大台劇《梟雄》播咗幾集，由於陣容強勁，有黃秋生、湯鎮業、黎耀祥、馬國明等。
故事講三十年代上海新政府成立，城區被劃分為華界、公共租界及法租界，其中法租界由上海三大亨「翟金棠」(湯鎮業)、「龔嘯山」(黎耀祥)及「喬傲天」(黃秋生)創立嘅三鏗公司壟斷大部份鴉片生意，一眾好戲之人鬥戲，演技卻係唔錯，不過，唔少網民為咗睇秋生同湯鎮業亦忍唔住開電視，開po「推完場」討論套劇嘅甩漏!
噚晚播出第七集，馬明演嫩版「喬傲天」—即係做後生版秋生終於出場，早前已經有網民爆過馬明係講粵語，而秋生係講上海話，有網民問點解同一個角色，語言可以咁唔同，唔通人老咗，就思鄉尋根改口音，噚晚播嗰集，馬明口形同後期配嘅「上海話」明顯有啲唔同。
其實，秋生日前都有喺facebook留言：「好多人問點解三個大佬只有我有口音？因為只有我係上海人。杜、黄、張，只有杜係上海人。」而秋生都有講「成日話馬明冇口音」，續道：「出咗啦咩？人講你又信。未出點知冇？唔好再插祥仔啦，個角色叫癲狗，唔係咁點做呀？我覺得佢做得好好。」
網民噚日睇完即喺網上討論區留言：「寧願馬明同秋生用番正常聲，成套劇啲上海人都冇口音，整口音嚟真係多x魚。」更有網民指馬明唔識扮口音，反問張智霖演《十月初五的月光》嗰陣，係唔係天生識手語，該網民問：「咩叫唔識扮，唔識咪學囉，張智霖天生識手語咩，不過而家啲藝人真係好x懶。」亦有網民讚馬明已經好努力，寫道：「配音雖然有口音，亦扮到有啲似秋生聲，但總係有馬明把聲係腦海，亦會怪怪地，如果係秋生配返／馬明模仿口音就更好」更有網民指馬明配音嗰把聲好難聽，咁先入為主，畢竟馬明喺大台演過唔少劇，大家對佢把聲都好熟，一時三刻係難接受啲！
盛傳早前拍劇嗰陣，馬明原本係講廣東話，之後發現怪怪哋，先急配番上海話，又傳係秋生要求用上海話去演，馬明要硬住頭皮配合對方！話晒人會老、樣會變，不過把聲係跟你一世，祥仔自己扮番後生版就容易得多，但秋生後生版由馬明嚟扮，要把聲差唔多確係有難度！
|
鍾意就快D Share啦！
|
|
|
