陸以心係《春嬌與志明》、《低俗喜劇》、《撒嬌女人最好命》同《飛虎出征》編劇，寫完《同班同學》後因監製彭浩翔想搵女導演拍，就點名陸以心，就係咁首次執導演筒。
爆 Like王
《同班同學》露得勁 導演陸以心：點解女仔裸體就係鹹濕？
電影《同班同學》上週上映， 3個女主角郭奕芯、廖子妤同麥芷誼嘅裸露戲成為焦點；導演陸以心首次執導演筒，女仔拍女仔會唔會就住就住？陸以心就講明，女仔裸體係好普通嘅事，床戲以外反而 nude得仲多，睇戲就明！
戲中敏感話題係少女援交，陸以心拍攝前訪問過多位真正援交少女，至發現現今援交妹並非為買名牌而出賣身體，真正原因你估都估唔到！
F：《 FACE》 陸：陸以心
F：有冇賣弄色情？
陸：我喜歡用女仔角度嚟睇一啲事，好多電影係用男仔視角，所以《同班同學》掉轉；有人曾經畀意見，話場沖涼戲係咪應該放後面？啲男觀眾一開始就睇咗佢哋裸體，可能冇耐性睇套戲，嘩！我即刻 ban佢，點解我要用蘿蔔吊住佢哋嚟睇套戲呢？咁嘅話佢哋可以去睇四仔；套戲係講女仔嘅友情，唔係講性，但另一方面我唔會避開 sex，我要實在感，唔係故意色情。
F：點解戲中床戲以外嘅裸露鏡頭反而更多？
陸：我同啲朋友一齊浸溫泉都唔着衫架啦，你覺得女仔身體一定係 for男仔用，女性嘅身體可以獨立地存在㗎？點解男仔裸體就覺得係好陽光，女子裸體就好鹹濕？我覺得呢種思想唔啱，《同班同學》會盡少少力改變下大家。華語電影好多時物化咗女仔，佢哋除衫下一步就係上床，其實唔係吖，跳上床可以一個人瞓啫，所以我刻意將床戲同裸戲分開，啲黑幫片男人都焗桑拿啦，我哋沖泡泡浴之嘛！
F：女主角拍裸戲有冇尷尬或需要輔導？
陸：我哋一齊住咗幾個月去熟絡，除咗攝影師大部份係女工作人員；尷尬唔係最大問題，而係好攰，因為新演員成日 NG，做三十次你都癲啦，佢哋覺得做得唔好，佢哋驚，其實好正常！有時拍完喊戲，佢哋未抽離會繼續喊，咪陪下佢哋，買麥當勞畀佢哋食囉！我話唔好諗喇，肥嘅嘢聽日先減
F：點解套戲講援交好似好正常？
陸：《同班同學》嘅訊息同一般援交片好唔同，我唔想用 90分鐘消費完啲少女胴體，然後話千祈唔好援交；拍之前訪問過好多援交少女，佢哋冇我哋想像中咁掙扎，唔係要買名牌或者要養起全家，佢哋當係一個 game，性質有啲似觀音娘娘收兵，又有錢使咁解，冇我哋想像中咁 heavy。問佢哋點解要做，佢反問點解唔做，啲同學全部都做，都幾開心吖！啲男仔又送禮物又帶出街食飯，好似有 10個男友咁，點解唔做呢？大家道德觀念都唔同。
F： 3個女主角有甚麼特質同戲中角色相似？
陸：寫劇本時有基本人物設定，但認識佢哋後有改動，譬如郭奕芯嘅角色本來再文靜啲，但我發覺佢講粗口幾好聽，所以對白上有微調，畀佢自然啲講粗口唔使忍住。麥芷誼本身有紋身，背影線條亦好靚，無論 pat pat、腳都好靚，所以好多都 take佢背面，人哋覺得三級片梗係要影晒，我覺得唔一定；另外廖子妤係馬來西亞人，本來設定係內地人，於是改馬來西亞，咁佢演得投入同舒服啲。
攝影：吳崇基
|
鍾意就快D Share啦！
|
|
|
