【爆相爆片】孫慧雪辣㷫有米男友 車廂吵大鑊
現年34歲的宅男女神孫慧雪近日推出處女寫真，放射33C導彈，火力驚人，前晚讀者陳先生在筲箕灣街頭，目睹孫慧雪與有米男友Edwin Lo在黑色房車內吵大鑊，於是透過本報「爆相爆片」直擊二人火爆鬧交情況，似乎因阿雪為谷寫真，自稱單身而激嬲有米男友。
■入行十年的孫慧雪，大騷33C身材谷處女寫真。
宅男女神孫慧雪的感情生活成謎，她近日接受訪問時大爆dry了半年，自稱單身，即被本報讀者踢爆其實她跟拍拖近四年的富二代男友Edwin Lo未斬纜，兩人更於西灣河嘉亨灣同居，亦有指她與化妝品牌老闆楊振源不時約會，對其他追求者亦來者不拒，阿雪到底情歸何處？本報讀者陳先生前晚透過「爆相爆片」，指在筲箕灣太安街對出避車處目擊阿雪與疑似Edwin的男子，在一輛黑色房車內嗌大交，由於兩人太激動，故引起其他途人留意。
【激動嗌交】
■阿雪前晚被拍到在筲箕灣太安街對出避車處，跟疑似男友Edwin在車廂嗌大交。讀者提供圖片
【匿避車處】
■阿雪和疑似Edwin發現被偷拍，曾先後下車要求刪相。讀者提供圖片
■阿雪為處女寫真博盡，令她榮升宅男女神。
雙方情緒激動讀者陳先生表示前晚9時許，拍到阿雪跟疑似Edwin在車廂內爭執，雙方表現激動，似乎因阿雪為谷33C導彈寫真，自稱單身而辣㷫有米男友。其間二人發現陳先生正在拍攝，疑似Edwin下車爆粗要求刪相遭拒絕，其後阿雪落車說：「唔好意思，我可以同你影相，但我個肚今日有啲唔舒服，同埋你可唔可以delete啲相？」陳先生堅持不刪相，他指阿雪仍死𦧲：「唔好麻煩你delete啲相你delete咗佢」陳先生憶述阿雪用力拉扯他的衫袖，阿雪還向陳先生友人埋手，但陳先生和友人其後開車離去。
■阿雪和有米男友Edwin拍拖四年，更被揭今年5月同遊泰國。讀者提供圖片
■自稱單身的阿雪，近日被爆與男友Edwin未甩拖兼同居。讀者提供圖片
Edwin曾戀華姐
本報記者昨日致電阿雪，問到前晚是否與Edwin在車廂內吵大鑊？她回應：「冇嗌交所以冇嘢呀。」問阿雪目前與Edwin是甚麼關係？她避談：「我單身咗半年，身邊所有朋友都知，我冇講大話，亦毋須講大話，因為我乜都po出嚟！當時被傳媒發現我哋分手，佢係圈外人，我覺得累咗佢，搞到佢屋企人擔心。最近係有見番面，但唔會特別提起，因為對佢會有影響！𠵱家又將佢捲入，希望大家focus喺我工作，我知道大家都想我得到幸福。到適當時，我會話畀大家知，要留番啲空間畀我！講完呢次，所有關到佢嘅事，我都唔會再回應，有乜事就衝我嚟好喇！」
阿雪前晚在fb狂呻：「除咗事業，其他好多嘢都唔順利，其實我就嚟爆煲！」另外，有讀者爆料指Edwin曾與國際華裔小姐冠軍盧淑儀拍拖，Edwin喜愛夜蒲，阿雪對此封嘴不回應。
採訪：唐琛悠、楊定
|
鍾意就快D Share啦！
|
|
|
