藝人滕麗名（阿滕）現時多於大陸拍劇搵真銀，不過阿滕與無綫關係一直良好，每年均會幫無綫拍劇，恰巧近日她有份參與演出的劇集《純熟意外》及《一屋老友記》輪住播映，喜歡看阿滕的觀眾真的有福。阿滕於《一》劇中，重遇多年前的對手歐陽震華，大家多年前已於《陀槍師姐》系列及《洗冤錄》等劇中合作，實在是老拍檔，今次合拍輕鬆喜劇，可謂駕輕就熟，除了Bobby外，今次阿滕遇着呂慧儀（阿蟹），劇中阿蟹飾演阿滕的弟婦，二人同住一屋，經常嗌交，單看二人的嘴臉，已令觀眾發笑。阿滕接受訪問時忍不住謂：「初初睇劇本時，佢個角色唔係咁討好，佢成座山、神高神大，又要演活港女，又要嗌交，真係好難演，（阿蟹好勝任？）好勝任，入型入格不過拍嗰陣佢成日忍唔到笑，仲要係唔知自己笑緊，呢啲女人真幸福。」
怕搵學校唔敢生
不過說到現實生活，阿滕就坦言自己不會鬧交，就算同老公都不會，她笑謂：「我係反應快同忍唔到口嗰啲，我唔會同老公鬧交，因為唔使鬧，我老公話註定畀我激死，我唔出聲一個表情已激死佢，哈哈！」阿滕已為人妻一段時間，最近不少圈中人有喜，不過阿滕卻坦言有點驚，她謂：「見到陳敏之大肚都好羨慕！有啲衝動嘅，我知自己會好鍾意『自己』嘅細路，但萬一要我同小朋友搵學校我真係好驚，睇番轉頭，唔生我會行少一條冤枉路。」
自認控制狂
她又坦言如果有小朋友，她一定會是「怪獸家長」，又謂：「我唔係寵壞嗰啲，我係好鍾意控制，我控制欲好強，我驚有一日會逼到個小朋友離家出走，（同老公有默契唔生？）佢仲驚過我，佢百分百支持，我老公話佢一定要打golf、去旅行，我哋都曾經協議過，如果萬一有咗小朋友，都唔會咁早帶小朋友去旅行，想二人世界多啲。（咁如果真係有咗咁點？）咁真係恭喜晒，OK嘅！都會照生。」
大陸拍劇唔係齋為錢
提到大陸拍劇搵錢多，阿滕坦言不是純粹為錢，遇到好劇本、對手才是最重要，她謂：「我好記得以前有個前輩講過，TVB捧紅一個人除咗要好劇本外，就係一班好對手，大家方向一致，有Heart、有Feel去做，先會有好嘢出嚟！」阿滕現時亦正拍攝一套大陸劇《愛情沒有暫住證》，劇中飾演大陸演員馬蘇的上司，當中要用北京腔普通話一Take過拍攝，實在有壓力，阿滕謂：「真係對自己要有要求，拍出嚟效果唔好，真係會瞓唔着，我對自己好有要求。」
|
鍾意就快D Share啦！
|
|
|
