戲份重都難突圍。 網上圖片

剛播完嘅《張保仔》黃智雯戲份只係配角,反而 13年港姐冠軍陳凱琳先係女一。 網上圖片

黃智雯唔只做戲得,私下亦係舞林高手,早前自拍 MV大騷舞技,嚟緊台慶都有份表演。 網上圖片

黃智雯同謝瑞麟珠寶集團副董事詹文天拍拖,二人關係良好,上年被拍得喺大坑食日本菜,黃智雯仲拍男友頭。 《蘋果日報》圖片

唔上唔落最慘情

唔只黃智雯喺大台捱緊,其實唔少小生花旦,都因為港姐幫、余黨等霸住晒啲位,搞到冇位上,想喺大台有運行,真係要跟啱大佬。

梁烈唯

自從梁家樹離開大台,唯唯就冇運行,早前更因向老兵致敬,獲得巴打萬三個負評,人氣跌到谷底,原本同金剛、王貽興嘅新節目亦抽起。

陳敏之

結婚後冇心戀戰,孭飛新劇《性在有情》 2月拍完,𠵱家都未播,成為倉底,索性專心搞曲奇生意。

沈震軒

原本劇接劇,但因性格愛溝女,唔只大台,連經理人公司太陽都雪埋,冇劇冇戲拍。

姚子羚

雖然劇接劇,但角色戲份愈嚟愈小,新劇《實習天使》變為配角,戲份被岑麗香,吳若希蓋過。

採訪、撰文、攝影:娛樂組

鍾意就快D Share啦!
Related Posts Plugin for WordPress, Blogger...